27:16 Ing taung e mu apaniualan caring lihim, ing sablang tiuala mu caya mababating at capilan man e na la akit ding uring cacaluguran a keang buri.
27:17 Pacamalan me ing metung a cacaluguran at maging tapat ca da caya, dapot nung uari’t keca lang bilalag ding keang lihim, e mu ne asahan pang makiabe keca;
27:18 uling nung macananu neng sisintangan ning tau ing calupa nang tau king pamacamate caya, macanian mung apate ing pacamal ning cacaluguran mu.
Libo siam a dalan, pitung pulu’t adua ya ing banua Bulan Julyo at Agosto, iya naman ining petsa Itang urang alang tuknang, keti Luzon karin digpa Makamal lugal yang limbug, alang akit a mamala
Keti balen tamung Bamban atandanan ing milabas Memanuran a masikan, alang patna’t kakabukas Apat a pulung aldo na tune ini iyang miras Kalibutnang na ning Luzon, iyang keni pin mipaspas
Pauli na niting uran, mengasira ing kabiayan Keng dagul na ning danuman mengalbug la ding asikan Inia keti nang miliari, megkulangang keng pamangan Dakal tau reng sinaingsing, itang danup panandaman
Potang Ika ining lumual, nukarin ka man mipunta Alang akit a malangi, alang akit a mamala Ining sabla mabasa ngan, ing danuman akakit ya Memaglapo la reng ilog, iyang akit mung sasaka
‘yang tutu king kasakit apat a pulung aldo uran Iyang akit makababad ing malualas a palayan Dadanggutan ing aliwa, ketang kawa yang palangian Saka ini yang bebewan ban atin la mung apangan
Lipat na ning kasakitan, kareng memalen meyakit Ing masabal da reng tau, yumung lugud at malasakit Yayabut de ing kasaupan kening biling magigipit Iyabut de ing gamat da, ila rening dadalakit
Akakit ku kareng tau, ketang ditak a pamangan Ila rening abe-abe rampulayan deng keraklan Sabe-sabe lang mamangan ban ing atian mikalaman Dadake do retang ala, ban ing danup yang alisyan
Keng delubyung adalanan, mamawus king Mayupaya Kasakitan adalanan, e mebating ing tiwala Inia ilang pasalamat, king malugud a Dios lbpa Akabiusan ing pagsubuk, kapanwalan e mewala
Meligogo la reng tau, kabud iyang abalitan Iya ini ing mumuli keti bangsa tamung tibuan Mipanagkat at salubung, ketang airport a dugpanan Ban kanita iyang akit, akaul ya saka uman
Keti balen ning Concepcion iyang tutung kabalitan Peka-anak yang tengalan at deng tau kaluguran Makabuklat ing bekuran kareng taung mamaniatang Ila reni deng arapan nanu ya man ing kabilian
Iyang meging gobernador, keti lalawigang Tarlac Ing gelingan at tepangan kareng tau yang pemalas Peka-anak yang senador, senado ning Pilipinas Mabanglo ya kareng tau iyang tutung meging sikat
Ketang kayang kasikatan, anting aping milalablab Kareng pusu ning ninuman iya ining kakalabkab Ing “writ of habeas corpus” pepalako at petupad Nitang Presidente Marcos at martial law yang binagsak
Ing martial law yang sinupil karapatan da reng tau Lalako no katuliran ing militar yang mibabo Pengulung deng oposisyon, mumuna ne I Aquino Pitung banua yang migdusa kewani de kareng tau
Atsu ya man keng sukulan, pilubluban e pepainan Keng apat apulung aldo e mamangan agyang dit’man Masikan man kaisipan, at mimina ya katawan Mika-sakit ya king pusu, kailangan yang operaan
Iyang dela America iya ngeni ing megaling Maliliari Pilipinas, e binale-wala pangsin Kasakitan ding memalen panandaman ing saingsing Inia belakan nang muli, ining tau a magiting
Kabud iyang abalitan iyang muli Pilipinas Sasalubung la reng tau, kipmuang tula ing abakas Keti balen tamung Bamban deng salubung ilang sebat Karin pa mu Mabalacat ila rening pepakuldas.
