bala mu murit ku pablasang murit ku; murit ku pablasang dinatang ka kaku, bina ku memurit king tagle leguan mu, ampo keng tikman kung lugud mu kanaku; bala mu murit ku uling sumangid na ning tikman kung kaplas king uli ning sinta, bisa ku pa murin mibalik ka sana, ika a pesari king tatakmang dusa. e ku wari murit? ing ukul tatalas king lugud tang addua king napung milabas, sumangid ning dusa, sumangid ning kaplas, uling sumangid na, anting mimamasmas. mekad e ku murit, nune masalase… at ing kakung lugud, tutu mung dalise.
mamun naku keka kening katataulian, pamun, pamun, pamun saddia kung palsintan; mamun ne ing pusu binang menamdaman; mamun kabang ika magbalik nakaman. makabang panaun ing penenaya ku king pamagbalik mu kakung pasibayu, mu pin, king kaba na ning pangayala mu akalinguan ku na, ing lugud, nung nanu. magbalik ka ngeni kareng kakung takde uling ing tikian mu, keka ginulut ne; kaibat meng binekut ing keyang pangane, ipsa na ing sabla, anti yamung melue. magbalik ka galang at kaibat ning sabla lakuan mu nanamang dunut king paliasa?
e kuna pin sana buring balikdan pa nung makananu mong piga rening mata ketang aldo meko ampong ginulut ka keng yumu ning sinta a pisusuluan ta, dapot neng keng banua ume talanga ku, ing kekang larawan babastag ya kaku, at panaganaka na a mal ka kanaku ampo pa ing tula a kaku binie mu; at kaibat, susulud kening pilubluban ing ngamu lugud mung alang kapupusan, mu pin, ing pusu ku magin yang salunan uling ing lugud ta gilutan mung misan. makanian man, kening pusu nu ka mipuk, alang aluang atin kagiwan a lukluk.
Ketang metung pamagaral, tune iyang kakung dimdam Aral na ning pamaglakbe kening babo ning sikluban Nung nanu ya ing parasan o keka tang paintungulan Ining bie na niting tau ketang kayang pupuntalan
Ini ing salmonic journey, pakikabas kareng asan Dening salmon, asan dagat mibait la keng malalam Gala-gala, kawe-kawe keng malapad a danuman Pero ila reng babalik keng lugal dang penibatan
Keni babo niting sulip, atin tamung paintungulan Nung bakit mibait tamu, atin metung kasangkanan Nung nanu la reng parasan, dapat lamung pakibaluan Kening bie tang pakamalan, ing sepu, E kamatayan
Awus Solomonic journey metung mu ring pamaglakbe Ing kabiasnan ing mimiral ken keka tang pamibiebie Anya dapat pagdulapan ing parasan na niting bie Didinan lang kabaldugan itang lugud a dalise
Bakit midinan tamung bie keni babo niting yatu? Kasapuak mu keng masala, kamatayan iyang dulu E mu na rin pakibaluan, ing kaburian na ning Guinu Basta mamangan, matudtud, alang kuwenta Ining bie mu
Ing kabiasnan nang Solomon at ing aral da ring salmon Deni mamie kabaldugan, laluna ila reng lalon Ing ulaga na niting bie emu sana pa paniglon Uling kaluguran naka, ning Guinu tang miniaklung
Pekikabas kareng asan babalikan ing penibatan At ing Aral nang Solomon, at ining kayang kabiasanan Paganaka kekatamu, atin tang Dios a miglalang Iyang tune manenaya karin king bieng alang anggan
Kabang aku’ng manos pinggan, kanaku yang apag’masdan Ining tapak kareng gamit, metung karening wawasan Sinalusub keng isipan ing panaung adalanan Ining pinggan na ning lugud, pengari mi gagamitan.
I Tatang ku platero ya, iyang sikat at kilala Mamangawa yang alajas, karin barrio ming Banaba Agpang keng kayang istoria, ining tapak ‘yang gewa na Pakpak yang eroplanu, iniang Hapon pa ing gerra
Deng sundalus Amerkanu, iya ini ing pagsarian Papagawa lang pulseras, kaya dogtag keng katawan Idukit ne ing lagyu na, at ing petsa iniang gawan Kalupa na niting tapak, atin banuang katandanan (1944)
Ining tapak yang amana, ing tapak na ning lugud Uling ikit ku kang Tatang ku, yumung lugud ing pibuklud Ining gamit piping saksi, ketang lugud a mamagus A sepu da ring kapatad, matibe yang anting buklud.
Inia, Tatang at lma ku, ilang keni misusulu Potang ilang ing mamangan, mipanaya yang akit mu Kening tapak makabili, itang nasing makatumbo At keni ke mu rin kukua, mayumung lugud ‘yang lulto
Ining tapak pakamalan, pakamalan ning pamilya Atin lugud a matibe, kening tapak meyakit ya E ya mangan I Tatang ku, nung e kasulu’ng esposa Kening tapak na ning lugud meangu ya ing istoria.
ing miyuniat gamat tutu ping maniaman kareng taung dimut karas keng kabiayan, ampo kareng taung binang mangailangan, kareng káluguran, makanian munaman. alang kalaraman, maniaman pin tutu ing kareng aliwa makabuklat pusu, at panamdaman mung lulualas ka salu uling darake me ing pusu mung buu. dapot ing katutuan e tamu alingad, maniaman man mamie karetang mamawad, potang itamu nang king saup ing mawad, e mayan manakit mabut kareng palad… -ita ing managiag ban lakuas sumaup, tikman ta na kasing mengailangan saup.
