Kapampangan Library

© neng Amado Nacu Gigante
Anunas A.C.

L ocal Urban Poor Affairs and Housing Office” ngana wari
O ing awsan dang LUPAHO king makuyad a taguri,
Detang “staff” o magobra, atyu karin makabili
Magsensus la king barangay ban akit do at apili,
Ding era bandi ing gabun ban karela nang asali
King saup na ning gubyernu lalu karing mangalati.

U ling nasa nang MAYOR ED PAM, kilub ning atlung banwa
Milako la o mabawas ding “squatter” a awsan da,
King kapagnasa’nang yan pinili neng manimuna
King tungkulan king LUPAHO I Mister Amos Rivera,
Inya ing utus ning Mayor bilisa’na itang obra
Meka’pito la pang bulan dakal na ing agawa ra.

P ablasang ding king LUPAHO magobra lang masalese
Metung lamu king pangimut saup-saup abe-abe,
Pupunta la king barangay karing tau maki’ugne
Programa nang Mayor Pamimtuan kanita palino re,
King gabun dang pituknangan o telarakan dang bale
King peka murang alaga iti king ban salwan dane.

A gyang pilan la pang bulan sambitlan kung liwas-liwas
Ing obrang karelang gewa king panaun a linabas,
Mumuna yang mika MOA ing purok “four” king Anunas
Purok unu, Purok dos… ing Lasones Malabanias,
Pampang “five B” at ing “four B” malapit na lang malutas
Kayabe ya itang gabun king gulut na ning bisitas.

H ousing o itang pabale, obra nang Amos Rivera
Inya detang maki’gabun ila ing pupuntala’na,
Pakisabyan nung malyari sana ipisali dana
Karetang “informal settler’s” ing gabun a tuknangan da,
Ding ting pusung maganaka kerakalan mebisa la
Inya ketang negosasayon daka’la ding makalinya.

O yan ing “AGYU TAMU VILLE” gabun bandi ring Narciso
Mebisa lang pisali re karing tinuknang a tao,
Pulung Bulu, Pandan, Cuayan, at Adrian king Balibgo
Makalinya lang pisabyan ban mirina’nong malino,
Kagalang-galang a mayor, kabang makaslag yang aldo
Sumaup la at magobra ding “STAFF” na ning LUPAHO.

 Enero 15, 2011

© Neng Jose M. Gallardo
c. 1944

Micacsing ing acbung qng pamibarilan
ding migatbang tapuc a mipapatayan —
libutad na nitang verdeng caparangan
a nung nu mitabnu ing aduang sicanana:
Ing sican ding taung mauang catimauan
laban caring dayung bisang manalipan.

Itang caparangan melasac mo uari
qng ugung na nitang acbung a mangatni’
Ding balas anti lang susulapo api
a mamius bubungil manintun asaui;
at babo na niti… ya ing mamayani
itang gulisac da ding caual ning laji.

Capupus ning bengi, camate ning pisac
ala na ing acbung, ala na‘ng gulisac’
Libutad marangle ding menga-pajamac
ila na‘ng mitagan a disa ‘ning abac:
bangque la‘t sugatan a minalduc salpac
at dadasayan da ing dayang dinanac.

Qng metung a suluc atin tamung aquit
matuang yang sugatan a magcacasaquit;
mangapangis-ngis ya at mangapaquibit
anti ya mo uaring managuantang saquit,
ding adua nang mata ta ‘lu macapiquit,
quiqueta ‘nong labi… saca mamalipit….

Pilan mung penandit milagat nong mata,
mibangun ya‘t saca tinalanga banua;
“Balen cu!” ngana ‘ning piping gulisac na:
“Caniama ‘ning mate qng casuyuan queca,
e bala ing maguing bangque cung marimla
mitimaua ya sa ing quecang bandera…!”

