KAPILAN MAN E MABURA

Posted on October 26, 2023 by inglibrarian

nang: PL Sergio Gramonte Calayag

Nung alang mangising keka, kabuklat ning kayabakan
At alang nang manenaya, pangaras na ning kabengian
Malaya mung agagawa, itang buri-buring gawan
Tune ini yang gagawan ban labanan kalungkutan
O ini yang katimauan kening bie mung dadalanan
Tune deni maliliari, ing katutuan yang tanggapan

Tutu na pin yang masakit, misane ka yang kayabe
Kabuklat na ning masala, iya ining mamantabe
Ketang apag ning amusal, yang kasulu mung parati
Mipaglambis, mipanyubu, ka-istoria keni nang bie
Iya ining panintunan panga-uli kening bale
Iyang agad mung kukutang, ban ing uma kaya ibie

Ngeni keting kekang siping, iya ining panintunan
Ing masayang mengalabas, makatatak keng isipan
Keting isip e mamako, makabakas keang leguan
Maili-maili pa neng misan, keng masayang adalanan
Dapot lungkut yang lumukub ketang metung a katutuan
Tune ini e magbalik, mibalik ne king Miglalang

Inia madalas gagawan, ban ing isip yang malibang
Nung nanu ngan ing gagawan ban pagal ya ing katawan
Ketang pagal panandaman matudtud ya ing katawan
Akalinguan itang sinta, iyang tutung pakamalan
Dapot potang siro’ng aldo, pasibayu yang ganakan
Pablasang keni nang bieng mal, yumung lugud e kinawang

Keting metung a katutuan, didinan meng katuliran
Ining keka nang sarili, iya tutung titimbangan
Gawan mu na’ng dapat gawan, ban milako keng isipan
Dapot ing mayumung lugud keting pusung makalulan
Agyang nanu pa ing gawan, kening tune pakamalan
Kapilan man e mabura, ing lugud mung panandaman

Salamat kang Benjamin G. Sangalang

Posted in Bie, PL Sergio Gramonte Calayag, Poesia, Poeta Laureado | Leave a comment

“kapagsubukan”

Posted on October 26, 2023 by inglibrarian

maniaman ing angin a sangap-sangapan
lakuas neng abe mo retang pakamalan,
pablasang aliwa ing tulang tatakman,
aggiang pang neng misan saskup ing kabiayan.
uling e keng kaskup o keng lualas ning bie
karin asusukad ing ligayang tune,
nun’e neng deng mal mu ila reng kayabe
at ilang kasulung lugud a dalise.
dapot makanian man anting manaliguat,
kabud atin aldo daratang mabayat,
subuknan na angga pamagin nang tapat
ning kapanaligan keng nu ing bie ibat,
itang neng deng taung matimbang keng pusu
ring muli nang bakas nitang napun namu.

10/25/23 //12:20
kaibat megan biruyang sagin

***yampang ke keng kakaluguran a poeta liriku Sherwin Dizon

Posted in Capampangan Shakespeare, Mala-Sonetu, Parikil, PL Tuazon Sabandal, Poesia | Leave a comment

“pamanalig”

Posted on October 26, 2023 by inglibrarian

atin pamitagun bisa tang mangutang
pauli ning bage e panayan datang,
at ing paniatang na mayan nong asintang
ding kekatang pusu at lakuang malintuang.
king e pangasaddia, neng misan keng bayat
malilingo tamu at maibug mapse suat,
dapot makanian man, manalig tang sukat
tapat Ya, balu Na ing mayap at dapat.
king uli na niti, nanu man ing ume,
o datang, o mako keng kekatamung bie,
manalig ta Keyang mayupayang tune,
ikakayap tamu iting sablang bage.
inia ing datang man, mamitbit paliasa
o tula darala, salamat keng sabla.

