VIRGILIO PINEDA CALILUNG

Posted on July 1, 2023 by inglibrarian

Poeta Laureado
Mayo 31, 1930 – Junio 27, 2016
nang: PL Sergio Gramonte Calayag

Ining mayap a kutsero pamibiebie na marangal
Tutung kaya mu akakit, malasakit at masabal
Kalingapan yang mumunà kareng sese nang animal
Ala kayang kapabustan pati kening pamilyang mal

Mibait ya at misapuak karin barrio ning Potrero
Baculud yang sintang balen, tune iyang pekasentro
Lalawigan a Pampanga pakamalan ne ring ustu
Talagambul ning kultura, literatura at amanu

Malugud nang lndung pipumpunan l Carmen Pineda
I Alfonso Calilung tune poetang kalupa na
Iyang miturung gumale agyang babo ning la mesa
Sinikàp na ining beluan a pigkalub ning Dios kaya

Agpang keng kayang istorya, mituknang ya pamagaral
Iniang memanyatang la dening Japon a dayuwan
Bista man e na aintindian ining gerra yang paratang
Eroplano da reng Sakang pemomba de ing karinan

Kayari ning gerra mundial obligasyon iyang tinggap
Karitela at kabayu sinese na la’t inagap
Sinundu ne’ng pamagaral uling tutu nang pigagap
Keng mura nang kaisipan pepakit ne’ng kayang lingap

Carolina Romero ing malagung taga-Baculud
Meging kabangal ning bie na, yumung lugud yang pibuklud
Siyam lang meging bunga da ning Mayupaya yang pegkalub
Mengayaring pamagaral ketang sikap mitaguyud

Makasulat, mababasa keng Banal A Kasulatan
Ing malugud a penganak kareng pengari piyakitan
Ing kumaba kayang bie na, masaplala ing kabiayan
Ikit tamu kang Tang Viliong, iyang dapat pamarisan

Nanu pata, ing kutsero metung yang kilalang tao
Pamoso yang Capampangan, pantas ya at matalino.
Akakit mu ing kababan keng pamilya’t pangatao
Iyang tune alimbawa keni balen sinta tamu

Virgilio P. Calilung, ing poetang matenakan
Anting bulung a melaglag, sumangid bie ing pintalan
Ketang Junio beinte siete mibalik ne king Miglalang
Keni Labuad Capampangan, ing ambag na e kalinguan

Posted in Parikil, PL Sergio Gramonte Calayag, Poesia, Poeta Laureado | Leave a comment

MESALAULA ING BIE NA?

Posted on June 29, 2023 by inglibrarian

nang: Sergio G. Calayag

Masalaula ya ing bie ko? Kutang ning laureadong poeta
Kabang iyang makarate ketang malambut nang kama
‘Yang maluat nang manandaman, kapaldanan pantunan na
Panandaman itang sakit ken sarili yang dadala

Mesalaula ing kayang bie ketang kayang kayanakan?
Balen Baculud nang tibuan pepakit na ing kagiwan
Mipande ya kaisipan, pamanggale ya’ng mitanam
Keng pusu’t isip mikintal ing susulat kawatasan

Mesalaula ing kabiayan, iniang iyang manintunan?
Ing maganakang kutsero, tutung dakal.balung gawàn
Ing pawas nang maralekàt sasagese keng katawan
Babiayan ne’ng pamilyang mal mipnung.linis a paralan

Mesalaula ing paninap kening sinta nang pamilya
Kareng siyam dang meging bunga, pamagaral meyari la
Kasipàgan ampon tiaga, misaupàn lang myasawa
Tune no nang menagumpe at mikabieng masaplala

Mesalaula itang lugud keng pakamalang asawa?
Liguran neng bukud tangi, asikaso pepabal na
Ala kayang kataksilan, katapatan akit keya
Sinikap neng anting perlas, kàyamanan ning pamilya

Mesalaula ya pin kaya Ining kayang pangatau
Keni labuad kapampangan, matutungge yang laureadu
Alagad ne ning kultura, literatura at amanu
Talagambul yàng tutu Ining maganakang tàu

Mesalaula ya pin kaya ing mal nang bieng adalanan
Pigunaman me’ng kayang bie at panaun nang delanan
Tune ini yang megamit keng mayap nang kàbaldugan
E megtampiso keng dewakan, karokan yang linisyan

