SIRAC: Makisalamuha Ca Caring Kecang Ca-uri

Posted on August 17, 2023 by inglibrarian

13:7 Pacanan na na cang pacanan angga king dumine ca king keang pamanestima keca, caibat cuanan na cang adua o atlung ucdu caracal kesa king binie na keca, bandang tauli ica pa ing cailian na.

At potang mikit cong pasibayu balamu e na na ca cakilala, at magsinu-sinu ya pa nung ninu ica.

17:8 Inia mingat ca’t e pailinlang ban e ca mimura king sarili mung camulalan.

17:9 Potang ing taung mainfluencia aniahan na ca, pakit cang mikekelangan tanggap king aniaya na.

August 17, 2023; DIZLAG Farm, Resthouse & Resort.

Posted in Biblia, PL Orly M Dizon, Poeta Laureado | Leave a comment

“keni king pusu ku’t ukul”

Posted on August 17, 2023 by inglibrarian

anti kung matalik kalo a torniliu
neng ika nang mialung keni keng ukul ku;
ngana nang anti kung gilutan ning yatu,
at ngana nang timan ing ibie mu kaku.
keng kanakung ukul neng mamialung naka,
neng misan mitmu ku kasuelu’t pagasa,
anting manaya ku a miraup la pa
reng labi’t palad ta’t misagana mata.
atin naman misan anting malulumud
keng bignus nang uran ning sintang mepatlud;
lulub mu rin kakung mimin naka lugud;
ing napun ala nang bukas pa a manlud.
makanian man e ku layun a tuknangan
ing estiman daka kening pilubluban.

09/19/20 /11:50
kalual keng obra

Posted in Capampangan Shakespeare, Lugud, Mala-Sonetu, PL Tuazon Sabandal, Poesia | Leave a comment

ING ASU KUNG I TAGPI

Posted on August 16, 2023 by inglibrarian

nang: PL Sergio Gramonte Calayag

Kening kakung pamaglakbe, babaltangan ining dalan
Balang lugal pakalawan, ila rening tatandanan
Ban mitanam kening isip, deng lugal kung lalabasan
Potang aku ining muli, e malili agyang dit’man

Aganaka kakung asu, ‘niang anak pang mangalati
King marangle mamialungan karin kami mamulayi
Kayabe ing kakung asu, kayang lagyu itang Tagpi
Kabang ikaming lalabas, tutuknang ya at mimimi

Kanaku ya ping pagtakan, ba’t makanian ya gagawan
Milaut ya mu ping ditak, dening dikut ilang imian
Inia lulub keng isipan sarili ku yang kukutnan
Ining kayang panugali, iyang ating buring sabian

‘niang ikaming papuli na, medalumdum ya ing dalan
E mi balu ing oras na, ing delanan kakapkapan
Apansingan ke ing asu, delanan mi bawan-bawan
Inia iya ing tikian mi, at miyuli keng karinan

Kening asu kung l Tagpi, ating aral ikua kaya
Ating tanda a lalakuan, ing balang dadalanan na,
Makanian rin kareng tau, kabang iya ining tutua
Ing delanan keni nang bie, ating tandang lalawan na

E no dapat kakalinguan, deng taung linugud kaya.
Lalu na retang pengari, ilang kaya na migdala
Kareng tanda nang tandanan, ing kalinguan, ali na la
Ya ining mayumung lugud, kening pusu kinintal ya.

