atin metung tau a maragul buntuk, atin murin metung a malati buntuk, o’t karening adwa melangi ku buntuk uling dening adwa kabalik la buntuk.
ing malati buntuk, king danum lalbug ya, king danum o angin, migit ing timbang na, kabang ining metung, anting salbabida, ala ya man bayat a mipalbug keya,
at nung mipukpuk ya asne keng kainge, bala mu ebun yang lawi nung kusug me, bala mu asyas ya a pigbalen ane, ala yang bitasang kasias ampong tibe.
nung dandaman mu lang miyapse amanu rening adwang buntuk a sasalita ku, ining metung asne kapiling masyadu karing keyang apse amanu o nanu,
dapot ining metung karing sasalita, asne kagalanting mamapse salita, neng misan, dakal man dapot o’bat ala, ala kang atimbang a bayat bitasa.
kayi ing mabayat tinayid ne gamat ining mayan buntuk king mayap a daklat, ngana mas masanting nung mirin lang bayat ding apse ning asbuk a pibuklat-buklat.
sadya, aku pala itang kalubkuban a ing kakung buntuk, angin yamu laman, magmap atin gamat a kaku tinalan ban e manatili kaniting kabilyan.
salamat namu pin uling miyabe ku kareng taung atin bayat a amanu, inya bagya-bagya, king payul da kaku mikakabayat kung sariling kanaku.
Marimla yang marmol ing pagkeran Dalanan ding turistang magmartsa Anggi-anggyan keng patak ning uran E man bali nung nanung oras na. Aldo, bengi, metung mu ing yatu Maldo, muran, alus nang apansin Ding matang mandiri e sikasu Usyosu mu sakali ma’t atin. Atin misan keng tabu babaldug Magsimpatya keng kabilyang maskup Detang pilak a matni kalantug Arinasang panaplak keng danup. — Aldo-aldo keng basbas na ning Diyos — Ing kaladwa ana sang mao-os.
kaybat ning kaswelung pisulung maswelu a balik balikang pane makabwelu, anting bayung pane mililislis belu, ngeni isipan da atin kinatelu; kaybat na ning timan a pangungulilan king balang pinandit a e kabud pilan; ing paling keng dimla ning bengi patilan, mika e siseryan itang pirikilan; ing seryang pagseryan ning karelang salu mika e siseryang king tula miyalu, kaybat na ning tula ngeni e ra balu ing gawan keng bunga ning tulang milalu. ing maging pengari e ra pala layun, king paling katawan o’bat mekiayun?
tita bern
04/25/20 /18:38 kabang kakargan ing batirya
***sunis a sakdal o perfect rhyme – kanitang manigaral ku pamung magrima, ngara kaku maselan yang dili ing sunis a sakdal uling e yamu metung a silaba ing ririma nun’e adwa la. itang vowel ampo nung atin yang consomant kaybat na ning vowel ning kadwang tawling silaba, ampo pa ing mabilug a tawling silaba reng susunis. inya kanu malagad lamu reng gagamit kaniting sunis. ing original kaniting sunis (don Hilario), pililiwasan na la reng linyang susunis, pero uling sibuknan ku ing sarili ku, sinunis ko reng apat a linya, at e ko piliwasan. metung ya pu ini kareng asulat ku.
Apalabas ke’ng mag-tahu, king danun ning kayabakan Kabud namu iyang linub, keng isip ku’ng milabasan Iniang anak pang malati, mamagtinda ing gagawan Ing ice candy ampon ice drop, maranun pa ilan kuanan At saka na pamisali, keni labuad na ning Bamban Tutung kung mangapalaut, mangaparas kabundukan.
Potang kakung aganaka, ining bie kung adalanan Anting metung penikula, kipmuan kule yang lalawan Dening dakal kasakitan, ikua ku lang alagpusan Meging matatag kakung bie, at mamarap keng katutuan Ketang kakung kapagnasan, ing pamilya yang asaupan E pabayat keng pamilya, lalung-lalu keng kabiayan
Mulat ya ing kaisipan, keng akakit kung kabilian Pamilyang kung penibatan, e mabandi’ng penibatan Inia aku’ng migkapilit, ing kanawan iyang dasan Paninap ku e tutuknang, kening kakung pakiabutan Gugunyat ku at magobra, kasipagan ing gagawan
Kabuklat na ning masala, king Guinung Dios pasalamat Saka naku pin talakad, maranun pa aku’ng gunyat Misadia nakung almusal, at mamalis ketang kalat Inia potang migising la, ketang dulang makayapag At kanita naku mako, manakitan ing pigagap Kayari ning patingapun, penakitan ilang palad
Dinatang ya ing pagsubuk, pamagaral ku’ng mituknang Midinan kung kapansanan, at megi ku ring salunan Limang banuang e magaral, mibagsak lang paninapan Penandaman ku ing lugma, malungkut ku panandaman Mimasmas ku kening bili, anggang-angga nang makanian Alang akit pamagbayu, at panyulung a pa’ntunan
Linapit ku kening madre (Sis. Andrea P. Surop, OP) pengari ku e kabaluan Megi kung working student, ban isundu’ng pamagaral Inia kanakung semasan, panikuanan yang abutan Meyari kung secondaria at kolehiyo iyang disan Ketang tiyaga ampon sipag, kasakitan pibabatan Ketang nasang mayari ku at mikabie kung marangal.
