“ing kakung biyulin”

Posted on September 20, 2023 by inglibrarian

ing kakung biyulin, apat yamu kuerdas,
metung a mamaba, metung namang matas,
adduang kasantingan ing karelang katas,
dapot dening apat atin la pang itas.
dipendi keng tukup, mitatas la nota,
dipendi keng sukung ing leguan ning kanta,
maliari kung tigtig malagung sonata,
o malumbe para keng pusung magdusa.
karing kuerdas niti alang alang leguan,
nune keng titigtig, deni abe la ngan;
atiu keng gamat ku ing maging sintingan
keng kanta o tonung kakung titigtigan,
at karening apat alang e matagkil
neng titigtig dalit a keng Guinu rikil.

09/09/23 //07:44
bayu saling pagbulanglang

Posted in Capampangan Shakespeare, Mala-Sonetu, PL Tuazon Sabandal, Poesia | Leave a comment

Pata – Lutung Toyu

Posted on September 19, 2023 by inglibrarian

https://www.facebook.com/reel/356196033400593

Posted in Pamangan, Poetisa Patria Bondoc David, Video | Leave a comment

POETA ALVIN IGNACIO
(a.k.a Bertung lsponga)

Posted on September 19, 2023 by inglibrarian

nang: PL Sergio Gramonte Calayag

Babalita da kanaku, dening taung mamalita
Kandidatung yang laureado poeta Bertong lsponga
Kabud kaku iyang miras, ing masanting a balita
Tutung e naku mengasdan, tutung e ku mengabigla

Akilala ke l Alvin, keng kapampangan tiuntiunan
Ing masipag yang tatagun, pamagaral kapampangan
Masapsap yang makabalu kareni nang kawatasan
Akakit kayang kagiwan, at panugaling kababan

Akayabe kening obra, iyang tutu ing mabeluan
Masigasig manyaliksik, kareng obra a miyatang
Tatanggapan detang aral, potang iyang tuturuanan
Anting metung a magaral, makabuklat kaisipan

Matapang yang tatalakad, gagale yang kawatasan
Akakit ku ing talentu, keng amanu nang sasabian
King Baculud kayang tibuan, at Pampanga’ng lalawigan
Papalkas na ing kagiwan, ban amanu yang gambulan

Sinulat yang metung libru, bilang metung talasulat
Kawatasanng mayulaga ilang laman nitang aklat
Ing librung “Dimut kung daun ” kabiasnan na yang pepalkas
Duduku ke ing buntuk ku, keng galing nang apamalas

Poeta Alvin lgnacio iya ing tune nang lagyu
Tubu ya Balen Baculud, Kabalantian keang baryu
Pauli na nitang lahar, king Magalang la dinayu
Atupan ne ining Nica meging kabangal neng pusu

Posted in Parikil, PL Sergio Gramonte Calayag, Poesia, Uncategorized | Leave a comment

YUMUNG LUGUD PALAGANAP

Posted on September 19, 2023 by inglibrarian

nang: PL Sergio Gramonte Calayag

Kagising mu neng maranun gawan mu na itang mayap
Nung nanu man ing parasan, nung nanu man ing pigagap
Kanita e ya masayang , yumung lugud palaganap
Pablasang ing bie ning tau, iyang misna king kakuyad

Nung atin mang e ayabut, kareng buring pakiabutan
Deng paninap keni nang bie, angga na keng paninapan,
O taung e apatuki, keng mayap mung pararasan
Deti e la maging tutu agyang nanu pa ing gawan.

Sakali man e me akua, itang buring panikuanan
E asali itang buri, iyang buri mu sang saluan
Itang promosyon mung buri, tune e me rin akamtan
Tandanan mu keng sarili ika’ng muling alang dalan

Balang tau ating premyu, kening bie na yang dadalan
Nung atin kapanandaman, at mabie kang tatangalan
Kakaluluan dadalanan, atin bale kekang ulian
Agyang ika ing kalulu, dapot atin kang pamangan.