“At queca, babaing cabislac catauan,
cambe ding supling tang pacamal-camalan;
icong quecuyug cu at cacaluguran
querame‘t quesulu qng tula‘t cascupan;
ing camatayan cu e yu panamdaman
bista ma’t mate cung e tamu miquit man.

E yu calulungcut, e yu calulugma
ing camatayan cu nung masaquit man sa;
pulisan yong mata, palangian yu ing lua
saca co tumiman qng masolung tula,
uling ining cacung sasaguese daya
cayabe midampul qng mal tang bandila.

Qng camatayan cu ala cu mang lacuan
a ipamana cung salapi‘t pibandian;
ala…! nune mu pin ing cacung calucan
at ing bayad na ning cacung camatayan;
Oyan saganan ye‘t layung pacamalan
Cabutil yang guintu, guintung catimauan…!

Oyan qng aslagan lipat na ning biga
ati ’na mamunag ing simbul ning laya,
Oyan…! saganan yang palacpac at tula
ba ’neng patindagan ing mal tang bandila;
caibat nung ati ’ne… ganacan yu que sa
iqueng capatad yung qng dulum miragsa…!”

Tiniman ya queta… timan a macule
ing bayaning matua saca ne miyungle;
ing gaga ding ayug… ing buang ning marangle
melungcut anti mong metung a punebre,
uling ing matuang iquit tang mipase
pilan mung penandit… marimla neng bangque!

© John S. Manalili
Marsu 4, 2011

ing makiabe king ligligan ding poetang matenacan,
ibat iniang cayanacan maluát cu nang caburianan;
meragúl cung magmulala caring cacung daramdaman
a salitang atmu yumu, atmu lalam cabaldugan.
uling e ta mangalinguán, at pane tamung gagambul
uling e ta tamád-tamád, at ibibié ta ing ucul,
uling ing Amanung Sisuán e maliaring ipaisaul,
pasiglán ya ing Crissotan a kecatang pagmaragúl.
carug-carug cu man salu king burî cung ayarapán
e na cu man micacunú’t alug cu na mung makiagnán.
inia nung uculan yung magcasya na ing cagyuán,
palub ye ing cacung lagyù, ibugnús ye king labanán.
abut-abutang paninap, canita pa pagdulapán,
ing sicnangang mitatagan, gagagád cung buríng iyampáng.

Neng Jaime Gonzales Bacani
Beverly Boulevard, California
Octobre 2, 2010


asna canyaman tatangalan
at daramdaman king pilubluban
yng ating pamisanmetung ngan
anti mo ring palis tingting binigkisan

balang metung makabie yang sikanan
makaganap king nanu mang kulang
pane nong ysipan at gaganakan
ding aliwa, at sarili na kakalingwan

yng papuri caya e na panenayan
king nanu mang mayap a gagawan
babie na yng anggang casaupan
ban ding abe na miyangat la ngan

pamagparaya yng papakit na ngan
e ya padalus-dalus tatakbang
maingat ya ban ala yang adalpakan
ala yang buring apanasakitan

yng susubu na buri ne pang yduang
caretang mimigit pamangailangan
uling para caya mas manyaman
yng mamye kesa king ating tanggapan

king bie meging cayang capanwalan
nung nanu yng tenam a cayapan
mayap ya mu naman yng pupulan
anya lalapo ya yng cayang bangan

capilan man e ya mangalingwan
macabuklat ya pusu’t pilubluban
yng caparang tau e ne gugulutan
lalu na yng atiu king cacaluluan

ytang cayang lupa e ya saslam
pane yang manyaman a timan
deng tau matula reng pakyabayan
nucarin ya man, pane reng lalapitan

ustung ume reng pakisabyan
mas pilinan na yng makiramdam
caring sarya da o pamangaillangan
unahan na yng carelang capakanan

nung caya mikaatrasu la man
agad nang ybie yng capanupayan
e na lalawan yng carelang camalian
e no buring masira camarinayan

nung ating mabayat a pupusanan
e na apibatang lawan ytang casakitan
magkusa yang mabut casaupan
e na cailangan pang caya sabyan