Makanian ya pamibiebie ing makamal a poeta
Malasakit at masabal, kalingapan akit kaya
Tune eya mesalaula Ining bie na yang maula
VIRGILIO P. CALILUNG, pamibiebie na, makule ya

Posted in Parikil, PL Sergio Gramonte Calayag, Poesia, Poeta Laureado | Leave a comment

DENING POETANG MlNANTABE

Posted on June 29, 2023 by inglibrarian

nang: Sergio G. Calayag

Kabud na dinatang, ken kakung sarili
Pamanialupsupan keng amanung bandi
Aku ing mangutang, nanu ing miliari?
Ing literatura, mebating yang pilmi

Mewiling susulat, keng amanung sisuan
Ing kanakung nasa, iya nang lingapan
Tune yang melumbe, ining amulatan
Dening kawatasan, ilang mitambunan

Atin man gagale, malagad na la mu
Dening kayanakan, tutung alang balu
Samut ing tagalog, potang mangamanu
O, ‘yang pikarine, ini nang amanu

E peninapan ing maging poeta
Ing buri ku sana, sumulat istoria
Oneng inyang dimdam, metung a poeta
Milalab ing pali, saup inyad ku ya

Romeo Rodriguez laureadung poeta
Kaya nang ulipan, gawa kung poema
Ini yang mituknang, mewala’ng asawa
E ku rin tinuknang, e ku rin sinawa

Akilala’ng Ari, Aring penikula
Lagyung Frank Guinto, tutung iyang bida
Iya nang ginale, keta nang istorya
Kayari ning sine, iyang akilala,

Akilala ke rin, poetang laureadu
Tubu yang Bacolor, maganakang tau
Virgilio Calilung, metung yang kutseru
Atin yang kusang lub, iniang akung tiru

Akilala ku la aliwang poeta
Ari ning Parnaso, ibat America
Pati kaluguran, lugal ning Pampanga
Aku ing inabe kareng aguman da

Sir Robby Tantingco ining matenakan
Karin Holy Angel iya nang pegsarian
Kanaku lang pelad gawang kawatasan
Tutu yang metula ken kakung kagiwan

E abut isipan, aku’ng miputungan
Poetang laureado, keni kapampangan
E ku pagmadagul, galal kung tanggapan
Talasuyu yu ku, Bal’yang Kapampangan

Posted in PL Sergio Gramonte Calayag, Poesia, Poeta Laureado | Leave a comment

E Ne Mabuu Pa

Posted on June 29, 2023 by inglibrarian

Mala-soneto
Lorung Malabit

*
Meko kang e memun, meko kang malagua,
nung inisip mu man, e man makatadua.
E ka man melikid, mengari mung ala,
anti kamong bulang, kabud na mewala.
**
Ing salu ku ya mu, ing tutung kinabug,
linto, ing lugud mu king gintu mu talbug.
Ding sasambitlan mung amanung panirug
lulual mu king arung, king buntuk pamilug.

***
King malabis a mua, memalbal kung basu,
ita ing wangis ning, talbug a lugud mu.
Uling ing sumpa mung, inapse kanaku,
mebalbal ne uling ngeni likuan mu ku.

****
E ne mabuu pa ing balbal a basu,
lakuas na pa ining bangal a pusu ku.

Rodel E. Gozum
27 Junio 2023
San Simon

Posted in Mala-Sonetu, Palsinta, PL Rodel E. Gozum, Poesia, Poeta Laureado | Leave a comment

ing sasainsing

Posted on June 29, 2023 by inglibrarian

maluat ne pung misulat ining poesiang ini, manga 12 anggang 15 banua na siguru, pero buri ke pung ipakritiku, ban nung maliari ya pang paglarinan, alarin ke pa pu. (bista man detang atul nang kong PL Rodel gewa ku na la, at peglarin ku ne pu bayu ke pinaskil ini ban kanita ditak ne larinan) makanian man, pota pu atin ku pang e asipatan.