Munta Menila makabawal, deng mumunta sasabatan Tune ala lang agawa, e re akit ing saganan Biglang-bigla ing balita, iya ini ing berilan Mengasdan la reng memalen, itang lungkut penandaman
Keng lugud na king balayan binuis ne ing sarili na Nitang Benigno Simeon Aquino (Jr.) ban kalayan yang kamtan ta Misambulat karin tarmac, ining malutung daya na Migising la reng memalen, kadakilaan pepabal na.
Ninoy, nganang menabilin keng anak nang pakamalan Kabang iya ing magdusa keng dalumdum ning sukulan “Atsu na keng kekang gamat ing desisyun dapat gawan Makalawut, akung dili, keng siping yu ala ku man”
“Alang marangal a nacion keti babo niting yatu A dakilang matutungge nun’e ining bansa tamu Luguran ya at pagsilbian kilub pusu’t pangatau Ala nang taung marangal nung e rening Pilipino”
“Noynoy, pakamalang anak, mikabie kang kipmuang dangal Kanaku ring panabilin ining bansa tamung mal Malasakit e lalako kayantabe ing pakamal Katulirang medamusak, ing katututan yang mesakal”
Mil nueve sientos sietenta’y dos, Setiembre ya ing petsa Aldo beinte uno, Batas Militar ‘yang mideklara Y President Ferdinand E. Marcos ‘yang menimuna Kakalaban keng gobierno ila rening pakulung na
Mengibabo deng militar, mipaylalam ‘lang sibilyan Milako ing katuliran, ing justicia mipabustan At nung ika’ng kakalaban, subersibo dakang awsan Madamput ka at makulung o mabugbug king kulungan
Dinatang ing panaun, y Noynoy ‘yang presidente Penabilin nang Tata na, gewa na ngang maselese Pekamalan at pegsilbian, yumung lugud madalise Pamanyuyu nang matapat tutung e na pikarine
Iniang misan kayabakan, libutad na ning asikan Kule dilo na ing pale, at malapit nang palutan Dening ayup susulapo iya ining atiglapan Ila reng bisang mamiesta, gigutan da at gisanan
Libutad na ning marangle ating metung tawu-tawuan Dening ayup a lilibad iya ngening apansingan Salake no king palayan dapot ilang mipatuknang Ining taung king libutad pota ilang pamarilan
‘nia gewa da retang ayup ila pa rening migpulung Lawen de pa nung tutu ya, at saka la ping sumulung Deng aliwa dinurut la, keng palayan la linuyun Kabalik da ketang pugad kanya-kanya lang opinyun,
Mengamanu ya ing metung, tutung tau ing ikit ku Mekibat ya ing kakadua, wa, babanten naka tamu Ngana naman nitang katlu, ing akakit e ya tau Meyari ing kapulungan, alang balu, agyang nanu
Sinulapo’ng manimunu, iya ini ing dirutan Kabalik na yang belita nung nanu ing apansingan E ya tau ing magbante, itamu reng pamatakutan At ing metung yang mengutang, bakit e mu patutuanan
Ngana nitang manimunu, simbitlan no reng amanu Ing ikit ku e ya tau, mamatakut ya.mung tutu Ban maniwala ke keka, nanu ya ing basihan mu ? Ala yang tatalnan celfone, inia e ya tutung tau
Kanaku yang apansingan, ing kuaderno kung tatalnan Ikit ko reng pakasulat, patungkul keng kaluguran Balang metung ‘lang babasan, at nong santing kabaldugan A-isip ku lang isulat, keng poesiang kipmuang leguan
Ining pamikaluguran e ya maragul a dake Dapot misna king ulaga, maygit pa keng milyung bage ‘Yang sangkap a mayulaga, kening kekang pamibie-bie Tune ini e asali, ‘tin neman ligayang tune
E mabibie dili-dili keti babo niting yatu, Dening kekang parang tau, tune ilang kayabe mu. Lalu na ing kaluguran, a parati keng siping mu Yumung lugud a mitanam,at ing bungang misnang yumu
