https://www.facebook.com/reel/1281879709111583
Recent Comments
Guinu
Posted in Dios, Poesia, Poeta Alfonso Gomez Pedroche, Video
Leave a comment
DON SIMEON CADIANG DAYRIT
(Poeta Laureado ning Balen Bamban)
nang: PL Sergio Gramonte Calayag
Metung maganakang tau, keti balen na ning Bamban
Kilala ya ring mabandi, kababan lub bibitbitan
Pangulung Sergio Osmeña, iyang kayang kaluguran
General Servillano Aquino ya ring kayakuanan
Iyang balitang mabeluan, at malugud parang tau
Iyang dai ding marangal, mayakit keng pangatau
Meging meyor keti balen, pepabal na itang ustu
Tau yang kagalang-galang, keti babo niting yatu
Malagung pibale-bale keti barrio ning San Roque
Malacañan of the north’ iyang kayausan da keti
Madalas yang dadalawan dening meging presidenti
Metung ya’ Sergio Osmeña, iyang kaluguran tune.
Panugaling kapampangan neng manintun lang tegawan
Pakituki ing lagyu na, ban kayapan yang apusan
Ining lagyu nang Don Simeon, pemun ne ning kaluguran
Ing lagyung Benigno Simeon, ining Ninoy yang dadalan
Kareng amlat na ning Bamban, iyang tune mekilala
Bilang metung talasulat at Laureado yang poeta
Ing kurirung “Pugut negro” metung neng obra maestra
Aguman ning Bambanense, iya mu ring menimuna
I Don Simeon Cadiang Dayrit, iyang tune Bambanense
Pagmadagul niting balen, miki-lugud yang dalise
Pakamalan iting balen iniang iya ing migsilbi
Iningatan kayang lagyu, alang pintas a mesabi.
(Salamat kang Jesus Elmer Dayrit Mejia kening dinake nang letratu ning ingkung na.)
November 18, 2022
Posted in Parikil, PL Sergio Gramonte Calayag, Poesia, Poeta Laureado
Leave a comment
DENING KAKUNG APU
nang: PL Sergio Gramonte Calayag
Kabang aku ing painawa keni nang pibale-bale
Matutulang, mabubusit, kareng apu kening lele
Lundag-lundag, mamangalat, ing gulisak damdam keni
Babawalan, lalambingan, saka ilang aili-aili.
Ika sang mipapatudtud, sakban naka at neng tula
O susulutan ka arung, mipapa-atsing kang bigla
Saka naka pangaulan, makialung yang kipmuang saya
Makulami ka man kaya, tutung ini e agawa.
Potang ila rening ala, tayimik ya ing karinan
Alang anak babawalan, alang siglang darandaman
Alang anak a panausan, ala ka rin a utusan
Kening bale ilang ala, saka ilang panintunan.
Ngeni na ku maniwala, ketang lugud nang ingkung ku
Potang iya na ing datang, paninintunan na naku
Kapiraso yang poprice, pasalubung na kanaku
O aku ing tutuki na ketang barrio ning Castillo
Potang iya ing magobra, saka ke mipag-istoria
Dakal ya kaku kukutang, makibat naku man kaya
O iyang gagawang lubid, sasake keng paglubid na
Neng tula keng gagawan ku, aku naman mayayama.
Ngening aku’ng atin apu, at ngeni ku dadanasan
Peparandam nang ingkung ku, itang lugud at kamalan
Tindanan ko aturu na, at keng isip la mitanam
Kabang ikeng makakera, deng payul na darandaman
Kaniaman ning atin ingkung, ing lugud na panandaman
Maniaman rin ating apu, ila rening pakialungan
Lulto ka ping kunsintirul, keng buri da panusigan
Yumung lugud keting pusu, iyang tutung makalulan
Posted in Pamilya, PL Sergio Gramonte Calayag, Poesia, Poeta Laureado
Leave a comment
ING PIBALE-BALE
(Ecclesiasticu 29:21-28)
nang: Sergio G. Calayag
Ing mayulagang kailangan karening taung melalang
Ing danum at ing pamangan, ing imalan at tuknangan
Nung nu ka magdili-dili keni nang kekang tuknangan
Mabibie kang mapayapa keng malagung kakarinan
Mas maniaman ing mamangan keng pakakalulung kubu
Kesa mangan kang maniaman keng bale reng aliwang tau
Sukat kang tumula ketang atyu keka agyang ini ditak mu
Kesa ketang mipalagyuan ika ing makipangan mu
Makalunus pamibie-bie, ikang makipanuknangan
E ka makapagsalita, uling tutung mikelangan
Ika rin talasalubung kareng bisitang daratang
A ala mang pasalamat, kening keka nang daraptan
Mangalati ka panandam potang ini ing sasabian
Hoy dayuan!, nung atin kang apag aku ngeni ing mangan
O kaya naman sabian, mabating na kening karinan
Datang ya ing kapatad ku, kailangan ne’ng pitudturan
Tune misna king kasakit, kareng atin pegaralan
Tutung ala lang atangka, a metung mu mang karinan
Uling iya ing mabasa, karas na nitang kauran
O, ala yang pagkambilan, ketang dimlang darandaman
Anya potang makiasawa, tutung ika ing manangka
Metung a pibale-bale, kakarinan ne ning tula
Anting pugad a malagu, a lulanan nitang saya
Maging batis ne ning lugud, kabanalan at payapa
Keni nang pibale-bale, iyang pugad na ning lugud
Yumung lugud at pakamal, tune keni ya mibuklud
Pengari lang mamantabe ban kanita eya matbud
Kabanalan yang pangaral, karen pusu ipagkalub
Posted in Biblia, PL Sergio Gramonte Calayag, Poesia, Poeta Laureado
Leave a comment
Ipas
Posted in Poesia, Poeta Alfonso Gomez Pedroche, Video
Leave a comment
KABYASNAN
Irvin Harvey Rivera
Siuala Ning Maliwalu/Anac Ning Baculud
July 27, 2018
Nanu ing kabyasnan? Metung yang upaya,
A panyukad da nung tanak ka’t maula
Kabyasnang bibekut mu’t maguing sandata,
A e ra abandi at akwa ring aliwa.
