Kapampangan Library

English-Spanish-Pampango Dictionary
Nang: Luther Parker (1905)

Neng Lionel M. Dizon

Kng siwang a pilatan da
ding Ilukanu’t Tagalug
Karin ating linto Dayi
a anti mong mipabukud,
Iting labwad biltanga’na
ning misnang lwalas a ilug
At durungdunga’ na nitang
matas at ulilang bunduk,
Iti ya ing pinili rang
karinan at gewang bulud
Ding supling ning Madyapahit:
KAPAMPANGAN ngara kabud.

Ing Imperyo Madyapahit
inyang bayu ya misalbag
Dakal no ring tribung meko
at menintun bayung labwad,
Kareti kabilang na la
ding king Sumatra menibat
Lalam nang pamanimuna
nitang Prinsipe Balagtas
King siwang a mesaglawe
karin la miras-sinaglad
At ding karelang tuknangan
ketang pampang do telakad.

Deti ilang meging mula
at bini rang penibatan
Ding taung paliping Datu
at supling ding Raha’t Lakan,
King uli ning sipagan da,
apalto re ing karinan
A kamalig ning pagkabye
at sibul na ning pibandyan,
Iting lugal a mesabi
at ding Karin manuknangan
Para-para lang meyaus
king taguring KAPAMPANGAN.

Deti atin lang sariling
katutubu rang salita
A kasing lambing ning dalit
ding Nayadas karing sapa,
Ding lalaki bayani la
king arena na ning digma
At ing legwan ding babai,
inspirasyun ding makudta,
Matwa’t anak mepande la
king pandaya’ ning ganaka
Mepasbu la king tetagan,
mimoldi king bye dakila.

Note:
1. Ding apat a estropa karing kabilugan a walu.
2. Iti metung ya karing Honorable mention king GONZALO PUYATAT AWARDS. Ing poesya mipalimbag ya kng diaryung The Voice petsang Nubyembri 9-15, 1980.

Neng: Don Monico R. Mercado

Ing amanung siswan, kng metung a laji
Sadsad ya kamalan labis kng salapi
Ya ing kaladwa nang lipatlipat wari
Ibat karing nunu anga tawling sapni,
Kenu na tinipun, sibukan ugali,
Panyamba, panirug, lugud at taguri.

Ating lajing metung anti mong kaladwa,
Ing amanung siswan karetang anak na
Atin yang sisisnup lijim a ulaga,
Ati’ne mang yumung alang kasimpara,
Atin yapang diwang pakimut ubud na
Ning wagas dang pusu a kaya malsinta.

Buri mung abalu dam-dam na king salu,
Itang tagimpan nang sari kng kalagu,
Mapali nang buyut sisikat kng pusu,
Layun mal nang nais kng ukul bubuku?
Lawan mong amanung mengari mong gintu
Kng asbuk na lulwal, kareti e lapsu.

Note:
Deng bersadas babo sampol lang atlung estropa kareng kabilugang labing-adua.

-Sabing Castila’t Capampangan nang D. Gil Magat (1915)