23 Nobiembre 2015 – 4:12 P.M.
Sukad: 16 a silaba, 8-8 sesura, 12 telatag, 4 a estropa
Ortograpia: C-K o Ca-Ke-Ki-Co-Cu
1.
Potang king aun cung aian ume nacung magpa’inauá
ban carin cu’no agtalan ding bulung ning pamanaiá,
sinta, e mu sà isipan ing lugud cu mauala ná,
cayabe dá ring casuiuang migpatibe king lugud tá;
uling deti dala culá king alapap ning alalá,
ban keta nu’cu man muntá king pusu cu mamale cá;
antimurin maging metung cáng masamiung sampaguitá,
munie banglu king canacung pagkeran a misnang dimlá;
at ing caladuá cu naman ing bante mung mariposá
anting perlas a banten na ning talatanud a nimpá;
angga potang ica naman ing cula’itan ning banuá
ba’tanang macapisulu carin king bie alan-anggá.
2.
Potang atiu nacung mîrás, cari’nâ manáiâng dasan,
e cu tucnang maglimaiun king mulá ná ning tagimpan
catmuan ke ing pusû cu king iumu ná ning capanaian,
ban carin tucnang nong caglas ding luâng e ku apigilan
a lulumud king salû cung lapo-lapo ná king pe’itan
uling e ná tinulut ning banua’t sulip táng pilatan
ing macapisulu cata’t macapiabeng carinan
king uli ná ning meumis ta’t mebigung capalsintan
canitang pemúrî racang… tinulac king maiacaian
ding pengari múng mignasang mílusuc king caiatinan
king saup ná ning lalaking e mú pilsintan bagia man,
a menatad kecata king misnang pait tang kerasan.
3.
Uá potang macaras ná ing panayan táng penandit
e ná capilan man datang ing bigung bie anggiang saglit
uling carin king tucnangan dá ring alang malit-malit
pane namung caligaian ing damdaman ta’t idalit
pablasang ing bigsica’ná ning talabisbis ning pait
maburá ne king alalá tamung mine náng migsulit
king ucum ná ning bieng binang malupit at mapamu’isit;
uling ding luâ langi nala’t capilan man e no mampit
karing matá támûng bigû a ginapang king pasakit;
nung inya ing pacamal táng pikdal ning iauis at pilit
timauâ ne mutiang banding sigmit ná ampong pirait
ning casalang ná ning sintang king banuá e ná milapit.
4.
Bandi, potang datang na’itâ e no miuani ring diuâ.
milibaia’nang ligaiá ing pasakit ampong lugmâ
calupa ketang samulâ, mibalic ing sadiang tulâ
uling ing aclis king lusac ning mengulung a paliasâ,
sulapo ne caiabe ning ala náng upaiang sumpâ;
at carin luminis neyá ing pisngi ning bayung calmâ;
itang delanan táng subuc a aral namu’t pauagâ
ning balamu banuang lulâng e ná manakit bitasâ
king daralanan táng pait, uari ta e nâ maualâ;
dapot ali, potang datang ing ablas karing malucâ
lumino ing melabug táng mitacdâ ibat king mulâ
nung nu icá ampo acú ding miiabe cabang-cabâ.
Yng Bantulut A Siualâ
California, U.S.A