Deng tapat kung kaluguran, e sinawang mamalale Kabang aku ing magaral, ila rening kayantabe Mamag-deliver keng yelo, ketang dalan basle-basle O, mamulbul kaming manuk, at lalako la palengke Keng ditak a panakitan, basta atin pamasahe Matula keng tatanggapan, inia naman menagumpe.
Kayari ku keng kolehiyo, keng “construction ” ku megobra Itang pali ampon danup, kanaku mu ring pibata Mekaturu Sto. Niño, pakamalan kung escuela Menungkulan keni balen, kagiwan ku pepalkas ya Tinuru ku Kalangitan, kareng kapatad tang ayta At ngeni naman king San Roque, atin labing limang banua.
Ngeni retiradu naku bilang metung talaturu Pamangambul keng kultura anting poetang laureadu Talasulat, talagale, keng literatura tamu Tutung metung a basalios, ning kapampangan Parnasu Malasakit at masabal para keni nang amanu Ing amanung kapampangan atsu isip at keng pusu
Kanaku yang aganaka ining madreng pakamalan Tutung kaku ‘yang sinaup iniang aku ing magaral Ing tiwala nang pegkalub kening bie ku e kelingwan Aku naman ing megsikap ban mikabie kung marangal
Sister Andrea T. Surop ining madreng aluguran Noviembre a treinta’ng petsa kayaldawang pagmasusian Ing kalingwan, ali ku ‘ya, ining taung piyutangan Ibili ke keng pedestal, nung ini iyang kailangan
Sto. Nino Academy, institusyong pekamalan Kaduang banua na kanita, iniang aku ing mituknang Pauli na nitang sakit metigagal keng kabiasnan Limang banua kung mituknang, pilubluban e pepaynan
Mil nueve sientos sietenta’y cinco, iniang mibalik ku Kang Sister Andrea mekisabi’ng magaral pasibayu Aku naman keyang tinggap, working student ing gewa ku Ayari ke’ng secondarya, flying colors keng salu ku
Pagmadagul ke kening bie ining maganakang madre E sinawang mamalale, ken siping ku minantabe Aku naman e sinira, ing tiwalang kaku binie Bagkus iyang babakalan. pangaral nang madalise
“Patay lang ang walang remedyo” parati kakung sasabian Potang akung mimina lub, kanaku neng pasiknangan Anya ini yang mitanam keng pusu ku’t kaisipan Amanuan na tutu ya pin, ining metung a katutuan
kilbit na ku nandin ning aslag ning aldo, ngana wari kaku, “oy, matamad, tikdo. ing ulas ning bengi nandin ya pa meko. ‘tuna ing bakutkut, tumali ka’t galo.”
biklat ko reng mata, biklat bagya-bagya, anti la mo waring manglap saglap sala; kabang magmulagat, tututul ku diwa, e pa bisang tikdo, masdul pangakera.
mig abak na pala. o, ninanu naman? o ngening abak na? na’ waring panayan? uli waring abak, atin nakung gawan? ini waring abak ing munye sikanan?
kayi milagat kong sinilad ring mata, medyu mitutundu at manuyab ku pa, mig-unyat kung bagya at likwan ing kama, at pigmananwan ke ing aldo keng banwa.
ing panamdaman ku warit meging mayan, ikwa ku neng likwan ing kakung pagkeran; mebating ne mekad kening pilubluban ing ispiritu na ning kapagmalunan.
ini ing mumunang aldo ayagyu ku a ala no kaku reng adwang takde mu, ing mumunang abak a sinlag kanaku a ali ranaka banding pasibayu,
inyang lakwan mu ku, ing dinatang naman at mengupkup kaku itang kalumbayan; iyang kayabe ku king kakung pagkeran, inyang deng kaul mu e ku no ulasan.
ding aldo aldo’ldo pepakilala ra, e ya mu dudurut ing yatu ku keka; salamat king ngara, “atin Dios king banwa, Iyang dapat maging tula mung kaladwa.”
