ibat ketang aldo mitagmu ta mata, mikapaninap kung tairan daka sana kabang king pasiliu agnan tang magmartsa papunta king altar ban mapse tipan ta. dapot ing miliari, meyala mung misan ing paninapan kung martsa tang miyagnan uling gilutan me ing pusu at likuan kaibat keng ababa armas ing Bataan. ngeni, metung namu ing adduan ku mekad, ban ing paninap kung magmartsa matupad; potang ing angel ta miras ne keng idad, tulutan mung aku ing keya manatad. anting ika na rin itang tatairan ku pablasang baklas ya keng tagle leguan mu.
02/07/23 //02:39 kabang magkape at mamng putung alaru
***bandi ne pu ning babai ing sapunggul ding sampaga.
Ketang lele na ning ilog, at lalam da reng pun kuayan Sapul-sapulan ning angin kabang ika’ng makaduyan Potang Ilang lalangitngit, musika lang daramdaman, Susulapo’ng kekang diwa, maglipato kalangitan
Leguan ning naturalesa, kailangan ne niting tau Itang angin a malinis, marimla yang damdaman mu Makasikan keng katawan, ing babie nang oksihenu Inia dapat pakamalan ingatan ya ing gawan mu
Panaun na ning pandemia iyang tutung adalanan Dakal tau mengasintang, itang angin yang kailangan Pakabote iyang bibie, iti ating kabayaran Samantalang iyang libri, a binie na ning Miglalang
Kagagawan da reng tau, bakit yatu mipakanian Malasakit at masabal kening pusu e milulan Dakal tutu ing kasiran yang karela dang gagawan Makalunus ing miliari, inya ngeni lalarinan
Buri da ining asensu, at magdala yang kasiran Itang simpli malalakuan tune e ra papansingan Dapot ngeni la sisisi, itang napun babalikan Tutung ini yang matauli, laganap na ing kasiran
Pakalawan la reng baryu, pamaten do rening kuayan E mu kuayan iyang mate, pati anging sisingapan Tune ini e lalawan epekto na keng karinan Itang dinat iyang datang tutung ala nang panlaban
Ustung susulat tamu pu, panikuanan tamung metung lamu adle reng estropa. Aparti karing soneto ampong mala-soneto a makayaliwa ya ing tawling estropa uling adua yamung linya (couplet) kabang deng mumunang atlu tsapat lang linya (quatrain), nung deng mumunang estropa tsanam lang linya (sestet), dapat angga keng mayari ya, tsanam la ngan linya reng estropa. Ing metung a estropa anggiang anam yang linyang mayayakit, nung adwa la reng megamit a sunis, alimbawa reng mumunang atlung linya miririma la, kayi reng tatawling atlung linya miririma la, ing tutu nang adle kanita adua lang titlung linya (tercet) a piyabe ania melili la kanita. Ing lunto sangkan kanita, megipit ya ing makudta ania e ne ayari ing kawatasan a tsanam la ngan linya reng estropa. Nung ing sabian tamu pu, iregular yang adle ania makanian ya, ala nang lunto masalase kareng kawatasan. Uling alimbawa pu nung ing makudta megipit ya king pamagrima, ing gawan na namu, deng aliwang estropa gawan nalang tsapat a linya, deng aliwa gawan na lang tsanam, deng aliwa gawan na lang titlu etc; etc;. Ngeni ustung inatu da la, iregular yapu adle ania makanian ngana na namu a para kanaku, e masanting.