Masaya ka kareng grasya aldo-aldong tatanggapan
Lalaganap itang sala, kabuklat ning kayabakan,
E mamili ninu man ya, tutung iya ing mirasan
Inia ibie’ng pasalamat king Dios lbpa tang miglalang

Kareni nang mesambitla, alang reklamung damdaman
Uling sabla mipagkalam, digpa la ngan keng arapan
Uling kaluguran na ka ning Dios lbpa tang miglalang
Egana-gana binie na, detang sabla mung kailangan.

Salamat kang Sir Robby P Tantingco ning HAU-CKS

Posted in Bie, PL Sergio Gramonte Calayag, Poesia, Poeta Laureado | Leave a comment

IYANG KAKU

Posted on September 19, 2023 by inglibrarian

Nang Maria Teresa Magtuloy-Evangelista

Ing tudtud masakit, bengi man tahimik,
Gamat mu’ing panidlip, buntuk ku itapik,
Marap ka’t lumapit, manumang manaplit,
Bante mung e mainip, yang kakung kaidlip.

Kabukasan mampit, mayaslag yang pakit,
Salabat kung sipsip, ‘ tin angeng penyikdik,
Kape mung mabagsik, banglu na mipayid,
Kambe’ing radyung dalit’ balitang katayid.

Patingapung obra, e makabusangit,
Uling ikang mobra, karetang masakit,
Agyu mung apisik, nega kung mamuisit,
Kekang apibalik, pos’tibung panakit.

Angin maka-yampit, silu man mangalait,
Krus agyung abitbit, suksuk e maniaklit,
Nu man mipasulip, ing ganap mayakit,
Uling kekang pakit, kawalan misulit.

Ding paninap, tilip, ela kabud sulpit,
Uling ‘tang palipit, takdeng magkasakit,
Uling ‘tang palatik, ‘tang lalbug kung pilit,
Tiwala mung tiguik— yang kaku maniagip.

Sipagan mung maplit, danup e milapit,
‘Malan mung sasakbit, tang alang kalipit,
Mamaldan kang malit, mangampit kang ngitngit,
Responsabling akit, Lugud mung makaigit!

‘Yang asanayan ku, Lugud mung papakit,
‘Yang Bie ku, ‘yang kaku! Eka sa dar’lakit!

Posted in Bie, PL Marites M. Evangelista, Poesia, Poeta Laureado | Leave a comment

SINTA NA NING PUSU

Posted on September 19, 2023 by inglibrarian 
      Nang Melanie Naguit

Likuan ke’ng balen ku metung yang amanu
Ing gagamitan na ketang pamagbersu
Itang pakiramdam ning balang memaryu
Atna king kasaya yagkas da pareu!

Manalbe sarsuela, crisotan king radyu
Magdala lang tula, pusu magkuswelu
Mangatuang poeta beluan makayatu
Pati mangarana, yaman ning balen ku!

N’yang kakung belikan amanung likuan ku
Pusu ku kikyak ya aliwa’yng dimdam ku
Nukarin ya minta amanung balu ku
E ke daramdaman karening disan ku!

Oita kinalkal ke king balun malalam
Nung nukarin igse amanung pibandian
Kabud apalto ke memagkanta la ngan
Amanung amana dapat yang gamitan!

Amanung marangal, amanung masampat
Kabang iapse me banglu na kakalat!
Siwala na’t lagu na luguran yang tapat
Sinta na ning pusu kailangan iangat!!!