Dening kekang kaluguran, akasalubung kening bie Ila reni detang babie, dakal kule keni nang bie Pauli na nitang lugud, mapali lang mamantabe Sasaya ya’t maging mayan, kabang ika ing maglakbe
Ining tune kaluguran, pasiknangan ing kekang lub Iyang munang maniwala, kareng grasyang mipagkalub Nung atin problemang datang, tune e naka ilumub Bagkus ika na’ng sagipan, e na bustan ika’ng manyud
Kening pamikaluguran, kaladua mu yang aslagan Yumung lugud ing magbabo, alang akit katakawan Ali ya makasarili, ing kasopan iyang duduang Makabuklat la reng palad, ing gamat na yang abutan
E ya man parating atyu, makasiping kekang lele Dapot iya ing aligan, iyang tune mamantabe Reyna ka keng panimanman, keng pusu yang mamalale Sasamasan itang mali, ban e lunto makarine
Anya ilang panintunan, deng tapat a kaluguran Keng maskup man o kanawan, tutung e na ka pin lakuan E ya taksil o maglilu, pamingua ka nung kailangan Anti ka mong mekakulkul makamal a kayamanan
Dakal tau babo yatu e asaupan ing sarili Inia inggit ing magbabo, iyang tutung maliliari Uling ila rening bigo, manintun la pang kadame Keni lulual ing indredus, kalaraman lang metayi
Nanu ya man ing gagawan, itang mayap ing parasan Nung atin taung marirya, ila rening e pansingan Ilang mamie katakiran kening bie mung pakamalan Ila reng mamaguanta keng tagumpe panikuanan
Agyang gawan mu lang mayap, umisan ka at palkaran Palkaran ka kareng tau, o Ika ing pamanyiran Deni mayap la rin tau, itanam mu keng isipan Pota ketang ka-orasan problema ya ing dinatang
Dakal la reng kasangkanan bakit iyang maliliari Ating sugat pilubluban, magnaknak ya angga ngeni Pota ating pakiabutan, e ayabut keni nang bie Parasan na e ne ikua, mebigu ya ampon sawi
Keng kabiguan nang atanggap pikasaman ing sarili Itang inggit ampon dirya, keng pusu e malumpawi Alang tapang a mamarap ing kaduagan menatili Panandaman ing kabiguan kukumpara ing kayang bie,
Nung makanian gawan keka, ibie ing kapatawaran Keng beyatan ning panandam, iya mismu ing mamusan Tune ini yang dadalan, e ne buring ibili man Iyang metua ketang idad, iyang metuang alang ketuan
Salamat kang Sir Robby P Tantingco ning HAU-CKS August 20, 2022
Ing lugud anti yang alun e ya patugut mamagus E lalawan kayang dasan, inia e ya mapapatlud Nanu man ing kayang dasan, atin bakas makabukud Ing lakuan na misnang tibe, anti ya mo ketang buklud
Pakiyarle keng briliante, ing kislap na e mamako Itang kinang at ing brilyo, makasilong akakit mo Makanian ya ining lugud potang iyang sesesen mo Kabang ini iyang luluat, ulaga na yang magbabo
Kareng ima ning pamilya iya ining pakalawan Ing lugud na kareng anak, ketang kagli na umpisan Ketang kilub na ning atian, atsu karin siam a bulan Keang lugud e man tuknang kabang iyang paragulan
Pablasang yang bungang lugud ing anak nang pakamalan Ala kayang kapabustan, kalingapan ing gagawan Anting gaindu a lulukub, keang sisi kaluguran Ipaglualo nong parati, nung lalapit deng kasalang
Inia lugud e kukupas kareng pusu yang ilulan Kabud ini yang milulan mikabungang kapayapan Deng bunga na e abilang, laksa-laksa lang lalawan Iya ini ing ingatan, saka iyang pakamalan
Dakal a salamat Kang Atseng Melanie Cunanan Naguit
