https://www.facebook.com/reel/800896335100572
Recent Comments
Arung
Posted in Poesia, Poeta Alfonso Gomez Pedroche, Video
Leave a comment
“mepali”
ngeni, mepupus na ing pamamialungan,
ing pamamialungang e buring tuknangan,
e buring tuknangan pablasang maniaman,
pablasang maniaman ing aping pialungan.
ing kakung kakialung e ne kasi bisa,
at keng pialungan mi ali ne matula,
at ngana, ing api mabilis manyira
at mayan manyilab pamiliang mabuya.
king saddia, keng pialung, asna ke kasuelu,
anti mi yang banding sarili ing yatu;
ala keng pakialam keng ninu o nanu,
mu pin mipakde ya, at linaut kaku.
king pamamialungan, pitda na ing api,
at ngening mitda na, karin ku mepali.
08/02/23 //13:08
kaibat mengan skyflakes
ING AMANUNG KAPAMPANGAN
nang: PL Sergio Gramonte Calayag
Mamasa kung e mipabustan, ing amanung kapampangan
Keti labuad tang komanggi, e malumpawi ‘gyang dit’man
Deng pengari keng pamilya, panimunan iyang gawan
Pablasang yang kaluguran ing salita tamung menan
Kabait ning metung tau, gatas ning Ima ‘yang susuan
Ban kanita iyang dagul, ketang lugud at kamalan
Manibatan ketang pusu, iyang tutung panandaman
Anting sibul e mamala, ating yumung alalasan
Makanian ya’ng kapampangan, keng amanung amulatan
Kabait na babo yatu, iya ini ing sinusuan
Sinese ne at gimbulan, keti babo ning sikluban
Iya mu ring bibitbitan, nukarin man iyang dalan
Pagaralan mo reng amlat, at dening kasalesayan
Malualas ya ing Pampanga, iyang keang sasakupan
Keti Lalawigang Tarlac kapitna na kapampangan
Alta Pampangang meyawus, angga ngeni yang dadalan
Balen Cabiao, Nueva Ecija, king Hermosa ning Bataan
Ing Calumpit ning Bulacan, amanu ra kapampangan
Iya ini ing sesesen, at tutu reng pakamalan
Kakaulan ing amanu, pagmadagul keting tibuan
Kilual ke man ning Pampanga, magsalitang kapampangan
Saka iyang pagmadagul, at tutu ming kaluguran
Nung miras ka San Fernando, tagalog ing gagamitan
Atin dineng darandaman, sasakwil de’ng amulatan
LUGUD ANTING PULUT
https://www.facebook.com/reel/833831938363927
“Pulut-panilan, ing canacung buri”
Simbitla ning cayang asawang cacagli.
Ganinaldo pa mu cabud yang tinalcad
calulung lalaqui agad yan linacad.
Qng pulung masucal keti ne pentunan
yng bale tamumu – carin manibatan
maniaman a pulut, ausan dang puqiutan
para qng asawang mamitang maniaman.
“Oyta na, oyta na” asyo ning lalaqui,
Yng bale tamumu qng sangang baliti.
Tambing neng singkitan anggang manabu ya,
deng sablang tamumu, penagal de’y coya.
Angia man masaquit tenge ne yng bale
para qng asawang maniglo’t cacagli.
Penasiad de rugu mabilug catawan
manibat qng buntuc anggang talampacan.
Minuli ya rugung mamapi qng lagnat,
Asawang cacagli tambing ya pung quiniak.
Macanian yng lugud a dapat mimiral,
yng pulut a lugud antiamong arnibal.