Posted in Amanung Sisuan, Poesia, Poetisa Melanie Cunanan Naguit | Leave a comment

ING KABIASNAN A PEPARAM

Posted on September 18, 2023 by inglibrarian

nang: PL Sergio Gramonte Calayag

Ing kabiasnan yang magbabo kening kayang kaisipan
Sabla-sabla balu na ngan, ing talinu mamalasan
Inia misan e tatanggap, kareng mayap kausukan
Manatili ing katasan ketang kayang pilubluban

Manibat iniang yang anak akit kaya ing talinu
Mumuna ya kareng klasi, papalkas na ing talentu
Mapamasa, manyaliksik karening dakal a libru
Papalub kening isipan, dening dakal argumentu

Keng umpukan yang damdaman neng manapse yang amanu
Akit kaya ing gelingan, at lalkas ya ing talino
Kareng paksang pisasabian, makananu nong palino
Mawili ka damdam kaya, kabiasnan na ‘yang akit mu

Dapot ini nang kabiasnan bibitbitan keng sarili
Iyang megi mu ring lasun, kening pakamalan nang bie
E ne biasang makirandam, ing katutuan pisawili
Akalinguan ing Dios lbpa, itang kaya mikibandi

Linabas ya ing panaun, king katasan susulapo
Anting ayup a agila, babo biga magpatilo
Bibitbitan nang talino anting aping maglipato
Kabud ini iyang mitda, ing dalumdum yang akit mo

Nanu ya mo ing kabiasnan?, Nanu’ng kayang kabaldugan?
Keng sarili bibitbitan, e ne balu ing parasan
Nung e magamit keng mayap, nanung bunga a pupulan?
Ining talentung peparam, ulaga na mawala ngan

September 7, 2023

Posted in Kabiasnan, PL Sergio Gramonte Calayag, Poesia, Poeta Laureado | Leave a comment

“manabuang”

Posted on September 18, 2023 by inglibrarian

mananaimik ya nabengi ing bulan,
asne king katunud kabang timan-timan
kambe ra reng batuing kindat-kindat naman,
dapot ing tunud da meyabuang mung misan.
makananu kase nung makananu ku
a alub a alang maging inge kaku
iyang keka namang inge todu-todu
a alang aguanta keng meging inge mu.
kilubutan mu ku, at dekap lingapngap,
menusig ing kalma ban iti arakap;
minablas ku keka at ing keka dekap,
at e ku bitasang binulus karakap.
e raka alingad, kainge mu pala
ing kekang lingapngap, istung merakap na.

09/06/23 //14:24
kaibat ning oras ning obra

Posted in Babai, Capampangan Shakespeare, Mala-Sonetu, PL Tuazon Sabandal, Poesia, saddia3x | Leave a comment

IKANG PEKASANGKAN

Posted on September 7, 2023 by inglibrarian

(Linikas nening talabagse)

O bakit mo, neng ikang akakit ku
Kakabag ya ing kakung pusu
Neng asilawan ku, saring leguan mu
E mipaydatun ing kakung pusu.

Neng atyu ka, e ku balu nu’ku magbili
Uling kabud king isip ku, ika mung parati
Sibukan ku naman, ba’ rakang akalingwan
Dapot angga ngeni, e ku agyung gawan.

(Koro)
Uling ika ing laman ning pusu ku’t isipan
Kilub ning aldo’t bengi, ikang pekasangkan
E ku mipatudtud, king ka-iisip keka
Uling ika sinta, ikang tune sangkan.

Instrumental

Makananu kaya.. sabian ku keka ing tutu
Ika ing kikirut na’ning pusu ku
Lugud kung panandaman, ini para kekamu
Manalig ka sinta, e nayni magbayu.

(Pasibayu Koro:)

interlude

(Koro makaladwa)

Ika ing laman…

(Panyara)
Uling ika sinta, ikang kabud..kung.. Liguraaan

Posted in Kanta, Palsinta, Poeta Bagse Ning Kailugan | Leave a comment

Aldo Ning Amanung Sisuan Program 2023

Posted on September 6, 2023 by inglibrarian

September 13, 2023, 2:00PM

The Center for
Kapampangan Studies
Holy Angel University

  1. Himno Ning Kapampangan Choral Singing Contest
  2. Ligligan Crissotan
  3. Crowning of new Poet Laureate

Academic Hall
Saint Joseph Building
Holy Angel University

Posted in Amanung Sisuan, Istoria | Leave a comment