nang: PL Sergio Gramonte Calayag
Dening mikakaluguran iniang ilang abe-abe
Ila rening mipanagkat ketang dagat la maglakbe
Sinadya ngan ing kailangan, libutad dagat la mine
Masaya lang e mu nanu, keng karelang pamiyabe
Kalibutnan niting dagat, atin bagyu a dinatang
Sepulan ne iting bangka, misalbag ya king danuman
Kakawe alang patugut ban ing bie ra yang sagipan
Dapot meyala lang kalma, at disan ing kamatayan
Ating metung a miligtas, mipadpad ya ketang pulu
Mekatalan ketang dutung ketang dagat ya gagato
Kinabie ya ketang lugal menalakad bale Kubo
Kareng bunga ning tanaman, kakanan no aldo-aldo
Mangadi ya ining tau, mamaus ya king Dios lbpa
Gagawan ngan ing paralan, ban masagip iyang nasa
Linabas ya itang aldo alang sakorung bitasa
Masisira pilubluban, ing pagasa mawawala
Misan bengi a malalam, kubu na yang kesilaban
Metakmus ya ketang api, abu namu ing mitagan
At kanita ne sisisian, ing Dios lbpa tang miglalang
Bakit iyang pepabustang makalunus nang kabilian
Bakit aku’ng linawut mu, kareng kanakung pamilya?
Dela muku keting isla, ing kubu ku mesilab pa
Aku ini ing mamawus pakibatan muku sana
At saka ya mipatudtud, ketang gabun mikera ya
Iniang sumlag ne ing aldo, menibat ya king aslagan
Kamulagat da reng mata, metung bangka’ng apansingan
Linawe ya keng paligid dening tau yang lalawan
Iya ngeni ing sagipan, at duduang da ing kasaupan
Iya ngeni ing mengutang, bakit iyang apansingan
Ating aping milalablab, keng malawut abatiawan
Ating taung manenaya at maniawad yang kasaupan
Inia ikaming linapit, pekibat na ning kapitan
Siniklaud ya ining tau, sisisi ya keng depatan
Maniad tawad king Dios lbpa tiwala na migkulangan
Gagaga ya’t ngungulangul aduan ing kapatawaran
Ketang oras ning pagsubuk ing Guinung Dios yang gilutan
Keng bie na ning metung tau, madalas yang kakalinguan
Ing Dios lbpang Mayupaya potang atsu ing kanawan
At nung problema ing datang ing lagyu na yang panausan
Pasalamat at papuri, ‘ya sanang e kakalinguan