Posted in Bie, PL Sergio Gramonte Calayag, Poesia, Poeta Laureado | Leave a comment

IMPLUWENSIYA KENG TAU

Posted on August 16, 2023 by inglibrarian

nang: PL Sergio Gramonte Calayag

Maragul ya impluwensiya, ing pamilyang pakamalan
Talaturu ketang mayap, deng pengaring kaluguran
Malasakit at masabal, kareng pusu yang tatanam
Idala na keng kayang bie, kipmuan ya king kabanalan

Atin neman impluwensiya, talaturu keng escuela
Maganakang talaturu, alimbawa lang mumuna
Keng mayap dang panugali, mayayakit keng gawa da
Keng lawe ning kayanakan, modelu lang lalawan da

Deng kakialung at barkada, ilang atin impluwensiya
Keng karokan ampon ustu, iya ining takiki ra
Nung maina ya ining anak, keng karokan ya mipunta
Kausukan ning pamilya, tune keti mayakit ya

Nanu naman impluwensiya agisingan tang kultura
Mayayakit keni nang bie itang napun at kanita
Itang mayap panugali yang parati dang dadala
Tune ini yang ingatan, ingatan ne anggang-angga

Impluwensiya ning paligid, agisingan nang lipunan
Kakaluluan, kasaganan, iya ining adalanan
Tune keni ya mayakit, pangatau nang dadalan
Mayakit rin ing prinsipyu, ketang mayap manimbangan

Maragul ya impluwensiya kening bie ing social media
Ketang Facebook at internet akakit ya’t ababasa
Deng mikitid pang-unawa, kalaraman maniwala
Ketang e ra kamalayan, kapanwalan masisira

Inia ini nang pamilya anting metung a escuela
Ituru ya itang mayap, ban deng anak yang idala
Nanu ya mang impluwensiya, potang ini ing datang ya
Itang mayap ing magbabo, a mituru keng pamilya

Posted in PL Sergio Gramonte Calayag, Poesia, Poeta Laureado, Tau | Leave a comment

LUGUD NlNG lMA KENG ANAK

Posted on August 16, 2023 by inglibrarian

nang: Sergio G. Calayag

Metung la mu panandaman nitang pungul at ning lma
Sabe lang karelang pusu, neng pipintig ilang adua
Siyam yang bulan a mamale, inya lugud abitasa
Kaingatan yang gagawan, pakamal na kayang kusa

Makanian ing pami-ugne, nitang lndu ampon anak
Menibat keng pangakagli, angga pota yang misapuak
Dakal sakit panandaman, ala ketang pamibalak
Sabla-sabla pibabatan, uling lugud yang masapsap

Ing daya na ampon laman, daya’t laman ne mu naman
Nitang lndung kipmuan lugud kening kayang pakamalan
Potang ini yang mibait, ing lawe na’t panimanman
Tune ini e kakawang kabang iyang paragulan

Ing sakit na nitang lndu, nung keka yang pakalawan
Mamigunam masalese, kening kekang pakamalan
Balikdan mu ing milabas, pota ilang a kalingwan
Lugud nang tiktak dalise tutung e mu abayaran

Maybug maspak keyang salu potang ikang malilili
Pangaral na ampon anad, a kalingwan mula reni
Dala nitang impluwensiya, e ayagwanta ing sarili
Peimburisan me’ng kekang lnang, keng e ustu ka memili

Magbalik ka! Ketang salu nitang pakamalang lma
Ilapit me’ng kekang buntuk ban ing pali abitasa
Damdaman meng mikaluku, itang paling e matatda
Uling dening kekong pusu, mikalugud ikong adua

Posted in Indu, PL Sergio Gramonte Calayag, Poesia, Poeta Laureado | Leave a comment

TELAKAD KE’NG SARILI KU

Posted on August 16, 2023 by inglibrarian

nang: PL Sergio Gramonte Calayag

Iniang aku ing magaral, aku ining mengatuknang
Pauli na nitang sakit kening bie ku yang dinatang
Milisang ku kasukasuan, paninap ku mesira ngan
Ining kanakung sarili parating kalulunusan

Megaral kung pasibayu, ban asundu’ng pamagaral
Ing apat a pulung aldo, ining uran e tinuknang
Mesakit kung pasibayu, ini iyang meging sangkan
Inia ining pamagaral iyang tutung metigagal