Posted in Lugud, Poesia, Poeta Alfonso Gomez Pedroche
Leave a comment
PANGULUNG MARIA CORAZON SUMULUNG COJUANGCO AQUINO
nang: PL Sergio Gramonte Calayag
Pangulu Cory Aquino iniang iyang menungkulan
Ing bangsa tang Pilipinas ‘yang tutu nang pekamalan
Binalik ne’ng demokrasya keting sinta tamung tibuan
Mika-bosis la reng tau, at bosis da yang marandam
Ining simpling mikibale, balen Concepcion ing karinan
Kipmuan ya king kaganaka, deng memalen yang sasabian
Asawa ya man nitang mayor, ala kaya ing katasan
Meging gobernador Tarlac, kababan lub pairalan
Meging senador ya’y Ninoy ing malugud nang asawa
Tatalakad keng matulid itang ustu papabal na
Binagsak na ing Martial law, Pangulung Marcos gewa na
Pekulung no reng lalaban, l Aquino kayabe ya
Mekulung ya l Ninoy kilub na ning pitung banua
Panandaman itang lungkut ning malugud nang asawa
Misnang bayat ing panandam anting iyang meparusa
Alayu keng kayang lele, kaluguran nang asawa
Keng problema nang arapan, erapan nang kipmuang tapang
Yumung lugud keng pamilya, iya ining sasandalan
E pepainan ing kayang lub, pepakit na ing tetegan
Ban pamilya e mina lub, tune ini yang gagawan
Dakal maybug e man’wala ing agyu nang manungkulan
Uling iyang simpling lma, keng malukang pagkarinan
Kabud iyang megumpisa, ketang kayang katungkulan
Tengalan de keti yatu, anting tala king katasan
Posted in Parikil, PL Sergio Gramonte Calayag, Poesia, Poeta Laureado
Leave a comment
MENGALBUG LA RENING LUGAL
nang: PL Sergio Gramonte Calayag
Panaun na ning kauran, mengalbug la rening lugal
Itang danum yang dadano, mamaglapo la reng dalan
Tune meging alang silbi, mengagawa la reng kanal
Ing dagusan at sisipsip iya ini ing kailangan
Potang albug pisasabian deng solusyun ‘lang sasabian
Lalung-lalu ing panaun mamanaliwa na datang
Metung karening paralan, deng tanaman ‘lang dagdagan
Babalanse ing paligid, at ing pali lalabanan
Tanaman la reng solusyun, keng problemang dadalanan
Ilang mamie kapasnawan nung ing pali panandaman
Iya mu rin ing sumipsip, kening albug neng kauran
Inia ilang e papaten at saka la pa dagdagan
Dapot alang pamagaral, parati nang dadanasan
Deng tanaman a kailangan, ‘lang patugut gigisanan
Ala no mang kayalili, ala mu ring mananaman
At nung tanam paletratu, ketang facebook paragulan
Mananaman tamu sana at saka la paragulan
Ila reni deng solusyun ban asugpu ing kasiran
Nung ala tamung gagawan, banua-banua dadalanan
Ining albug at lisangan, yang parating dadanasan
Agkatan da kayu ngeni, luguran ya’ng kalikasan
Mananaman ing solusyun, ban ing albug alabanan
Kabud tanaman merakal, kapasnawan panandaman
E mu albug ing mabawas kayabe ne ing lisangan.
ISTU NA!!!
https://www.facebook.com/bertung.isponga20/videos/816806083325387?idorvanity=1973564689509992
Anting selebrasyun ning Bulan ning Amanung Sisuan.. REVERSE SPOKEN POETRY
Neng Bertung Isponga
ISTU NA!!!
Ala na kang dapat patunayan.
Uling ing katutwan,
Ing metung anti keka ala nemang kapupuntalan..
Kapatad, magkamali ka nung isipan mung
Dasan mu ing kanawan,
Gulut ning kekang kasakitan..
Iti metung mung ilusyun..
Anya tanggapan tana ing katutwan a,
Ala kang apala keng pamanyulat tula..
E naman tutung
Metung yang susi ing literatura ban miangat ka..
Uling
Ala nemang ikana ing kekatang amanu keng amanu ding aliwa…
E naman tutung
Midinan yang pamagbayu
Keti labuad a pitatalakaran mu.
Uling
Ala nemang sikanan ing kapampangan..
Kapatad, mali ing isipan mung
Api abe-abe naka tamu ning amanu.