Pitung mabayat nang sangkan ilang kanakung sambitlan Tunggal-tunggal kong banggitan kalaban ning kaligayan Ban manatili ing tula kening bie tang pakamalan Ila reni deng tandanan at kening bie ilang lisyan
1). E me sa pakisimpara, ining keka nang sarili Tune manyayang kang oras nung gagawan yang parati E ka maging produktibu kening kaluguran mung bie Itang dirya iyang lulub at keng pusu yang mamale
2). Nanu la man paninapan, ila reni reng pagobran Nung kabud mu la sasabian, at ala ka man gagawan Ing tagumpe e mu kamtan, e ayabut ing parasan Ika’ng kimut at magobra e na kabud panenayan
3). Nung makirandam keng tau, alang asabi mang mayap Panandaman keng sarili, ing apektadu kang ganap Lulungkut ya ining pusu, pilubluban yang babayat Inia e dapat makiabe, panimanman yang lumualas
4). Nung makasagap balita at negatibu la datang Ila rening pakiabaran, ining bie mu miyapektuan Pauli ning ditak oras keng balitang atin aral Tutung dakal makasira, alang saup kening bieng mal
5). Nung panayan lang magbayu, deni nang kaparang tau Ban kanita yang salese, pakamalang bangsa tamu Bakit e ka magumpisa, keng sarili, keka mismu Maging metung alimbawa, umpisan me kening bie mu
6). Isipan me’ng kaligayan at keng bie mu yang parasan Mabilis mu ing panaun e amalayang dadalan Balikdan mu ing milabas, itang simpli ampon mayan E pabayatnan ing mayan kanita e mibayatnan
7). Ing amanung “salamat pu” ‘yang uyat ning kaligayan Iyang parating sasabian, tutung e me kakalinguan Keng amanu mung inapse , maging mayan pilubluban Dening kalam tatanggapan, ila rening miragdagan
Dening pitung kasangkanan sumbagal keng kaligayan Inia lulungkut ing tau, ila reni deng gagawan Ila reni deng meangu sinulat “Trent hand for lifehack” Babie nala reng suhestyun ban kaligayan yang kamtan
Sasaya ya ing parokya, masaya ya ining pari Nanu la man deng problema, deng solusyun akit keti E pabayatnan panandam, negatibo ‘lako ngeni Potang deni deng alako, arapan ya ing bayung bie.
Ibat Kang: Edna L Sasing-Lao, MD When a priest is happy Rogate Ergo,Asia, the Catholic magazine on vocation
deng kanakung mata atin lang pamitan, ing kanakung pusu, makanian munaman, bage maluat ku nang pagduglan, at adduan ban tapus ing lumbe niting pilubluban. ing bage pamitan a akit ku na sa’ a kening pusu ku tutung munie tula: ing tiro ka buldit aggiang e mu seria, at ing atian anting seriang sasagana. aggiang keng litania pane makayabe ing atangal keka ing milagru ning bie, ing pusu ku yata e pa makabage dumanas king tulang ibie niting bage, inia angga ngeni bigu ku pa mata a tangal king bage adduan ku king Banua.
Durulung lang kekang bitis, karin lugal ning kutkutan At deng balang kekang takbang papunta lang kamatayan Ing dadalanan kening bie, paliku-liku yang dalan Ala yang kapupuntalan, dalan ning bie e gagalangan
Anti yang pulut panilan, tiktak yumu keng kaniaman Nitang labi ning babaing, keka, mabit king kasiran Ini tutung makasulat, kareng sulat Ding Kasebian Marapat ya mung lisyan, ban e manabu keng kasiran
Deng kayang mapaling uma, anting laru ning olivo Matalusad lang dadampi at dadagus keng labi mu Keng pamilya panandaman, ing bunga ning pamaglilo Kasakitan at kaguluan, kening bie mu, iyang lunto
Ken makanian a babai, dumayu ka, iyang lisyan Agyang itang kayang pasbul, tune e me lalapitan Uling ini makasira keng dadalan mung dangalan Potang iyang ikamate, iting kekang kayanakan
E ka kasi mekirandam, kekang tinggian mayap turu E ka mu rin sinikasu, deng turu ding talaturu At ngeni alang dangalan, arapan da rening tau Sasaingsing kasakitan, tutung ikang mengalulu
Deng aral apagaralan, kening bie mung adalanan Mabiasa kang gawang ustu, ‘gyang ini e mu sabian Uling ilang makasulat, keng libro na Ding kasebian E me sisias ing pusu mu, lng Guinung Dios iyang tukian
