nang: PL Sergio Gramonte Calayag
Ing panugaling dadalan retang tau ‘niang minuna
Iyang misna king kapinu, kagalangan ing mumuna
Tutung alang kayabangan, ‘yang akakit mu karela
Malugud lang parang tau, kayanakan o makatua
Ing amanung “po” at “opo”, parati yang darandaman
Makatua at e kilala, ibie ya ing kagalangan
Pangaras na ning sisilim, mamanuli keng karinan
Saka ilang manalangin king Dios lbpa tang miglalang
Nung atin mang mangailangan, kasaupan da iyang duduang
Ila rening misanmetung, nanu ya man ing parasan
Karas keta nang pagsubuk, mayayakit ing tetagan
Anting kuyug neng gagalo, tune alang magpalakuan
Ing dangalang bibitbitan tune iya ing ingatan
Anting metung kayamanan, iyang tiktak king kamalan
Masabal at malasakit, parati reng paparandam
‘nia karinan yang tayimik, yumung lugud mamilatan
E la manyusi mang pasbul, pangaras nitang kabengian
Pakabuklat la reng awang, deng manako ala naman
Alang takut neng maglakad, ala yang pigaganakan
Pablasang mayumung lugud, kareng pusu makalulan
Dapot ngeni iyang kutang, bakit kaya mipakanian?
Itang dating panugali, panakit ku mibayu ngan
Memagkanya-kanya na la, makasariling lalawan
Itang dirya ampon inggit, magbabo ya keng katawan
Inia metung paganaka, magumpisa keng pamilya
Pengari lang talaturu, itang mayap ituru ya
Kanita reng kayanakan iya ining apusan da
Bitbitan da keng sarili, angga potang matua na la