Akakit ke itang aldo iyang saslag king aslagan
Pangaras ning gatpanapun, iyang lulbug king albugan
Kanita ku mamigunam, keng maluka kung kabilian
Anting metung parasito, magpabayat ing gagawan

Memanandam nakung libru, kareni nang siping bale
Readers Digest deng babasan, ban alabanan ing lumbe
Deng amanung e aintindian, ilang susulat kung pane
Manandan kung diksyunaryu, kabaldugan lawan keni

Dinatang ya itang oras lepitan ke itang Madre
Ing mag-working student ku, pamagaral makayari
Sister Andrea yang mebisa, tiwala na kaku binie
Ayari keng secondarya, dakal tiaga ing miliari

Nung pepainan ing kakung lub, anggang-angga pabayat ku
Dapot ini e ku buri, telakad ke’ng sarili ku
Ing buri ku makasaup, pamilya’t aliwang tau
‘nia sinaupan ing sarili, migpursige ing gewa ku

August 14, 2023

Posted in Bie, PL Sergio Gramonte Calayag, Poesia, Poeta Laureado | Leave a comment

MAMILING MAYAP A TAU

Posted on August 16, 2023 by inglibrarian

nang: PL Sergio Gramonte Calayag

Pulitikung mayap imbut, ila reng dapat maniambut
Detang maburi ketang bantut, ila sanang mangasambut
Pablasang ing kaisipan tutung misna king kabuluk
Ilako la ketang puesto, mayap tau deng ilukluk

Mangising ku at kakalbit, ining balen pakamalan
Nung deng talan e la mayap, makalunus ining tibuan
Malalakuan keng panyulung, pauli ning katakawan
Kulang lang pamamatiawan, sarili mu ing lalawan

Kareni nang lilibutad, kapagnasan manungkulan
Ila sana reng sanakan, nung nanu ya ing parasan
Nanu kaya keang layun, bakit bisang mamuntukan
O metung ya mung pabayat, kening kaya nang tungkulan

Nung barangay pisasabian, nukarin ya ing angganan
Pakalawan masalese itang kaya nang bekuran
Nung ala kang kamalayan, keting lugal tatalpakan
Pasukad me iyang dapat, iyang dapat pakibaluan

Nung sakali mikalman ka, Ika ining manungkulan
Gawan mu na itang mayap ban ing bakas iyang lakuan
Itang bakas a matsura o gawa ka keng kayapan
Ila rening pisasabian keng panaun a daratang

Inia mayap ing pilinan kareni nang kandidatu
Ban kanita e sumisi, deng bibili kening puestu
Imbes iya ing magsilbi, pagsilbian me’ng todung-todu
Masayang ya ing panaun masayang ing kekang botu

August 14, 2023

Posted in PL Sergio Gramonte Calayag, Poesia, Poeta Laureado | Leave a comment

“simbut”

Posted on August 15, 2023 by inglibrarian

migsakub-sakinda, anting turung asu;
migsakub-sakinda, ita ing gewa ku;
migsakub-sakinda, ita ing gewa mu;
migsakub-sakinda ing gewa ta kuartu.
pero bayu ita, anti kata wari
a Eba at Adan a pula-pulayi,
tagalan king ardin, alang balung mali
aggiang lubas katang adduang pupulayi.
kaibat tang mepagal king pamitagalan,
peipagal tang lakuas king kadduang tegalan,
uling ing inawa iyang ketagalan,
sakub-sakinda ta iting tatagalan.
misanib ta sikan, binie ta ing sabla,
at matula katang simbut na ning ina.

