MAGING METUNG INSTRUMENTU NlNG BOKASYON

Posted on August 15, 2023 by inglibrarian

nang: PL Sergio Gramonte Calayag

Metula kung emu nanu, keng panagkat binie kaku
“Tara, iyang palabungan ing bokasyon na ning tau “
Bokasyon yang relihiyoso, palaganap bangsa tamu
Anting metung pamanupad, kening utus na ning Guinu

Maragul ku pasalamat meyawus kung pasibayu
King malambat nang panaun, kening misyon metudtud ku
King escuelang pituruanan metung ini keng obra ku
Palaganap ing bokasyon kareni nang sablang tau

Kalub ning banuang Y2K, computer age iyang ausan
Miyusu no rening celfone ampon gadget a amanuan
Dakal tutung makalibang kareng pialung a gagawan
Dakal mu ring gawang lisya, ila rening apagmasdan

Mayayakit kareng celfone, katutuan at kalaraman
Kaisipan da reng anak, malilili keng katutuan
Atin naman pamagaral ing akakit titimbangan
Itang awus na ning Guinu iyang tutung akalinguan

Vocare, amanu yang Latin, pamanaus buring sabian
Ebanghelyo makasulat, utus ne ning Guinu tang mal
Ditak la mu reng magobra keng palutang tutung dakal
Iya ngeni ing mamaus, deng mamalut ‘lang dagdagan (Mateo 9:37-38, Lucas 10:2)

Inia kabud atanggap ke, ing karelang pamanagkat
E naku meg-adua isip iyang kakung agad tinggap
Ing magi kung instrumento ban bokasyon yang laganap
King Mayupayang Dios lbpa alang anggang pasalamat

Posted in PL Sergio Gramonte Calayag, Poesia, Poeta Laureado | Leave a comment

“mu” (lang)

Posted on August 11, 2023 by inglibrarian

king katri ning lumbe -katri ning paliasa,
ing mal a pengari asne king kakera,
magmalun ya pusu, at migagaganaka
a datang ing aldo manlud neng mayala.

dapot deng anak na mitatalanan la,
at pasiknan de lub, ngara, lumaban ya,
ampong paramdam da ing lugud da keya,
aruan king amanung “kaluguran daka”.

tinipun da la ngan ding sablang rekuerdu,
detang pekaluma angga pekabayu,
ngara, “pangaku mi, ikaming anak mu
pamana mi ini kareng kekang apu.

“kambe ipamana ing lugud a wagas,
lugud a dalise manangga king wakas,
e mu kabud lugud a keng tinta ‘yagkas,
nune pin keng pusu manibatan lalkas,

“inia talakad ka, at maging matula,
dening kekang apu gawan mi lang tùla,
e magsangkan-sangkan king arap ding malda
at karin la palto malingap lang bina,

“nune turu mi la king lugud a tune,
e mu kabud sintang karing bersu ‘yapse
a sangkan managyag a dapat paisane
pakamal pengari king sintangdalise;

“e mi papaliariang ing lugud da keka,
iti dalise mu karing poesia ra
dapot ing amanung kapad dang tagana
ing amanung dayung mas gagamitan da.

“at ing kekang laggiu e mi ya pabustan
a keng dangalan da iyang gawan tagnan,
at sangkan ra ka mung sintang pakamalan
ban lang mirin laggiu at mupul dangalan.”

08/07/23 //19:41
kaibat mengan keng Dainty

Posted in Amanung Sisuan, PL Tuazon Sabandal, Poesia | Leave a comment

POTANG IDAD NAKUNG OTSENTA

Posted on August 11, 2023 by inglibrarian

nang: PL Sergio Gramonte Calayag

Potang idad nang otsenta aku pa rin ing maporma
Mangasikan lang kakung tud, agyu ku rin ing magobra
Aku mu rin ing magsilbi kareng kakung kabarkada
Maglakuatsa at lilimbun, at mamasyal kareng fiesta

Akit muku kareng disco, aku pa ing terak-terak
Pablasang dening kakung tud mangasias la keng talakad
Aku pa ing magbaskebol, keng ligligan ku sasabak
Mamandilu kareng ilug, o keng dagat a malualas

Bunduk la man tiktak katas, kanaku lang panukyatan
Nung anti ya man kakatas, iyang pilmi kung abutan
Alang makadaig kaku pangaras na keng tagalan
Mangabilis kung pulayi, kalaban ku mangalakuan

Ining santing kung lalaki at maragul ku katawan
Limang pulung kilung abias iyang agyu kung pusanan
Kening matikas kung porma, akit kaku ing tetagan
Tutung aku e pa laus, iyang tune piyakitan

Makanian ya king kasikan ining kanakung katawan
Ala kaku ing tatayid, keng makaba mang lakaran
Tutung e ku magpainawa talentu ku yang gamitan
Ketang mayap ampon ustu iyambag ku ing gelingan

Data ya ini nang aldo, pilming ini kakung dasan
Ipagkalub kaku ning Dios, keng panaun a daratang
Mako ku man keting yatu ala kakung kapanisian
Gewa ku ngan itang dapat at king bie ku e mesayang

Posted in Bie, PL Sergio Gramonte Calayag, Poesia, Poeta Laureado | Leave a comment

“PAKAKALALE KANG MANGAMANU”

Posted on August 10, 2023 by inglibrarian

Ing Amanu anting pakpak ning ayup
Atuki ning angin munta king malaut
Inya ingatan meng papawal king asbuk
Nung makasira ya e mu ne bubugnus.

