‘Ding Canuanan’

Posted on November 2, 2023 by inglibrarian

Busal ding dacal a tau ,meco minuquiat ia bunduc
Ing linaut ia carela ,banting acuang macalucluc
Anti ing tiru carela, camtan ,quing labuad ding mamu lub
Mipamatulan quing Dios,nuan ding daralan lungcut

Pag arian na ning Dios,macaquilala quing calucan
Nuan la ring mapagmalunus,
Dios lunusan na la naman
Caring malinis a pusu,akit de ing Dios a nuan
Maiaus lang anac ning Dios ,
mangibuklud capaiapan

Nuan la dening tutupad alang aliwang pigampa
At ding dadalan pangalupig pamanupad quing salita
Nuan caiung alimuran da at miyaliwang pamanyira
Ing caablasan quing banua , tumula caiu’t magsaya

::::::::::::::::::::::::::::::::::::::::::::::::
‘ atin sasabing pamaniapulung ia quetang turu nang Jesus king metung pamicatagun ; atin naman sasabing pami sucung sucung de ring turu a inapag nang Jesus caring miaialiuang pamipulung . Atin capaliarian quing i mateo quinua ne ing metung a sermon saca ne penagdagan caring aliuang macaugne nang turu ning Guinu.Ing picuanan nang Mateo gagamit iang metung a caaiusan balamu atin tutuquian a discursu.
Ing macarios keng salitang griego mangalbaldugan yang ‘ nuan’ , ‘masaya’ , mapalad

‘Ding Canuanan’
Nang Manolo dela Pena

Posted in Biblia, Poesia, Poeta Manolo dela Pena | Leave a comment

ING CACUNG MUMUNANG SINTA

Posted on November 2, 2023 by inglibrarian

13 Pebrero 2016 – 8:10 A.M.
Ortograpiya: C& K = Ca Ke-Ki-Co-Cu

1.
Aminan cu ing megi cung / sáláwáyán king pácámál
uling ticwil ke’ing mumunang / sintang kilub cu mikintal,
inyang ménákit cung bayû / a piragli cung kecásál,
gillutan keng tibubus ing / canacu linugud sácdál.

2.
King yumu da ring salitang / canacu na pengamanú
ning bayung mutyang king bie cú / minye sáyâng e mu nanú;
nota la waring cacacting / king melibang cung animú,
balacu acalingwan ke / itang minuna king bie cú.

3.
King mabilis dang panlacad / ding bitis na ning panaun
agunam cong pibalican / ding penandit a milulun,
pentun cu lang mitmung sabic / detang labi nang miticum
nitang mumuna cung sintang / licwan cu namû king napun.

4.
Macanian keng pigtapat ing / canacung lugud a tune
king cacasi cung cayabe / king altar a migpatibe,
itang mumuna cung sintang / mamucud mu king cacung bie
a e cu pala malyaring / calingwan nâ’t ipaglibe.

5.
Mamu na namang tinggap ning / ketali cu ing pigtapat
“Sumulung ca”, ngana cacu, / “nung ken maco ing pagsalbat;
balican me ing sinta mung / liguran mu bat king ibat
e ke ipilit ing cacu / nung iti keca mie bayat”.

6.
Ing Amanung Capampangan / ing cacung mumunang sintá
a e na alibayan ning / Bataan at Americá.
Ing Tagalug, anggiang iti’ing / sabi ning mal cung asawá,
e ne malyaring tacpan ing / Sinusuan cung Sabing Maná.

Yng Bantulut A Siuala
San Simon, Pampanga
Palmdale, California

Posted in Amanung Sisuan, PL Apo Gonzales, Poesia | Leave a comment

179

Posted on November 2, 2023 by inglibrarian

Memun na kang e ka man binulad
Ni ha ni ho keng tarhetang likwan
Malwat katang e midaup-palad
Keng lako mu, e na kapilanman.
Aganaka ku ing malambat na
Anak-anak la pa ika’t aku
Magaral, mamyalung, sulut kata
Penabilin nang Ima mu kaku.
Kaybat tang megaral mikawani
Keng kural na ning bie mekabulus
Megobra, linawut, e miyuli
Talepanu man e mipanawus.
— Pangunakan, nukaman mikarin
— Sopan Na ka ning Diyos, antimurin.