Kabyasnang pigkalam, keka ra dinake
Ding talaturu mu king iskwela’t bale
Kabyasnan king bayat, pupusan king takde
Balu me sa’ng dalan nu’ ka man sa mine.
Nanu ing kabyasnan? Nu’ me ta gamitan?
Pigampang marawak o king kabanalan?
King mayap a imbut, marok a paralan?
Nanung ulaga na’t maguing kabaldugan?
Ngara ring aliwa, talnan de ing yatu,
Ilang Mayupaya at dakal no balu
Megui nong Guinu at megui nong palalu
Ing Guinu rang Mayap, ing sarili ra mu.
Atin namang tawu, king sobra nang tanak
Megyam neng tantu king matuling nang balak
Buring neng idagsa at ikana king lusak,
Yatung pagkarinan king dalang marawak.
Kabyasnan, kabyasnan tutu yang maulaga
Ngara ring mabandi’t guiguinuan da pera
Balu reng padurut ing yatu king kwalta,
Agyu reng apalbug ing maulang Banwa.
SiualaNingMaliwalu #AnacNingBaculud
Posted in Poesia, Poeta Irvin Harvey Rivera, Tau
Leave a comment
“mamin”
keti king ketawan, ing e pamipante
misasasagana o agnan maglakbe,
misisingkilan la ring karelang takde,
kaniti ing sabla maging une-une.
ing e pamipante anti mo reng maina,
reng naman masikan ilang kasagana,
anti keng makualta ampo pang maluka,
ila naman addua reng misasagana.
pero deng ninu man dimut keng pibandian
deng taung mabandi e ro dapat sisian,
pablasang ing sala e ta mu apatan
kareng migkapilit minangat kabilian
ala yang keliwan keng sisuan amanu
a malulumpawi at maging kalulu,
e tamu papatan itang sisi tamu
karetang aliwa o keng ninu-ninu.
marap ta salamin maki katapatan
mamin ta king sala, sakaling atin man,
at e ring taliri ila ring paganan
ban tamung mituldung maki kasalanan.
e anti reng taung akakasagana
at warit malugud keng manang salita
at managkat pane ampong paganaka
a keng Kapampangan ‘tayis ya ing dila;
agkat do reng tau keng lual ning sural da
a neng magsalita mangapampangan la
pero ila mismu kilub ning bale ra
baniaga la sabi reng mangaimpis lupa;
metung pang dapat da rening masalese,
mamatan lang sala kareng aluang takde
uling e la tapat keng tune rang aske
istung ing salamin ume arapan de.
07/27/23 //21:10
kaibat mengan burger
***ing balu ku, i Alexander Pope atin yang istilung anti kanini a mapaniunu o mediu sarkastiku neng misan
MATULID KUNG BALUKTUT
Ing kakung matulid a tutung baluktut,
Dakal ku man letra dapot belwan dimut.
Abut ko kekayu tiktak ku man kaymut,
Ban kaku iyarap karetang ginulut.
Metung ku mang pipi kanakung idalit,
Mayawus mang bulag kekayu ku pakit.
Maklak mang mibayit parandam ku’ing sitsit,
Ning matulang pusung mibalut nang sakit.
Pabalikas nang suli kaku lang isubung,
Gulisak ku iti karetang bubulung.
Bilad ko reng bining malwat misalilung,
Ban ing mamamate kakung apalabung.
Kapampangang kikyak keng tula sagakgak,
Bagutan ke’ing lapis keng papil salaksak.
Tikdo ke’ing amanung malwat nang megtalpak,
Libayan kung yumu dila nang masalpak.
Bulus ke’ing lapis kung malwat nang mekulung,
King mabye kung plumang mat’tud keng kabaung..