“ing sasainsing”

nu ka lito-lito ikang kamatayan?
o’t pabustan mu ku kening kasakitan?
o’t ing gulisak ku e mu darandaman?
anting maniunu ka, magmaklak-maklakan….
uling mas buri kung datangan mu naku,
at sana ing ukul ‘yang munang patdan mu,
nung nu susulud la reng manaya kaku
a lakuas palasa keng kasakitan ku.
“mengan na la kaya reng kakakung sisi
a kaku nandin pa manenayang muli?
prublema, puera pa keng pakpak kung pakli,
makabaligtad kung tigik pangatali.
ing siak ku pipi yang maibug nang mapayo,
awakan ning tau, nung nu makabito.”

Posted in Bie, Capampangan Shakespeare, Mala-Sonetu, PL Tuazon Sabandal, Poesia | Leave a comment

Ali Ne Kakabug

Posted on June 29, 2023 by inglibrarian

Mala-soneto
Lorung Malabit

*
E ku na aintindian, mababaligo ku,
ala nakung gewang para keka ustu.
Nung e kulang, labis, e pa mi-eksaktu,
e lumbug ing aldong ala kang reklamu.

**
Sala kang mangadtu, at sala kang malpá,
anggiang daptan ku ngan, e ku maka-isâ.
ing panabilin mu, anggiang kakung gewâ
atin kang asilip, e ka rin matulâ.

***
Ing maling kapuling at e ku sasarian,
gagawan mung kabual, liwas king larinan.
Ing silab a dapat marapal tugtugan,
pakatamban mu pa ampong paglabulan.

****
Mekad ania e ku makagawang ustu,
ali ne kakabug ing salu mu kaku.

Rodel E. Gozum
27 Junio 2023
San Simon

Posted in Lugud, Mala-Sonetu, PL Rodel E. Gozum, Poesia, Poeta Laureado | Leave a comment

nung

Posted on June 29, 2023 by inglibrarian

(king ikasulung paniulat)

“nung”

megabak ya napun kanaku ing banua,
menalas ya iti king pangagabak na;
tinulu, minatak a alang agguanta
ing uran, kukutkut anting uyung dagpa;
at king balang patak sisiri ing kaplas,
ing banua anti yang magagabak lakuas
king pamangulut mu king pusung ing yagkas
at paramdam keka ing lugud a wagas.
mekad i Cupido, keka ne mu begut,
ing uyung ning lugud, kaku e ne leput,
inia king lugud ta mayan kang ginulut,
at aku mung diling manamdamang lungkut.
nung ing mibalik ka, alang kapanayan,
mekad kailangan kung pibatan ing uran.

06/25/23 //05:58
bayu mako bale

Posted in Capampangan Shakespeare, Mala-Sonetu, Palsinta, PL Tuazon Sabandal, Poesia | Leave a comment

“ANG TIBAY” KUNG SAPATUS

Posted on June 28, 2023 by inglibrarian

nang: PL Sergio Gramonte Calayag

Tune e ku akalinguan kaduang banua secondarya
Iyang Bulan ning Agosto at mauran na kanita
Minuran misnang kasikan, ing quadrangle ing limbug ya
Malino yang keang danum, megtampiso keng lele na

Sapatus kung pagmadagul deng sapatus kung “Ang Tibay”
Tinalas ko keng danuman, ban ila reng asubukan
Ikit naman ing tetagan, e mesira agyang dit’man
Masaya keng mamialungan, ketang patak na ning uran

Kauli ku ketang bale, aku ngeni ing melagnat
Ing bitis ku e akimut, masakit ya at mabayat
Kening kakung kabulditan, anti ya mo keng mansanas
Malutu ya at masakit, at e naku makalakad

Pepalawe ku keng doktor, karin balen Mabalacat
Kang Liberato Tantingco iyang doctor tutung sikat
Keng kaya nang pamanyuri, iyang metung tigsang sakab
A manyira keng kalamnan, at mesira ku panlakad

Milisang yang kasukasuan, pamagaral yang mituknang
Limang banua ‘lang gagawan, matudtud mu at mamangan
Alang akit pamagbayu sarili ku kalunusan
Ing asensung paninapan e ne datang kapilan man

Mimisip ku ’lang patugut, ing asensu paninapan
Kabud naku mu maninap at ala ku mang gagawan
Sumlag ya itang aldo at manabu king albugan
Kening kanakung kabilian alang akit kapasnawan

Linele ku keng sarili, sarili ku kalunusan
Tinalakad ku’t ginunyat, at menintun kung paralan
Mekisabi ketang Madre pasibayu kung magaral
Keng saup nang binie kaku, meyari keng pamagaral