Ayabut tamu ing tune katimawan,
Nung mipapanantabe at misaup-saup.
Anya e ka maniwala kareng kuru-kuru,
Metung kang pakakalulu..
Kapatad, ilako mu keng isip mung,
Nung pagpursigyan mu midinan kang masanting a parasan..
Ayabut mu ing pamagbayung kekang paninapan,
Nung maglakad kang matulid papunta keng kekang pangarap..
Uling ing katutwan,
Biglang mibaliktad ing kegana-gana.
Anyang apiisip ko reng bageng areti..
Kaluguran ku ing Pamanyulat..
Kaluguran ke ing Literaturang Kapampangan..
Kaluguran ke ing amanung sisuan..
Ing Indung Amanu iyang susi ban akamtan ing tune pamagbayu…
Ing Indung Amanu iyang susi ban akamtan ing tune pamagbayu..
Kaluguran ke ing Amanung Sisuan..
Kaluguran ke ing Literaturang Kapampangan..
Kaluguran ku ing Pamanyulat ..
Anyang apiisip ko reng bageng areti,
Biglang mibaligtad ing kegana-gana..
Uling ing katutwan,
Nung maglakad kang matulid papunta keng kekang pangarap,
Ayabut mu ing pamagbayung kekang paninapan..
Nung pagpursigyan mu midinan kang masanting a parasan.
Kapatad, ilako mu keng isip mung,
Metung kang pakakalulu..
Anya eka maniwala kareng kuru-kuru..
Nung mipapanantabe at misaup-saup,
Ayabut tamu ing tune katimawan..
Api abe-abe naka tamu ning amanu..
Kapatad, mali ing isipan mung
Ala nemang sikanan ing kapampangan..
Uling
Keti labuad a pitatalakaran mu,
Midinan yang pamagbayu..
E naman tutung
Ala nemang ikana ing kekatang amanu keng amanu ding aliwa..
Uling
Metung yang susi ing literatura ban miyangat ka..
E naman tutung
Ala kang apala keng pamanyulat tula..
Anya tanggapan tana ing katutwan a
Iti metung mung ilusyun..
Gulut ning kekang kasakitan,
Dasan mu ing kanawan..
Kapatad, magkamali ka nung isipan mung,
Ing metung anti keka ala nemang kapupuntalan..
Uling ing katutwan,
Ala na kang dapat patunayan….
ISTU NA!!!
Posted in PL Bertung Isponga, Poesia, Timawa, Video
Leave a comment
LUGURAN YA ING AMANUNG MENAN
nang: PL Sergio Gramonte Calayag
Bulan ning Agosto, bulan ning amanu
Iyang pagmasusian keti labuad tamu
Metung paganaka, ini e bibiru
Pakamalan taya, ing amana tamu
Kapampangan tamu, mangapampangan ka
Ban e ya malumpawi amanu tang sinta
Kabud e gamitan pilming milalam ya
Akua nang maluma, mayala yang kuenta
Kapampangan tamu, keng isip at diwa
Iya ing ipakit arapan ding malda
Magumpisa bale kilub ning pamilya
Iya ing gamitan, ing amanung mana
E me pikarine ing amanung menan
Bagkus pakamalan, saka ya luguran
Ini yang kaladua, pangataung dalan
Iya ing tandanan inia e kalinguan
Bulan ning Agosto iyang paganaka
Ini nang amanu iyang isalita
Gambulan parati ba ya’ng e mawala
Lako’ng kapabustan, lingapan ing nasa
Ing sabi nang Rizal, pangbangsang bayani
E lugud amanu, tune pisawili
Mengari yang asan, bilasa na bili
Iya ing mabuluk alang bisang sali
Nung ini sasabian, e lugud amanu
Keka yang babating kekang pangatau
Keti ka mayakit, makilalang ustu
Tune kapampangan keti babo yatu
Metung paganaka itang kapampangan
Ini nang amanu iya ing luguran
Iyang pakamalan, babo ning sikluban
Ika’ng makilala kipmuan king dangalan