Keng bie na ning tau lalu kayanakan Abit ning barkada tutu king kasikan Potang mipanagkat keni nang lakaran Lilimbun keng dalan, alang kapagalan
Oras a lalabas, tune e amalayan Mitanam keng isip, itang kalayawan E man pasayangan, panaung dadalan Karelang sisiran itang paintungulan
Pane ining pasyal, mag-swimming, mag-party Tutung sasagakgak, masayang parati Edo man isipan deni nang pengari Saya ampon tula, keng isip ‘tsu keni
llang miyagkatan dening kabarkada Abak pang maranun, iya nang manaya Kabud na dumayu, balikid ala na E no man isipan, pamilyang manaya
Lawan mo reng ayup, keng parang lilibad Akit susulapo, malualas a labuad Malualas mang lugal, nung ilang mipadpad Katakup ning silim, mumuli keng pugad
Nung pakatingiran, akua me ing aral Nung nanung payabut, ,deni nang animal Keng bale manaya, pamilyang makamal Kekatamung tau, ini yang papabal
Tutung dakal kasangkanan, bakit metung talaturu? Pekamarangal propesyon, keti babo niting yatu Keng pamilya’t komunidad at mata reng parang tau Ing matas la panlalawe, anting metung a modelu
Iyang tutung mayayakit, malinis ka pamibiebie Tala-anad kareng anak at tatagkil karelang bie Anting metung misyuneru, kareng gawa mu patune Keti balen at escuela, matas keka ining lawe
Deng aral mung kekang tiru, misinup la’t e kelinguan Dening anak a magaral, ikit keka’ng kalingapan Binuklat mo kaisipan, ing kamangmangan alisyan Deng sinaupan mu’t segipan, tutung e ka makalinguan
Makunsuelo pakirandam, iyang meging abogado Pari, doktor, inhinyero, manungkulan, arkitekto Nanu ya man ing propesyon, babandera babo yato Aminan da ampon ali, dinalan la keng gamat mo
Luid kayu! luid kayu! Ikong talaturung mangarangal Pablasang deng kekong aral, ing kabiasnan yang pepabal Makasalale ing bukas, kareng gamat mung misnang mal Temasa da ing kanawan, pepabitbit mu ing dangal.
Kawatasan a misulat, a bunga ning kaisipan Patungkul la keng amanu, ing amanung kapampangan Iyang tutung amulatan, kareng kakung pipumpunan Aldo-aldo gagamitan, keng malukang kakarinan
Keng sarili ‘yang dinatang, aku ing manialupsupan Deng gagale neng balasyun, ala nakung darandaman Deng zarzuela at comedia, deng poesia at crissotan Mewala lang anting bula, keng kulturang kapampangan
Kening malalam kung tudtud. tutung aku ing mipakde Anting sundalus ning gerra, talakad king pangapase Telanan ke’ng kakung pluma. ing sandata kung milele Ginamit ke keng labanan, ban kanita mangumpe
Kabang aku ing susulat, manintun kung manantabe Ing panyulat kung milele, mabagal ya at manene Anting anak magpatalan, lele dingding mangulabe Miragsa at tatalakad, e petugut megpursige
Karing kilub ning AUF, Knights of Rizal keng pulung da Atin tau a ginale, matenakan yang poeta At malagua keng lepitan, saka aku’ng pekilala Poeta Romy Rodriguez, laureadu yang mekilala.
Keng burul nang Tang Naring (Maniago), karin balen ning Mexico Akilala ke’y Frank Guinto, metung ya rin a laureado Mibasa’t mikaluguran, ining maganakang tao Makanian ing pami-abe, ning metung a caballero.
Salamat keng Holy Angel, at kang Sir Robby Tantingco Kabud iyang akilala, tiwala na binie kako Center for Kapampangan Studies, kasopan na kaku E kalinguan kapilan man, pasalamat ing babie ko.
Pekilala neng Tatang Frank, Tatang Virgilio Calilung Metung ya ring ginabe, kawatasan ku’ng sumulung Midinan kung sikanan lub, potang atin pamitipun Gagale ku at gagambul, ketang aus ning panaun.
Salamat kareng poeta, alang sawang mamantabe Pamisulung keng kultura, panaun da iyang babie Atsu la man ‘liwang bangsa, isipan da atsu kene Ating pusu a malugud, ing lugud da madalise.
Maragul ku pasalamat, ‘bie king Ari ning Parnaso Renato Bonus Alzadon, poeta yang Capaseño Tiwala na kaku binie, ing korona ning laureado Simbul ne ning pamaglaban, ing amanu yang paglualo.
