https://www.facebook.com/reel/1394808031375295
Recent Comments
Sugal
Posted in Bie, Poesia, Poeta Alfonso Gomez Pedroche, Video
Leave a comment
REV. FR. RONNIE DAVID CAO, SMAP
nang: PL Sergio Gramonte Calayag
https://www.facebook.com/reel/279105424811075
Ining matenakang pari, suging poeta laureado
Sesese ya’t talagambul, literatura’t amanu
Malugud ya keng kultura, pakamalan ne pang ustu
Keni labuad Kapampangan, alimbawa ya’t modelo
Y Fr. Ronnie David Cao, tutung maganakang pari
Keng balayang kapampangan, iyang keni na magsilbi
E lalawe kule balat, o nanu ya man ing bili
Ing lagyu na ning Guinung Dios, ‘yang pangaral nang parati.
Keng idad nang limang atlu, maglupa yang beinte singku
Kabanalan keni nang bie, pangaral ne kareng tau
Kareng galo na at gawa, kababan na akakit mu
Dapat ya mung pamarisan keni babo niting yatu
Keng panaun a linabas, sintingan na e kinupas
Mayayakit kayang lugud, anting dagat king kalualas
Pamanyuyu na king Guinu, tune iyang ababakas
Kening maganakang pari, ating kabanalang wagas
Iniang iya ing meyaus, ketang awus na ning Guinu
Iya ngeni ing migpari, pangaral ne ing amanu
Keng lalawigang Pampanga, o parokya nang distinu
Yumung lugud ing papabal, kareng sasakupang tau
Akakit da reng kabalen, ing mayap nang panugali
Ala kaya’ng kayabangan, kababan na manatili
Iyang mabie alimbawa, kening lipi ning komanggi
Ing maganakang Among Cao, pagmadagul niting lipi.
Posted in Parikil, PL Sergio Gramonte Calayag, Poesia, Poeta Laureado
Leave a comment
NUNG NANU ING ATSU KETANG TASA
nang: PL Sergio Gramonte Calayag
Kabang aku ing maglakad, dadalan ke ining tasa
Daratang ya ining tau aku naman ing binangga
Itang laman yang miyugse, ketang lapag kinalat ya
Nanu ining kasangkanan, bakit lulan miyugse ya
Mapaliaring kekang sabian, Ika ini ing sepungan
Inia iya ing miyugse nanu ya man itang laman
Dapot mali ing pakibat, o nung tsa ing makalulan
E ya kape a mapali, iya ini ing milulan
Nanu man ing makalulan, ketang tasa mung tatalnan
Nung wari sa kareng tau, iyang bie mung pakamalan
Nung sakaling mitugtug ya, manabu ing makalulan
Mapali man o marimla, iyang tutung panandaman
Makanian ya ining tau, makalulan keng sarili
Itang tula ampon lungkut akakit keng pamibiebie
Dening taung akayarap, ila reni deng dadake
Nung nanu ing atsu keka, kareng tau yang idake
Inia metung paganaka, nung nanu ing makalulan
Keting bie mung kaluguran iya ining pakamalan
Idatuk mu ing ganaka, miyawa la reng keraklan
At nung sama ing ilulan, yang papunta king kasiran
Inia ‘datuk kening pusu, lugud, kapasalamatan
Itang saya ampon tula, at ‘bie mu’ng kapatawaran
Lugud ka keng parang tau, bitbit ing kapibabatan
Nung makanian ing gagawan kabanalan makalulan
Salamat kang Auntie Annette Castro Castañeda
Source: Law of attraction
Mata
Posted in Poesia, Poeta Alfonso Gomez Pedroche, Video
Leave a comment
Puling
Posted in Poesia, Poeta Alfonso Gomez Pedroche, Video
Leave a comment
PENGARING LALAKI
nang: PL Sergio Gramonte Calayag
Dening pengaring lalaki, asias na la ning pamilya
Iyang parating sasabian, nukarin man keng istoria
Dapot ngeni ilarawan, miyaliwa’ng sasabian da
Sanakan la’t pakasurian pamibiebie’ng dadalan na
Ating pengaring lasenggo, iyang akit keng inuman
Makatambak itang alak kayabe pa ing pulutan
Tutung iya ining bida, kareng abeng papainunan
Gigisanan no reng sweldo pamilya na e na tagan
Atin naman pagmadagul iya kanu’ng babaero
Ing parati nang pangara, iya kanu’ng tutung macho
Maragul pamikatawan, tutu nemang maskulado
Dapot keta nang katutuan, bakla ya ing pangatao
Atin naman yang mayangin, iya kanu ing mabeluan
Nanu man ing pisasabian, deni ilang balu na ngan
Dapot, karas ning kauran, tune ala yang apangan
Misna ya pala katamad, iyang tiktak kabatugan
Atin naman ‘tsu sugalan, iyang akit kakabukas
Tune alang kapagsadian ketang paratang a bukas
Panga-uli ketang bale, damdaman mu yang managkas
Ketang kayang pangasambut, kapanisian alang wakas
Atin metung a pengari kipmuan ya king kabanalan
Malugud ya keng pamilya kipmuan ya king kalingapan
Kening karelang kabiayan, ala kayang kapabustan
Malinis ya pamibiebie, ala kaya ing kasiran
Ninung pengaring lalaki, makanian ya ing gagawan
Iya ining magtampiso ketang busal ning karokan
Datang ya itang aldo, iyang atin kapanisian
Saka iya ing magbayu, anting bayu nang melalang
Nung ing pengaring matinu, malugud ya king pamilya
Akakit me pang mamipi, sasaupan ne ing asawa
Tutung e na pikarine, iyang malugud a tata
Sandalan de rening anak, kapabustan ala kaya.