Posted in Poesia, Poeta Lakandiwa, Sonetu | Leave a comment

Pamamaduas

Posted on November 2, 2023 by inglibrarian


https://www.facebook.com/reel/718249813029320

Posted in Poetisa Patria Bondoc David, Video | Leave a comment

” CABUD LUNAS “

Posted on November 2, 2023 by inglibrarian

(O’ Malinong Danum)

*
Tanda cu pa ing canita, mapa-angga man ning ngeni
e ca malaguang calinguan, uling qng leguan mung bandi.
*
lng taimic mung cayarian, maralas yang mangayaswal
pauli ring mangabiayan, caring yaman mung kikiwal.

**
Anya ing tula ‘pon ayli o culasyong e tutucnang
ica’ing pane babalican, detang mapiang maqinabang.
**
Caring quecang talatuqi, e patugut angyang bengi
lca’ing carelang sandalan, deting malucang pengari.

***
Dacal banuang milabasan, dacal lang qinabsing atyan
potang ing piesta daratang, ica’ing pilmi dang pulayan

***
Ban ding debotu nang daywan, patrun ning kekang balayan
ding biyaya mung kasebian, metung karelang pagsaryan.

****
Bayu misara ing clasi, ica’ing agad dang isipan
ban minawa at mipasno, cayanacan malisangan

****
Uling icang capasnawan, ning catawan mipapawas
O’ malinong cailugan, ing dimla mu’ing cabud lunas.

31 Octubre 2014
(-neng WakaOjie-)

Posted in Poesia, Poeta Bagse Ning Kailugan, Poeta WakaOjie M. Pena | Leave a comment

METE SIBUNG KETANG SALE

Posted on November 2, 2023 by inglibrarian

nang: PL Sergio Gramonte Calayag

Meyakit la dening sibung ila rening mengamate
Babo na nitang pun dutung atsu kilub nitang sale
Kabang ing karelang indu luluyun ya king marangle
Manintun yang pamangan da, ban karela yang panyese
Dapot ini e dinatang, mesintang ya ing kayang bie
Karetang mamaril ayup, atsu Karin king marangle

Makanian rin keni nang bie, potang ika’ng makipate
Mamamate ing ugnayan at ing lugud a dalise
Pati miembru ning pamilya ila rening miyayabe
Pati na ing kapayayapan iya ining midadame
At ing kamua parang tau kening pusu yang mamale
Karatunan keng sarili, iya mu ring mamamate

Angga’t maliari kening bie, e ka maging kasangkanan
Kalungkutan panandaman ketang sakit dang delanan
Na ika ing mekamate, keng pagasang panenayan
Datang ya iti nang aldo, Ika pa’ng karelang sisian
Karga-karga ketang pago, tutu karing kabayatnan
Kaligayan mababating keting bie mung pakamalan

Deng amanung sasambitlan anting taram ning espada
Deng amanung mangataram, ketang pusu maniugat ya
Kabud ini yang mesugat, ing tiwala milako na
Pete mu ne ing tiwala, mikilamat pang dadala
‘nia amanung ating lugud, potang ilang iyapse na
Pablasang ini nang lugud maniaman yang kayang bunga

Ika’ng mamie inspirasyun ipakit mu ketang gawa
Lalung-lalu keng amanu potang ila reng pawaga
E pabustan maging sangkan, ing pagasa iyang matda
Paninapan kening bie da, iya ini ing mawala
Kasalanan yang dadalan, kabud ini yang megawa
Inia mingat keni nang bie maging mayap alimbawa

Posted in Bie, PL Sergio Gramonte Calayag, Poesia, Poeta Laureado | Leave a comment

OT MAKANANU MUNG BALU

Posted on October 26, 2023 by inglibrarian

15 Junyo 2016

1.
Sagiwa pa ing milyari inyang king bie ku datang ka
Ketang muna ra kang akit diosa ka waring bat banwa
Makatiman meng kitang ing kakung lagiu nung nanu ya
Misda’naku mu’t mepipi king lawe ding kekang mata.