Nung abalik mu sa ing linabas Nanu kayang e agyung paglibe Inyang ining ngeni ya pang bukas Ing sabla ma’p a alang kayarle. Pagmalunan la retang panaun Gigulan panga makasarili Nung awulyan mu sa itang napun Apigil la ring mine palsimi. Kakuyad na wala sati ning bye Ban sayangnan keng keyalan atdu Nung imbut sang mekipalkarine Ing tabakwan e sa mengaloku. — Dapot nan’ pa ing m’yugseng salabat — Pagdusa’ na ing kaplas ning balat.
Ketang tauli na ning bengi, keng burul ning kaluguran Necrolohiyang perandam kening taung pakamalan Memagsalitang kapurian, nanung mayap nang depatan Keng meangubieng kayabe keti babo ning sikluban
Kayari dang megsalita, dening kayabe keng obra Tinalakad ya ing tata, pasalamat sinabi na Ketang kayang pamangamanu, iya ining meg-istoria Sinabi na ing panaun, a delanan niting sinta
Manibat king secondaria sinuyu ne ing dalaga Mamanikan, mamie galang, pupunta ya keng bale da Deng malugud nang pengari, alang tutul dimdam kaya Inia ilang miyasawa, mikalugud anggang-angga
Keng karelang pamiyabe yumung lugud la mibuklud Iyang tutung misnang tibe, matibe yang anting buklud Masaya ya ing pamilya itang tula yang mamagus Anting alun nung lalawan magparagus ketang ilug
Dapot tula yang meyampat keng pagsubuk a dinatang Mesakit ya ing asawa, itang bayat penandaman Mamalipit keng beyatan iyang tutung panandaman Itang aldo yang dinatang aliwang bie yang pintalan
Masaya ku ikit kayu kakung lungkut akalinguan Dapot bukas kalibing na, ining lumbe iyang datang Makananu keng arapan, itang bukas a paratang Alanayu’ng kakung sinta ing lubus kung kaluguran
Makananu naku kaya, keng pagkeran panintunan Ala na kakung mangising kabuklat ning kayabakan Alang umang sasalubung potang aku ing paratang Nanu kaya ing gawan ku kening lumbeng panandaman
Tutung misna king kasakit aku ining kayang likuan Ing bisa ku ping gumaga dapot ini yang aguantan Potang dening kakung anak ilang mina pilubluban Inia aku ing talakad, aminan ku ing katutuan
1) Inglamu mo kapilan pa, sumangid dalan daka ikit, E ku balu nanung sangkan kabud naku dinalakit At ban e ku maulatang makiyagnan kekang pilit Kunwari mong pasyuk-pasyuk kambe ning maina kung dalit.
2) Pegsikapan, pekibaluan.. king facebook ing keyang lagyu Kararagling mig-friend request, at tinggap ne ing pamun ku Pengalkal ke ing profile na’t nalben reng keyang letratu At ban e ke akalingwan ‘nabe kune king friends list ku.
3) Anya manibat kanita, megumpisa kung mengarap At magparasakali kung.. e yamu metung paninap Uling misan ining pusu, mengulila ne keng lingap Inya mibalut king kanlap, ing lugud a misna kalyap.
4) Asna ku king kakuswelu potang kaku magreply ne Bistat man ken mung messenger, keng tula iyang karame Anya ing ditak nang oras at ding kuentu nang darake Panulu lang makapasno kening pusu kung malumbe.
5) Ining belangkas kung kudta angu ya keng talambie ku Menibat king delanan kung menalig ketang pangaku Wa,ing palasa ning bigu anggang binit kinaul ku Angyang e ya ustu lingap, ing pilsintan kung maginu.
6) Makanyan man ing milyari, ala naman palsalanan King liguran kung misnang mal, ka-video king kalungkutan Megtiwala kung lubusan inintindi ke kabilyan Ngeni pala king pagkeran, e ya metung a ulunan.
7) Nung ika ing makabasa, e mu ku sana pagsisti King laman ning sinulat ku a mengari nang palsimi A sikluban ning diwa ku ing pusu kung meduwagi At saka nala pengurus reng pangakung alang silbi.
8) Nganang Monico Mercado, sabla keti babo yatu Dakal bage manaliwa, a magpabayu keng tau Dapot nung mayap ka depat, at keti sulip lakwan mu E yan basta malumpawi o kalingwan ing lagyu mu.
