mipaskil ku pamu pung prosa. misulat ya pu ini ketang Abril 2014, pero angga ngeni sagiwa ya pa mu rin kanaku. mapalyaring ala yang kabaldugan ini keng mamasa, pero kaku… aku, e ke agyung basan a e ku magaga uling kapirasung laman ne ning pusu ku ing pisulatanan ku kanini:
in memoriam
keka, pangane ku
yampang ke keka ini anak king mitmung lugud.
wa, tutu, malyasa ku uling likwan mu ne ining yatu bayu me pa linwalan. e me man mu ikit ining masala bayu me likwan. e mu man mu tikman ing pali ning aldo, o ing kapreskwan ning pamandilu neng malisangan, o ing tyup ning angin keng marangle, o tikman mu man ing mandakap gurami, o ing mangus atbu, o ing pasulagpo burarul, o ing gawang bangkang papil, o ing mandakap lipaktung neng kaybat ning uran, o dindam mo man mu reng kuliglig; e mo man mu abalu nung nu la anti kabayat deng libru, o ing nung nanung kaswelu abibye ing pamagdrowing, o ing alben deng batwin neng bengi; e mu man mu tikman ing mamyalung, ing manalukyat kareng tanaman, ing manyese asu, ing manyese asan, o ing takman sorbetis, ing mangan suman, ing minum ginilu at aliwa pa.
wa anak, magula kung ustu uling e ku man mu tikman ing kaul mu, e ku man mu tikman ing awsan mu kung tatang, ing uman mu ku, ing uman daka, ing kilikan daka, ing pagkanta raka, ing pamasa raka kareng poesya ku, ing ituru raka potang atin kang homework, o ing turu rakang mangadi, ing apagmayabang daka kareng aliwang tau, ing patudturan daka neng bengi, ing isangkap dakang gatas, ing pagtiririn daka, ing arwan daka istung mangaga ka; e ku man mu tikman ing maging talatalawiwi mu, ing unggu raka keng duyan, ing sali rakang diaper –e ku man mu tikman ing eganaganang malyari nang gawan ning metung a tatang keng keyang anak.
mebitas yang maragul ing tabun ding mata ku keng kekang pamaglakong alang kapamunan, king kekang pamaglakong masyadung maranun –nung e keka e ku asabing “sana aku namu, a sana aliwa namu ika….” king kaorasan a ini e ku ayagwantang lumapo la rening adwang talaga karing kanakung pisngi uling ini mu kabud ing danum a malyari kung inuman ban mabawas bagya ing salpak ampong pait ning kanakung panamdaman. masakit agwantan ing bunga ning lumbe a durugang karing kanakung pisngi uling kaluguran daka. –marayu na ing pangarap a pengarapan ku kayabe raka. nung migulisak mu ing uran a manibatan king kanakung merunut a pusu, siguru mangaklak yang ustu ing mabilug a yatu keng katni na niti –siguru dandaman na ning yatu ing e matating aklis na niti.
makananu na kanini anak? ala nakung pakikisabyan kanyan neng ume nakaming magkerang adwang indu mu; ala nakung pakikibirwan agyang e ka makibat. ala nakung apis-apisan bayu ku ume paynawa ibat keng patingapun a pigagap. balu mo, lakwas kung meging maralas linapit keng Babo uli mu: dati ika mu ing adwan ku Keya, pero inyang dinatang ka kekaming indu mu, dimdam kung mas dapat ku palang lumapit Keyang maralas, at ika ing pane kung panyawad Keya ampo i indu mu –nung atin ku man adwan para keng sarili ku, ita ing sana magin kung malugud a pengari, sana magin kung mayap a pengari –pengari mu keng Dios.
malungkut ku anak, at lakwas kung malungkut uling ikit ku nung makananu na kang penamdaman indu mu –uling migit yang menamdaman i indu mu –at penamdaman ku ing lumbe na, manyalaksak keng salu ku, keng pangatau ku.
metung mu ing pasalamatan ku keng apung Guinu –ita ing pepatakman Na kanaku ing tula ning pamaging tatang king mumunang trimestri ning atyan nang indu mu. e ku isipan a pegkaymut Na ka kekaming adwang indu mu, nune, siguru inya kinwa Na ka kekaming adwang indu mu, ita ing uling ika ing pangane a mangaintulid Keya. uli niti inya panayan ku a dinan Na kaming pasibayu ri ‘ma mu a maging kalibe mu ban kekaming luguran.
anak, kaluguran daka. salamat at agyang keng makuyad a panaun mu dimdam ku ing pamaging tatang. salamat….
–tatang
