nang: PL Sergio Gramonte Calayag
Ining pamakipaglolo ‘yang tutu nang minaliwa
Tune ena na kalupa, keng panaung minuna
Mebating ing pamanyuri, lalawe na king itsura
Ala na ing talimhaga, pota nang mamanikan la
Deng mipaglolo kanita, akit kareng kayanakan
Kabiasnan da yang papasiag, pangaras da keng dungutan
Deng amanung sasambitlan, pakarimang daramdaman
Inia isip a malino, iyang mumunang panintunan
Wa, kabiasnan yang mumuna, iyang tutung pakalawan
E itsura o talakad, o pustura keng katawan
Ing talinong bibitbitan, matutunggeng kayamanan
E masira, e milako, e kumupas keang kinang
Inia potang mamanikan, ipalkas mu ing talino
Mangutang ya ing pengari, makibat Kang misnang lino
Damdaman mong talimhaga, ila rening susurian mo
Anting asan marakap ka, potang ika’ng mangamano
Mamie tamung alimbawa, ila rening pakasurian
Ing dalagang magsalita, ini iyang kayang kutang
“Nukarin la makayungyung, deng adalanan mung kuayan?”
Lurukan la reng amanu, bayu mu la pakibatan
“Pilan salol ing asira, manibat ‘niang baintau ka?”
Itang kayang buring sabian, deng dalagang adisgrasia
Kabud metung o dakal na, ing pekibat keng dalaga
Pilming ena ka matanggap, e me akua ining sinta
Talimhaga dong sasabian, deng amanu rang yayapse
Lurukan la pa mung ustu, isipan lang masalese
Sagradu’ng pamipaglolo, keng amanung madalise
Keng talino ampon beluan, ilang keni na lalawe
Dapot ngeni e makanian, kareni nang kayanakan
Karelang pamipaglolo, mayayakit ketang dalan
E kalupa niang minuna, neng pasiag ing kapalsintan
E ya tangu nitang baste, mikawaning mabilisan