10/25/23 //1920
kaibat megtako torta

Posted in Bie, Capampangan Shakespeare, PL Tuazon Sabandal | Leave a comment

DUMAYU KA

Posted on October 19, 2023 by inglibrarian

nang: PL Sergio Gramonte Calayag

Dumayu ka kareng bageng makasira keng kaladua
Makasira pangatau, alang mayap ibie keka
Ban akamtan keni nang bie, itang bie mung maligaya
Kareni nang makasira, keng kasiran dumayu ka

Dumayu ka kareng tau, pilit dakang panyiran
Ing nasa ra abitan ka papunta ka king kasiran
Alang mayap ibie keka, amanu dang kalaraman
E mo dapat pagtiwalan, dening tau a makanian

Dumayu ka at lumawut, kareng gulung alang kuenta
E mayawus mataloti, nung lilisya ka keng gerra
Ing tepangan na ning tau, kening pusu na dadala
Mamarap ya keng katutuan, yumung lugud ya ing dala

Lumawut ka kareng tau ulaga mu e lalawan
Nanu ya mang gewang mayap, ika ining paimburisan
Masayang yang kekang oras at panaun a dadalan
Pabustan mung ika’ng sumlag kekang gawang kabanalan

Kabud deni deng alisyan, kening bie mung pakamalan
Maging mayap ing sarili, sasaya ka pakirandam
Alang bayat a dadalan, mikapmuan kang kaligayan
Lalawut ka keng kasiran, masala ing pupuntalan

Salamat kang Miss Mabel Icmat Sibal

Posted in Bie, PL Sergio Gramonte Calayag, Poesia, Poeta Laureado | Leave a comment

Ortelanung Poetisa

Posted on October 19, 2023 by inglibrarian


https://www.facebook.com/reel/1087155425903937

Posted in Bie, Poetisa Patria Bondoc David, Video | Leave a comment

MACUYAD YÂ ING BIE

Posted on October 19, 2023 by inglibrarian

21 February 2016
Sucad: (18 silaba, 6-6-6 sesura) = 6 a telatag, 7 a estropa
Ortograpiya: C&K = Ca-Ke-Ki-Co-Cu + W & Y
Persona: Cadua (2nd person)
Tema: Ing Sucad at Ing Pecamatas Nang Batas Ning Bie – Ing
Casuyuan Caring Parang –Tau

1.
Macuyád yamû ing / papil múng ganapan / king dulá ring bigû,
anti câng artistang / king gulut ning telon / manáyâng matuldû,
cayarî múng bibû / ing dakeng ibie ning / maulá múng lagiû,
ding menálbeng maû / muli no ngan caring / bale ra pa’inturû;
canita, ing samyû / acalinguan dáná, / antimong ala mú…
macanian yâ ing bie, / anti yâ’ng comediang / mayárî king birû.

2.
Macuyád yá ing bié, / e re casing tibé / ring batung mabibié,
inya ingatan me’t / luguran dalisé / ing saglit nang paké,
ban king sagulî nang / panalto busal da / ring tucsung gigiré,
abitasá mu ing / ablas nang lilibé / ning ma’iling tagumpé…
potang ing isip múng / magpapatubebé / at bantulut lagé,
magpa’itas neng anti / ring batuing tiwasé / king banuang maculé.

3.
Macuyád yá ing bié, / sesen me at dinan / matas a ulagá,
uling migit yá king / gintu ing sangca’ nâ / ning migcalub kecá
inya misulat yá / king libru ing depat / ning taú Samariá,
a bibie pawagang… / king gilid ning dalan / atin cang capará…,
ban nung lingapan me / ing pasbul a mascup / kecá míbuclât yá
pablasang iti yá / ing cabud nâng dálán / ning pamanlub banuá.

4.
Makuyád yá ing bié / e me sasayangan / king purû pangadî,
uling alang bageng / migit pa king dápát / ing maramdam matnî.
Anggiang ausan mo pa / ding santú at santá / at ding anggang parî,
nung ala cang gewang / mangayap a dapat / carelang duwagî,
ala yâng pagmulan / ing pagmarali mung / maca-Dios a gawî,
a ibat mu caring / meté rang amanu / ding sutil mung labî.