2.
Kanita ne megumpisang migbayu ing kulang kung bie
Ding balang aldo daratang miustu no’t mikakule
Ing king siping ku atiu ka, mebie kung mitmung tiwase
Minalale ing padurut, mesala ngan at mibage.

3.
Makanyan kung akukutang ot makananu mung balu
A king penandit a ita, mangailangan kung kasuyu
Uling kilub na ning pusu ating lukib a mebuu
A king ustung kaorasan dinatang ka at mengatmu.

4
E ku napin kalingwan pa inyang pepaslag me’ing aldo
King bie kung pane nang bengi, ‘la nang salang bisang matyo
Leko mu ing kabalisan at ing takut a magbabo
Peparatang mu ing salang malambat nang e na lalto.

5
Mekad bandi ing talagang keka buri kung sambitlan
E aldoldo ating diosang babasle king daralanan
Kalupa mu kening bie kung menatsu king kakulangan
E sapat ing sabian ku mung, labis dakang kaluguran.

Yng Bantulut A Siuala
San Simon

Posted in Lugud, PL Apo Gonzales, Poesia, Video | Leave a comment

Ninu Ing Sumabi?

Posted on October 26, 2023 by inglibrarian

Lorung Malabit
Timauang Taladtad

*
Sikan pa sana ing uran
dalusung ku at magbasa
nung mabingbing ku king lua ning banua
ninung manakit king kakung lua?

**
Sikan pa sana ing duldul
ban malumud ngan ing kutug
gumaga ku man masikan
ninung damdam karing siguk?

***
Ibat aniang ginulut ka ban e na magbalik
ala nang ulaga ing sabla
meputla ne kulul ing pinenari
ding ayup e no magtumayla.

****
Mangildap pa sanang mangildap
at akua ku ing mituran
nung serya ku man ing mate
ninung sumabing serya ku yan?

17 Nobiembre 2016
Munoz, Quezon City

Posted in PL Rodel E. Gozum, Poesia, Poeta Laureado, Timawa | Leave a comment

e ne 37

Posted on October 26, 2023 by inglibrarian

makapagmulala ya ing tau
a pakilalang matas yang dili
kareng lelangan ning Apung Guinu
a binili Na king yatung ini:
tagana lang lalang king wangis Na,
dapot penualan de ing ubingan
‘nia reng dakal ing akawangis da
ing salapang dila king tanaman.
itang kasakiman, dawak, sangil
iyang karing pusu ing memale,
ing kayap, ugali yang e tigkil
uling kababan ya buring pane.
— mawa lang daya uli ning tako
— kabang kunuaring mamaus Babo.

10/25/23 //07:31
kaibat megkomentu keng paskil nang kong Reyjay

Posted in Capampangan Shakespeare, PL Tuazon Sabandal, Poesia, Sonetu, Tau | Leave a comment

“ING SINTA KING TAU”

Posted on October 26, 2023 by inglibrarian

(mala-sonetu), neng ORLY MANALO DIZON
Orthograpiang: C-K (ca,ke,ki,co,cu); Sucad: 6/6, labing aduang silaba; July 11, 2016; 03:40 hours.

1
ING SINTA KING TAU / nanu ya pauagâ?
nang misteryung yatad / ing cutang ding maldâ?
uling e mu malit / datang nia mung biglâ
e iti alisyan / king bie mitatacdâ.

2
Mu pin ‘tin mapilan / a pusung magmalun
ulina ning sintang / bisbas ning panaun,
a dapat arapan / turing ya’ting amun
angga na king iti / acua itang layun.

3
Mengari na mu nung / ‘ting capagsubucan
e dapat atrasan / lalu yang labanan,
ing pusu buclat ya / ketang capalsintan
anggang dasnan ya ing / layun a tagimpan.

4
Mayumu yang timan / ning lugud ibabie
capayapan ne man / king pusu mamale.

Oct. 25, 2023; DIZLAG Farm & Resort; Lara, City of Sn. Fernando (Pamp).

Posted in Mala-Sonetu, Palsinta, PL Orly M Dizon, Poesia, Poeta Laureado | Leave a comment