Inia kabud iyang ikit, ing karatulang “Ang Tibay”
Mibalik ya ing panaun a kanakung adalanan
Ing pagsubuk a dinatang, iya ini ing erapan
Pasalamat king Dios lbpa, iya ining alagpusan

Salamat keng Pilipinas Retrostalgia

Posted in PL Sergio Gramonte Calayag, Poesia, Poeta Laureado | Leave a comment

ING SUSU NA NING IMA

Posted on June 28, 2023 by inglibrarian

nang: PL Sergio Gramonte Calayag

Apansingan ke ing I’ma, keang anak yang pasusuan
Kareng takde makakera, iyang akit keng kandungan
Yumung lugud abitasa kabang iyang pakalawan
Anting sibul kayang lugud, ketang pusu manibatan
Kipmuan ya ring kaingatan, keng sinta nang pakamalan
Saka apisan ing buntuk, kabang pawas pupulisan

Nanu ya wari ing susu, kening metung a babai?
E ya metung palamuti, kening kaya nang sarili
Ikabit sa keng isipan, e la bageng makalibi
Nun’e dalanan yang pamangan, kareng supling tuking dai
Kipmuan yang mayumung lugud, iyang makadapuk keni
At tune yang mararandam, itang lugud a mapali

Malagad na la ping tutu, kareng indung pakamalan
Dening anak ‘lang pasusuan, kabang ilang paragulan
Ala namang makarine, keng mayap dang karaptanan
Tutung ustu ing gagawan, kening gawang kabanalan
Iya ini ing papabal, keng anak nang kaluguran
Masabal na’t malasakit, ampon ining kalingapan

Deng aliwang kebabainan, e la bisa mang pasusu
Pota kanu madisporma deni nang karelang susu
Inia gatas yang animal, iya ining papasusu
Pangaragul nitang anak, mika-ugali yang asu
Iya ini ing maniagu, anti yang metung a toru
Milalako itang lugud, manibatan ketang pusu

Atin naman maging sangkan, ining Imang e pasusu
Itang gatas a mebangnas, e magamit ketang ustu
Ketubasan at mesira iya ini ing memuu
Maging metung kasangkanan, mika-cancer ining indu
Mipabustan keng panaun meging bunga yang akit mu
Tatauli na itang sisi, keting isip iyang atsu.

Pagumasdan ‘niang minuna, lalung-lalu kareng baryu
Singkarakal kareng anak, at keng inda la sususu
‘lang balitang mika-sakit, mika-cancer kareng susu
Pablasang iya ing dalan, at katuglung ning bie tau
Anting sibul e mamala, malinis yang inuman mu
Babie saya keni nang bie, at keng tulang mamaglapo.

Posted in Babai, PL Sergio Gramonte Calayag, Poesia, Poeta Laureado | Leave a comment

BISANG MANAGUMPE

Posted on June 28, 2023 by inglibrarian

nang: PL Sergio Gramonte Calayag

Bisa kung dalakit sumangid ning tete
Ing kakung parasan itang managumpe
Nanu mang sumbagal ila reng ilele
Panikuanan miras, lumakad manene

Lipat kamangmangan atsu ing kabiasnan
Kareng kasakitan, tagumpe ing kamtan
Gulut na ning lulam, akit ing kasalan
Maina’ng pilubluban, iyang pasiknangan

Deng e mamasensu, tau lang matamad
Alang panaligan, nung e mu ing palad
Pakakalulung bie, dapat ka mung gunyat
Kanita minawa, ika ing magsipag,

Tanggapan ing amun, neng daratang keng bie
E mu gugulutan, marap masalese
Kabud ginulut ka, masambut kang pilmi
Agad Kang sinuku, ika’ng mataloti

Aku ing dalakit kakung kapagnasan
Dapat ku mung kimut keni nang kabilian
E kabud maninap, at alang gagawan
Kanawang pa’intunan tune e ya datang

Istoriang Juan Tamad, tutung atin aral
Katamaran lisyan iya ing papabal
Inia aku’ng gunyat, mikabieng marangal
Keti babo yatu, mabilug sikluban

Posted in Bie, PL Sergio Gramonte Calayag, Poesia, Poeta Laureado | Leave a comment