08/10/23 //23:11
kaibat mengan siopao

Posted in Capampangan Shakespeare, Mala-Sonetu, PL Tuazon Sabandal, saddia3x | Leave a comment

ING BOKASYON MAGUMPISA KENG PIBALE-BALE

Posted on August 15, 2023 by inglibrarian

nang: PL Sergio Gramonte Calayag

Ing bokasyon na ning tau, pakiyarle ketang lugud, keng karinan magumpisa
Pengari deng talaturu, kilub ning pibale-bale anting metung a escuela
Ila reni deng modelu, tukian bakas dening anak alimbawang lalawan la
A dapat dang pamarisan, keni nang bieng dadalanan, nukarin la man mipunta

Itang mayumu dang lugud, kening pusu makalulan iyang tune sisinupan
Kalingapan ing mumuna sesesen ya’t gagambulan anting metung a tanaman
Kaingatan aldo-aldo, lalako dening manyira kabang ilang paragulan
Makanian ya ing pamilya, yumung lugud ing panyese, kareng pusu yang lululan

Kipmuang pali’ng paparandam, anting aping milalablab maglipato king katasan
E pabustan iyang matda, at sala na e mawala keti babo ning sikluban
Kakalabkab keang pali, tutu yang mikakaluku, kareng salu makalulan
Malasakit at masabal, iyang tutung panandaman keng malukang pagkarinan

Itang aral dang tuturu, deng malugud a pengari atsu busal ning pamilya,
Tune ini iyang pugad, yumung lugud at pakamal, makalulan keng pusu da
Inia alang kasangkanan ing pakamalang pamilya, kabanalan mayakit ya
Mitalanan la reng gamat, kagalangan ing mimiral, pairalan kening bie da

‘Nia nanu man ing akakit, dening kayang meging supling iya tutung pakiapusan
Pablasang deni nang anak ilang tune mapakiapus, pengari da ‘lang apusan
Ketang e ra kamalayan ila rening talaturu, keng pamilyang pakamalan
Mumuna ing kaingatan, keng amanung sasambitlan at pangimut dang gagawan

Nung ika ing mananaman, tune ika ing mamupul, nanu ya mang kekang tenam
Pablasang e ya mamunga, nung mangga yang kekang tenam, at mupul kang metung pakuan
Makanian rin keng pamilya, ing bokasyon yang tatanam kareni nang pakamalan
Datang ya itang aldo, pangaras ning pamamupul, kabanalan ing pupulan.

(Sukad 24)

August 11, 2023

Posted in PL Sergio Gramonte Calayag, Poesia, Poeta Laureado | Leave a comment

Tribia keng amanu tamu:

Posted on August 15, 2023 by inglibrarian

istung deng amanu ibat ya keng diptonggu, e ta la pu susuglungan “ng”.

alimbawa pu:

gule (gulay)
bale (balay)
ibe (ibay)
sale (salay)
ate (atay)
kile (kilay)
sabo (sabaw)
galo (galaw)
iso (isaw)
bito (bitaw)
tando (tandaw)

e la pu kasi maging “gulayng” (gulaing) o “palayng” (palaing), o “isawng” (isaung) o “galawng” (galaung) king saddia.

e ra pu kalupa reni a maliaring suglungan “ng”:

ke (ku ya)
de (da ya)
te (ta ya)
ne (na ya)
me (mu ya)
mo (mu la)
no (na la)
to (ta la)
do (da la)
ko (ku la)

-------===@===-------

atin metung a pamanisplika, a nung e ku magkamali, ibat ya keng melapupuring PL Viding Ocampo kanita, a ngana, reng kanung Kapampangan e ra buri ing sualang sasainsing inia reng amanu mapupupus keng sualang sasainsing anti mo ring bal”ay”, gul”ay”, at”ay” gewa ra lang “e” suala (gule, bale, ate), anti mu rin ing e ra buri ing sualang kakaung inia reng sualang kakaung anti mo reng sab”aw”, tak”aw”, ald”aw” elilan da lang “o” suala (sabo, tako, aldo).

aku naman pu ing apansinan ku, ing amanung sainsing a “aray” iya mu kabud amanung sasaing suala a e meging “e” itang “ay” na angga ngeni.

Posted in Amanung Sisuan, PL Tuazon Sabandal | Leave a comment