ding dakal pane rang pagnasan
yng pamagkamal caring pibandian
king maski nanu mang paralan
buri da carela na ngan yng yaman

detang aliwa yng hilig da naman
mikaupaya at maging masikanan
pagnasan da maski na puersahan
ban miras king matas a cabilyan

datang yng panaun malakwan ngan
keti sulip yng anggang pekicuanan
yng ydala ning tau ketang cayang ayan
putung corona king lugud na’t cayapan

masaya yng bie king cayanakan
anti mong makirosas king pagkeran
balamu mo ala nang capupusan
ytang pyalung at sagakgakan

potang mikaedad ne yng caisipan
canita na pa mu ayntinding lubusan
yng layun ning bie at cayang cabaldugan
e yayagpang king pansariling caburyan

nung yng sarili ya cabud gaganakan
at ding aliwa e la melawe capakanan
nanung asahan king bie casumangiran
nung e mebyasa king pamiaduangan

© Tony Mallari Medina 5:52pm Oct 30

Keta king kekaming curu, yapin misan a dimdam cu,
Ing tau potang mate ya maco ne ing espiritu,
kawani ne at sulapo, Ing caladuang ausan tamu
Nung nucarin ya mipunta ‘lang makibalu nung ninu.

At cabang magingalu ya alang patna’ng pangadi ra,
Pa-Jesusan deng matimid bayu mapatlud inawa,
Ing sakit nang daramdaman mapupupus nang tagana,
Keti babo na ning yatu a migsilbing tucnangan na.

Potang datang na ing oras ala ne ing pangisnau,
Sabe ing gulisak at kiak ding malugud keyang tau,
Pisabian ding kamaganak nung nanu at makananu,
Ing pamaglame at tawu bayu libing cabu-santu.

Kareng kalupang Cristianu a Romanu Catolica,
Ing lugud ning panalala karetang memayapa na,
Misan mu man king pabanua karin mipunta ta sana
Ketang sementeriong banal nung nucarin kitkut ta la.

Ngeni aldo na ning Daun o Undas kareng aliwa,
Aldo yang espesyal karing kaluguran at kadaya,
Mikit-ikit, mipagcuentu, ampon misulu-sulu pa,
Ketang arap dang cutcutan detang mal tamung mewala.

Deta naman king pisamban deng sobre aplit lang mamye,
Palista do reng lagyu da ding minunang meangubie,
Atin pa ing sasabian da ing bilang ding lagyung ike,
E la lalagpus apulu, King balang sobre mung babie.

Ing balu cu deting lagyu ding meangubie palista,
deti iyabe la Ketang Santa Misa king parokia,
king pangadi na ning pari, ban keta detang caladua,
Maco la king purgatorio at mipunta na la banua.

E cu naman pu sasaklon detang alang kapanwalan,
King turu na ning pisamban a kakung akagisingan,
Gagalang ku la naman king darala dang katuliran,
keng kanakung kapanualan e la sa lalapastangan.

Quetang queyang labuad ning canacung Indu a pemana cacu
Qng aslag a binie na ning queyang sulu mata mibuclat cu
Yapin yng mumuna a cacung ginamit nigcas a amanu
Yang cacu pesusu ya murin ing memie sicanan canacu

Labuad Capampangan ya ing cacung labuad a cacung beitan
Gabun de reng pantas ya muring gabun da ring mangatenacan
Gabun ding maleguan gabun deya murin detang mangatapang
Yng Guinu tamung Dios keng Pampanga nacu dininan cabiasnan

Pauli na niti yng Capampangan a Amanu cung Sisuan
E cu picarine at pagmaragul cu panga-Capampangan
Yng Dios ampo’y Indu cacu pemana de ing Amanung Sisuan
Cacu yang Sicapan pagmasabalan ke at pacaLuguran

© Copyright
© Albin L. Buan
**** 07 September, 2011 ****