Uling ing salita a kekang pepalwal
E mu ne malyaring isinup at kwanan
Anti mo ing ayup keka yang bulbulan
Nung tuki ning angin, agyu mung tipunan?

Ing kabas na niti palwal kang salita
Ketang e katutwan ampon makasira
E mu na alarin ing maling megawa
‘Nya balang amanu pakasuryan mu pa.

Bayu mo ibugnus ding kekang amanu
Isipan mong mayap pagaralan ustu.

< Tulang ning Magalang >
🍃 melanie5march2019 🍃

Posted in Mala-Sonetu, Panugali, Poesia, Poetisa Melanie Cunanan Naguit | Leave a comment

ING MALUKANG PAGKARINAN

Posted on August 10, 2023 by inglibrarian

nang: PL Sergio Gramonte Calayag

Ing kauran yang paratang, ala ka man salilungan
At keng marimlang panaun ala ka ring pagkambilan
Mapaling aslag ning aldo, ala keka ing magpanpan
Tutung misna king kasakit, alang baleng pagsantungan

Tutung alang maniaman pa, keng malukang pagkarinan
Yumung lugud at pakamal, kareng pusu makatanam
Mengari yang metung sibul, dadagus yang alang tuknang
Alang patad agyang dit’man danuman na misnang lalam

Pakiyarle kareng ayup, king taldawa la luluyun
Keting labuad manyulapo, kilub na ning patingapun
Pangaras na ning kabengian ketang pugad la mamapun
Mibalik la keng karinan, ilang keti mititipun

Pibale-bale ning tau, ini iyang kayang pugad
Tune iyang pagsantungan deni nang mikakapatad
Ing e pamikakaintindi, keni maulu yang agad
Nung ninu ing migkulangan iyang agad maniad tawad

Nanu ya mang klaseng bale, ing malukang pagkarinan
Malasakit ning pamilya iyang tutung pakamalan.
Ini nang mayumung lugud, kasing yumu ning panilan
Tune ini mayayakit at keng pusu makalulan

Kareng baleng alang lugud, e kanu pibale-bale
Pablasang ini yang sangkap, ining lugud a dalise
‘nia sasaya ing pamilya maging mayan iti nang bie
Ini nang mayumung lugud, tune iya ing panyese.

Posted in PL Sergio Gramonte Calayag, Poesia, Poeta Laureado | Leave a comment

LUGURAN YA INING LUGAL

Posted on August 9, 2023 by inglibrarian

nang: PL Sergio Gramonte Calayag

Deng tanaman ‘lang dagdagan ban ing albug yang alisyan
Ing akakit tamu ngeni, ‘lang patugut pamututan
Inia ala nang sisipsip, at ing gabun dadagus ngan
Kagagawan da reng tau, pansarili ing isipan
E na bala ing perwisyu ila sanang makinabang
Tutung alang paglalawe keng panaun a daratang

Nung kabud na e bubulad keng maling karaptanan
Tutung datang itang aldo, tauli ya ing kapanisian
Atin batas makasulat patungkul ya keting agham
“Nung nanu man ing megalo, pilming iyang atin turan”
E mu ngeni ing pakibat, nung e panaung daratang
Mengari ya ketang sugat, atin peklat a malakuan

Tutu tamung pikabaluan, atsu keng kasalesayan
Ing lagyu na ning Pampanga menibat ya ketang pampang
Ketang bebe na ning ilog ilang keti manuknangan
Dapot dakal lang tanaman, ilang akit pakatanam
Inia agyang atin albug ketang ilog yang dugpanan
At ing danum yang masisip kareng dakal a tanaman

Ngeni linto ining albug, dakal lulto kapanisian
Sasabian ing San Miguel beer, ketang airport a gagawan
Itang lugal na ning danum iyang pilit tatambakan
Inia mitas ya ing lugal, at ing danum yang mesakal
Pemate do reng tanaman, kayalili ala no man
Inia ini yang tandanan, manikua ta sanang aral

Tutung e pa naman tauli, kalingapan iyang gawan
E mu purus nang salita, alang aksyon a gagawan
Iyagkat lang siping bale, pati rening mamuntukan
Ing tanam tang pasibayu, ilang sesen at gambulan
Parusan la reng manyira, ban mayampat kamulangan
Ipakit ya itang lugud, keni labuad kapampangan

(Dakal salamat kang PL Orlando Dizon)
August 8, 2023

Posted in Kalikasan, PL Sergio Gramonte Calayag, Poesia, Poeta Laureado | Leave a comment

Ing Amanu Tamu

Posted on August 8, 2023 by inglibrarian

Dapat, ngeni pa mu, sucat tang migunam
qñg cabilian na ning amanu tang calam,
uling dacal na la ring alang paquialam,
qñg amanung binye na ning Dios a malam.

