KING PAMAGPABUSTA

Posted on July 13, 2022 by inglibrarian

Makuyad a Poesya
Irvin Harvey E. Rivera
Siuala Ning Maliwalu/Anac Ning Baculud
July 7, 2019

King pilan kung Banwang mekikaluguran
Karing miyayaliwang tau king Lipunan
Dakal ku abalu king dimut kung belwan
Maragul dang dake e ku palingaran.

Megui kung matibe at subuk nang tau
A megui nang padrun king pamaglakbe ku
Inya nanu man ing ‘pakit kung animu
Piju ku at pijung akit at akit mu.

Miyayaliwang aske, miyayaliwang lupa
Atin balat-kayu, ampong “Dobli kara”
Atin maganaka, atin palamara
Atin e bubulad, atin e malmura.

Miyayaliwang ugali, manawang, masampat
Ing ka’kung akakit karing balang daklat
Dapot nung ing nasa king mayap a dapat
Karin ku mamulut, karin ku kumawat.

Ninu mo kaya ing tatalan king tabak
At kagulutan ku, manatsit, manakdak?
King dane labwad ning mapayit, masalpak
Pamikaluguran, misan mung misaldak?

Ding Piping amanu kanyan no matunggue
Kanyan maputut ing pamiyabeyabe
Ding mayap a nasa kanyan no mibakle
King pamagpabusta, kanyan no miyugse.

SiualaNingMaliwalu #AnacNingBaculud

Posted in Poeta Irvin Harvey Rivera | Leave a comment

CASEBIAN 14:23

Posted on July 13, 2022 by inglibrarian

Ing sablang pamagsicap king obra atin babie pakinabang; nung puru cang salita ala cang apala.

DIZLAG FARM, July 8, 2022

Posted in PL Orly M Dizon, Poeta Laureado | Leave a comment

🍀 Mayubung Kausukan ☘️

Posted on July 13, 2022 by inglibrarian

King pusu makiramdam uling lugud at kayapan karin manibatan.
🍃 melanie7lulio2022 🍃

Posted in Poetisa Melanie Cunanan Naguit | Leave a comment

Ing delarayang poeta

Posted on July 13, 2022 by inglibrarian

Neng Herman Pablo

Ga man pala karing watas a mesabi
Atin mamalkara lisyang panugali
Uling yang mabeluan magkatas ya uri
Manabit pababa gang karing kasagpi

Makananu nala ding poeta e tapat?
King amanu tamu lugud na e sapat
Kapaparangalan bala na ing maaplak
Mamunga mung pait tiniplad ing sampat

Lalwal a manawang ing keyang iguguinkas
Anting mengarirya yang mikapmung kaplas
Kulang nang mamarug ampo ing managkas
King tune poeta e tutung ayabas

Kasagsagan ning laban ‘la man mumutus
Makanini ya ing poeta, layun nang matutus
Mal nang amanu ipaglualu neng lubus
King Asaplala ne e ya mabusabus

Dakal talasulat poetang uliran
Alang payid dungis alang kapintasan
Ilang talaturu mayap delarayan
Damdam mu karela atyu ing kababan

Ayni ing payul ku ampong amunkala
Bang alang kagutgut bieng mapayapa
Ing mal nang usuk ning mal tang ibpa
Lisya king damali kamtan ing biyaya.

Posted in Poeta Herman Pablo | Leave a comment

🍀 Mayubung Kausukan ☘️

Posted on July 4, 2022 by inglibrarian

Neng balang takbang ka keng dalanan… maglakuan kang bakas ning lugud at kayapan.

🍃 melanie28june2022 🍃

May be an image of body of water and text

Posted in Poetisa Melanie Cunanan Naguit | Leave a comment

CASEBIAN 8:6

Posted on July 4, 2022 by inglibrarian

At nung ing talas ning isip ya ing pagusalan, ala nang migit pa king Cabiasnan, ngening ya ing migugulis king sablang bage mimiral!

DIZLAG FARM, June 17, 2022

Posted in PL Orly M Dizon, Poeta Laureado | Leave a comment

(Mumunang dake Ibat king Kawatasan nang Gat Andres Bonifacio, “Pag-ibig sa Tinubuang Lupa” a bildug ku king Amanung Kapampangan.)
Irvin Harvey E. Rivera
Siuala Ning Maliwalu/Anac Ning Baculud
November 29, 2019

Ingsanu pang lugud ing miguit kaya —
King pangadalise at pangayupaya
A anti ning lugud king tibwang Bangsa ?
Ingsanu pang lugud? Ala na pin, ala.

Lubus a kapuryan ing pane imbutan
King Balen ning Taung maningat dangalan
Magdalit, gumale, kudta’t kasulatan,
Degulan na naman keyang kapasiagan.

Alang maulaga a e na inampang
Ning pusung makamal king Balen nang Jirang
Daya, bandi, belwan, bata’t kapagalan,
Mapatlud man ing bie, iti e pikabyang.

Bakit? Nanu ya’iting degulan milalu
A ampangana’ning lugud a masuyu
Miguit pa king sintang mimiral ping tutu
At king bandi nang bie ginugul makatmu?

Ay! Oy’ning Balen kung degulan at tibwan
Iya mung bukud kung—-Indung Balayan
Na ning makayamang aldo king aslagan
A memie pali king mabilug katawan.

Kapilas na niti ing lugud king Balen
Sablang milabasan makamal piaben
Ibat king masayang pungul a lalawen
Mangga ing katawan, king aun kamaten.