Posted in Amanung Sisuan, PL Bertung Isponga, Poesia
Leave a comment
CARTILLA NlNG KATIPUNAN
nang: PL Sergio G. Calayag
1) Nung ing bie mu e gamitan, ketang banal a parasan
Anti yang tanamang dutung, alang babie salilungan
Tutung ini pakiyarle, kareng dikut karin parang
Itang dikut mikilasun, tutung alang pakinabang
2) Nung dening kekang gagawan, atin samut kayabangan
Ini gawang pansarili, alang mayap a puntalan
Kapagnasan nung e ustu, tutung alang kapuntalan
Alang ganakang akakit, alang akit kabaldugan
3) Itang tune kabanalan, mapanyaup parang tau
Keng pangimut ampon gawa, ing kayapan yang akit mu
Papasiag ne’ng katuliran, keng sasambitlang amanu
E maimut o mangabiran, parejas keng pamagtratu
4) Maputi man o matuling, ing kule na niting balat
Alang makualta’t kalulu, pante-panteng makiyarap
Ala ring makapaigit, kabiasnan, leguang pigagap
Pangatau e igitan, nanu ya man kekang depat
5) Ing kapurian pansarili, potang ini yang mumuna
Pilublubang mapagmatas, tune ini ing nasa na
Taung mapagpakumbaba, ketang mayap ya masapsa
E lalawe keng kapurian, sarili na atin kusa
6) Ing taung atin marine, anting sumpa ing amanu
Tuparan na at tuparan, nung nanu man ing pengaku
Ing amanung sasambitlan, itabak mu na keng batu
Tune ini e kalinguan, masukad ya pangatau
7) Panaun e sasayangan, anting metung kayamanan
Uling ini yang lumabas, e mibalik, agyang dit’man
Anya nung e pakamalan, keng e ustu ya gamitan
Dumalan yang anting angin, e me akit ing puntalan
- Nung atin mang manalipit, dadamusak katuliran
Talakad ka’t ipaglualu, ninu la man deng kasalang
Ing matulid yang magbabo, e da buri’ng mipailalam
Malasakit na’t masabal, atsu kening baleng tibuan
Ing taung atin kabiasnan, maingat yang mangamanu
Nanu ya mang sasambitlan, isipan pang atlung ukdu
Nung lihim yang sasalikut, e ne sabian ‘gyang kaninu
Angga karin king kutkutan, sinupan ne’t e pabalu
Tala-usuk ing lalaki, keng asawa ampon anak
Iyang tutung matutuki, ketang ustung pamidapat
Mamie mayap alimbawa, kareng gawang misnang sampat
Kayang anak iyang tukian, ban mikabieng misnang ganap
E lalawan ing babai, anting metung a pialungan
Uling iya ing kadame, keng maskup man o kanawan
Luguran ya’t pakamalan, pati na ing keyang keinan
Ganakan me ing lndu mu, itang lndu mung ibatan
Nung e mu buring maliari, keng asawa ampon anak
Kareng keka ring kapatad, pati kareng kamag-anak
Igalang lang parang tau, katuliran e damusak
Uling nung keka ra gawan, e mu buri ing marapat
- Ing kamalan na ning tau, alayu keng panga-ari
Alayu keng tilus arung, at alayu kareng pari
Ala keng matas tungkulan, babo yatu akit keti
Tune wagas at tune mal, keng mayap nang panugali
Taung ‘tin metung salita, kipmuan puri at dangalan
Itang e manalipusta, manalipit keng kabiayan
Tutung biasa yang lumingap at atin ya ring panandam
Masabal na’t malasakit, keni balen tamung tibuan
10) Ilaganas ining aral, anting aldo king aslagan
Ining mal tang katimauan, ‘yang manaya keng balayan
Sabug ya’ng mayumung aslag, itang sayang alang tuknang
Kekang gigulang bie, pagal at pibatang kasakitan
Tune alang kasimpara, tutung e ra atumbasan
Nung deng sabla abitasa, ining lugud king balayan
At balu nang matupad la rening kayang katungkulan
Kaselesayan misulat, itang nasa ning Katipunan
Tutung e na pin mabura, kening baleng pakamalan
Casebian 23:31-35
23:31 E ca paitucsu king alac, agiang sidsad a lutu, at macauiling acakit kikislap king copa, at binang malinatnat daralan king acmulan!
23:32 Dapot cabud tinalab keca, anti cang meket king camamalung camandagan.
23:33 Dudurut ing acakit mu, at e micacalampacan ing kecang paniabian.
23:34 Balamu ati ca macakera libutad dayatmalat, maca calauat king batiauan ning barcong pitatap-tatap ning malimbuyung mangaragul a alun.
23:35 Balamu pamaluan da cu buntuc, “ngamung sasabi, e na cu man manasakit”.
“Balamu pamatbatan da cu dapot pata cu catauan”.
Posted in Biblia, Kasebian, PL Orly M Dizon, Poeta Laureado
Leave a comment