ITANG MAYAP YANG PANGARAL
nang: PL Sergio Gramonte Calayag
Metung ya mung paganaka kareng kakung pakamalan
Kalinisan ning kekang bie, iyang munang dapat gawan
Pablasang ken makilala, ing pangataung dadalan
Inia ining kekang dangal, iya ing paka-ingatan
Tutung maniaman mabibie keti babo niting yatu
Ining mayumu mung lugud, mamale ya ketang pusu
Anting talang misnang sala, mayakit keng pangatau
Tune iya nang pangaral, ing aral ning Apung Guinu
Karening kapara tang tau, ipakit ta ing masabal
Itang mayumu tang lugud, karela iyang ipabal
Meging metung alimbawa anting metung a manaral
Anting modelo kang tune, pamibiebieng ating dangal
Potang ika’ng mangamanu amanu mu darandaman
Ing atin lang apupulut, deng mayap mung kausukan
Aliwa ya ing indredus, atin dirya at kasiran
Alang ibie nanung mayap, kayarap mu’t pakisabian
Ing bie na ning metung tau, anting aldo king aslagan
Iyang sunlag king Alaya kabuklat ning kayabakan
Iya mu rin ing manabu karin banda ning albugan
Inia datang itang oras, ing oras ning kapupusan
Metung ya mung paganaka, gamitan ya ini nang bie
Itang mayap ampon ustu, iya ini ing idake
Tune keka ya mayakit, balang aldong pamibiebie
Uling iya ing pangaral, ing Dios lbpa tamung mabie.
Posted in Bie, PL Sergio Gramonte Calayag, Poesia, Poeta Laureado
Leave a comment
AKU, ING KAPAMPANGAN
nang: PL Sergio Gramonte Calayag
Tutu kung menialupsupan, bakit kaya mipakanian?
Ing malagu tang kultura, ing kulturang kapampangan
Talasulat kawatasan, deng istoria at crissotan
Tutung misna king kalagad, inia iyang mipapanpan
Ila mu ring mipabustan, talagambul e sikasuan
Metamle ya at melungkut, ing kulturang agisingan
Deng mangasayang zarzuela, at mangasayang comidia
Kareng balen ampon baryu, ilang rening mamie saya
Kareng mete, ‘tin balasyun, pandakitan deng dalaga
Deng mangatikding lalaki, ila mu ring mamamunta
Ketang pialung la miyarap, pakibat da makarima
Bulaklakan ya ing pialung, magkamali ating prenda
Mangatimyas a arana kareng baryu iyang usu
Lalu nung ating dalaga magpakilala’ng baintau
Ing tigtigan alang tuknang, mikatipun lang memaryu
At nung masala ing bulan, mamialungan, mipagkuentu
Lalam na ning palpabewan, mamagduman deng akit mu
Kagalangan ing magbabo, mangasaya lang memaryu
Bakit ngeni nang miliari? bagya-bagya milalako
Ing malagu tang kultura, keting lalawigan tamu
Minaliwa’ng panugali, megi tutu nang moderno
Magkulangan yumung lugud karening kaparang tau
Ninu kayang migkulangan? mipaburen, e sikaso
Metung tamung kapampangan tatalakad ketang ustu
Kalupa kung kapampangan manalakaran ta sana
Kultura’t literatura kalingapan ipakit ya
E ta sana paintulutan, ing malakuan at mate ya
Iyang dapat tamung sesen, ing sinupan gambulan ya
Uling lipi tang malugud, keti balen tamung sinta
Lipi tamu ning komanggi, tutung liping Maharlika
Aku, kakung pagmadagul, tune metung kapampangan
Malugud ku keng kultura at amanu tamung menan
Literatura’t kultura kanaku yang lilingapan
E gulutan kapilan man, e paglibe kareng dayuan
Ining lipi kung dadalan, marangal ya penibatan
Tatalanga ing kanuan ku, aku. .. metung kapampangan
July 24, 2023
“ing túlang ita”
ketang mitupa la at misagana la
king mumunang besis deng kekatang mata,
bala mu ing sabla sagling pepainawa;
tinuknang ya durut ing yatu kekata;
aggiang pang ing tibuk keng salu mesikan,
dapot makanian man, mitmung kapayapan;
kalmadu ing sabla, at ing panimanman
makatakad yamu king tagle mung leguan.
ita ing minunang dilling pamitagun
a warit kanaku, ing animu memun,
at likuananan nang tulang susun susun,
tulang kanita pa’ tikman at apantun.
ita, angga ngeni ing panamdaman ku,
tulang ika kabud maka-ibie kaku.
07/24/23 //14:41
kaibat minum panulung para prisiun