nang: Poeta Sergio Gramonte Calayag
Kasampat na ning panagkat, matalik kung kaluguran
Talagambul ning kultura, ila rening miyaduangan
Nanu ya man ing aguman, karelang tatalakaran
Igalang ing balang metung ban ayabut ing parasan
Rizalino “Joey” Ocampo matenakan a poeta
Inagkat no reng poeta at talagambul kultura
Ila rening tinipun na, king Magalang karinan na
Ing nasa na pisametung ing dakilang parasan na
Ketang milabas a pulung, e ne rugu mikaduanan
Malagu ya ining bunga, keng mesabing kapulungan
Atin pamisasanmetung, iya ini ing parasan
Ban sumulung ing amanu at kulturang Kapampangan
Mikakawaning ‘tin saya, kareng lupa makalulan
Babalita ing miliari, ing bunga ning kapulungan
Ing kultura at amanu, alub namu palabungan,
Balang metung kilalanan, aguman nang pakiabayan
Pakamalang kaluguran ketang kayang pamanagkat
Ing nasa na ampon imbut, pakiabutan itang mayap
Misanmetung deng poeta, ing mumuna nang pigagap
Iyabe lang talagambul kadaupan la keng palad
Panakit ning kaluguran iyang metung a paralan
Misanmetung deng poeta, ban kultura pasulungan
Ilako ya ing katasan, panatilian ing kababan
Nung nanu man ing sigalut, mapayapa yang pisabian
Tune ini e miliari, basibasan katuliran
Itang taung mamilatan, mengabugbug mengaturan
Anting reperi ning boksing, ining laban patuknangan
Manayimik keang gewa, ban tabla ya ing labanan
Panagkat ning kaluguran kanaku yang kakaduanan
Itang mayap ming pigampa, mikalugud iyang gawan
Ilako ing basibasan, balang metung mamigunam
Yumung lugud mababating keng makanian a paralan