Palabas ta na mung limang pulung banua…
Malamang, malaus neng matda inaua;
Nung ing capampangan e ne mangisnaua,
ninu ing mematlud qñg bie nang saliua?

Dening bayung bait qñg quecatang labuad,
qñg amanu tamu pasusuan lang agad,
nung qñg capampangan tambing lang miyanad,
ing amanung sisuan sican ya talacad.

Ing amanu tamu e ya sucat mate;
Inya sa’t ngeni pa sagipan ta’ ne bie.

E. P. D.
August 7, 2023

Posted in Amanung Sisuan, PL Eric Dizon, Poesia | Leave a comment

ING KARATUNAN

Posted on August 8, 2023 by inglibrarian

nang: PL Sergio Gramonte Calayag

Ing sanu mang lugal alang karatunan
Pa’intunang asenso, tutung e ya datang
Taung mamuhunan, deni e de dayuan
Takut ing mimiral atin agam -agam

Nung ing kapayapan iyang dinan lugal
Keng sintang balayan mayap ing ipabal
Ing mayap a turu ampon ing masabal
Dapuk keng sarili, ing pamibiebieng mal

Keng pusu ning tau nung iyang mamale
Mayumu nang lugud iya ing idake
Mika-karatunan pakamalan nang bie
Lugud at pakamal, iya ing masese

Ining karatunan keti magumpisa
Lugud ding pengari, iya ing mumuna
Itang kagalangan keni nang pamilya
Iyang manatili karening pusu da

Potang ining lugud iya ing mituru
Anting metung bini iya ing tumubu
Sesen ya’t gambulan, lumabung yang ustu
Itang keang bunga misna ya kayumu

Ing mayumung lugud, king pusu mitanam
Tutung mikabunga misna king kaniaman
Inia mayayakit, ita nang kamalan
Keti magumpisa itang karatunan

(Peace like charity, begins at home. .
Franklin D. Roosevelt)

Posted in PL Sergio Gramonte Calayag, Poesia, Poeta Laureado | Leave a comment

ING AMANUNG KAPAMPANGAN

Posted on August 8, 2023 by inglibrarian

nang: PL Sergio Gramonte Calayag

Keti Kalibutnang Luzon, ing Pampanga yang mayakit
Dakal taung matenakan kapampangan yang dadalit
Malagud lang parang tau, keng pusu da makadukit
Ilang liping Maharlika, keti babo niting sulip

Amanu dang bibitbitan iyang sakdal keang leguan
Iya naman ing amana kareni nang pipumpunan
Sinese de at dinilig, gimbulan at pekamalan
Keng kekaba ning panaun, tutung ini e pebustan

Kekaba na ning panaun tutung e ya melumpawi
Keti labuad kapampangan iyang tutung menatili
Literatura’t kultura tune ini e tebili pisawili
Manibat pa ‘niang minuna, liguran e pisawili

Dening taung taga-ilog, makapadurut keng gilid
Ing amanung kapampangan tutung ini e medaig
Bagkus ilang milubanan, sasalitang magkapilit
Mapwersa lang magsalita agyang ilang magkasakit

‘nia kanakung pagmadagul kapamkung amanu
Salitang magdili-dili, keti babo niting yatu
Potang iya ing sasabian alalasang misnang yumu
Kasi yumu ning panilan, mayumu yang misnang yumu

Inia sana pakamalan, ing amanu tamung menan
E pabustan yang sisiran, bagkus iyang palabungan
Ban kanita e ya matda, keti babo ning sikluban
Pagmaragul ing amanu, ing amanung kapampangan

Posted in Amanung Sisuan, PL Sergio Gramonte Calayag, Poesia, Poeta Laureado | Leave a comment

SIRAC: E Ca Magtiuala Caring Maroc

Posted on August 7, 2023 by inglibrarian

11:29 E bala nang tau pabalausnan mu king bale mu, uling tutu lang dacal ding silu da ring tosu.

11:30 Mengaring metung a ayup a pangati king pugad, macanian pin ing atiu king pusu ning palalu; mengari yang metung a espiang magumasid king kecang pangatalabu.

11:31 parating magumasid ban palto nang maroc ing mayap, agiang king mangaintulid capurian atin ya pa mu rin apipintas.

August 7, 2023; DIZLAG Farm, Resthouse & Resort.

Posted in Biblia, PL Orly M Dizon, Poeta Laureado | Leave a comment