5.
Mácuyád yá ing bié, / agad lang malagas / ding kecang bilungan,
anti câ’ng sampagang / mamirapal pakit / ing maslag múng leguan,
ngeni, mabanglu cáng / e rá patugutan / pangalimgimanan,
bucas… akit múlá / ring kecang petulá / malalanat no ngan,
ba’nong muntang miuman / king dane nung nu ra / ca tune lelangan,
king gabun cá ibat, / carin cá mílángan, / umeng mitambunan.

6.
Dapot muli yá man / king gabun ing aske / at carin malaso
atin cáng cayabeng / king aun e tuki, / king yátú e maco;
deti ring bandi múng / capilan man kecá / e rá apanaco,
uling ding depát mú / mengasulat la ngan / ketang libru babo
ban ilang dasa’ ná / nitang caladua múng / pane macabatio
king pamisadya ná / king aldo náng dalo / nitang mapanaco.

7.
Nung inya ing dápât / múng patandanan / at e cacalinguan
atin yáng pigmulan / ing mácuyád múng bieng / ating cayangganan;
inya sâ cabang ing / aldo mú saslag yá / king kecang arapan,
pacapakicuanan / mu’t samantalanan / ing gáwâng cayápan,
uling ding dápát a / minie casnawan king / ’párá mung lelangan
ila mû cabud ding / bacas mung malacuan / king yatung ticnangan.

Yng Bantulut A Siuala
San Simon, Pampanga
Palmdale, California

Posted in Bie, PL Apo Gonzales, Poesia, Tau | Leave a comment

e ne 29

Posted on October 19, 2023 by inglibrarian

nung ibulus meng anti mong alak
ing pusu mu kening kakung saru,
‘bulus mung laganas angga palak,
ala kang tatagan aggiang nanu.
deng kamaganak mu, reng saru ra,
laganasan mu lang bulusanan,
potang kaibat mung agawa ita,
bulus meng e bawas kaku naman.
at milapat kung takap kanini
king durungdungan ning banuang asul,
at kintalanan keng selyu ini
karing amanung e biasang murul:
e angga potang e na bie ing bie,
uling tutu king bie buring ibie.

10’18/23 //21:21
kabang painawa kaibat minapun

***uyab ne ning “soneto 9” ning Lorung Malabit

Posted in PL Tuazon Sabandal, Poesia, Sonetu | Leave a comment

170

Posted on October 19, 2023 by inglibrarian

Bigla mikit katang e siseryan
Malwat na ing tauli tang pamikit
Parewung misdan nung nanung sabyan
Alang luwal keng asbuk nan’ mang pilit.
Tiniman ka’t yaku anti murin
Mipaglalawe la mu ring mata
Ing pangabigla kaybat nang mimin
Minalili ing pangadismaya.
Pisulu teng misan ing panaun
Libutad ning kasunduwang matibe
Misumpanang lumbat anggang aun
Kamatayan man e na aungle.
— Kelingwan tang ating kesumpanan
— Minunang kekatang ketipanan.

Posted in Poesia, Poeta Lakandiwa, Sonetu | Leave a comment

Simpling Lutu

Posted on October 17, 2023 by inglibrarian


https://www.facebook.com/reel/255563737011288

Posted in Pamangan, Poetisa Patria Bondoc David | Leave a comment

Meraig

Posted on October 17, 2023 by inglibrarian

10-15-23
Sonetu

I.
Sinese mu ing muâ king salû mú
inya ing lawe mu melabug yá
kelingwan mu ing dápát a ustú
a menakap karing kekang matá.

II.
Keka ing ketasan yang memale
a miglisya keka king matulid
ing ugaling maginu at pante
tenge na ning angin a minyaplid.

III.
Ing diwâ na kasi ning alipan
iyang ketang tronu mu linukluk
nia ing mayap bigla nang gilutan
ning meraig mung pamakipamuk.

IV.
O! lelangan mabilis mangainâ
kapilan ka pa kaya timawâ?

Yng Bantulut A Siualâ
San Simon

“Inia tau cung tutung macalunus! Ninu caya ing mangabus canacu king catauan a ining atiu king upaya na ning camatayan?” Romans 7:24 Ing Bayung Bibliang Capampangan.

Posted in PL Apo Gonzales, Poesia, Sonetu | Leave a comment