JOSE M. GALLARDO AT DENG POETA’T TALASULAT NING BALEN BAMBAN (TARLAC)

Posted on June 4, 2023 by inglibrarian

nang: Sergio G. Calayag

lniang decada sasenta, magaral ku elementaria
Keng malati ming karinan, karin barrio ning Banaba
Siping bale’t kamag-anak,mititipun, manenaya
Ketang metung a programa, crissotan ya ing awus da

Pengari ku at nong tula keng programang panenayan
Tayimik la’t e bubulad, potang ilang makirandam
Nanamnaman deng amanu, nung nanu ing buring sabian
Makamua ka, nung ikang mainge, ela bisa maistorbo man

Bista man, eku aintindian, ing mesabing programa
Mawiwili kung darandam, nung iyagkas do rening rima
Potang ilang mipakibat, ing tayimik sisigla ya
Karas ketang kayatulan, opinion da kanya-kanya

lng talapagpakilala, iyang ume da neng ausan
lng lagyung Jose Gallardo, papalakpak lang darandam
Tune iya ing panayan, keng programa ning crissotan
Sasaya ya ining bale, keng amanu nang sambitlan

lning Ari ning Parnaso, suging poeta laureado
Menibatan king Candaba, ing lagyung Jose M. Gallardo
Mitanyag ya’t mikalagyu, keni Bamban lugal tamo
Kareng kayang memalen, a makirandam kening radio

Metung la rening patutu, dening luma nang letrato
lning ari ning parnaso, malapit ya kareng tao
Kareng taung Bambanense, kilala ya y Gallardo
E mebura, e kelinguan, mitanam ya kareng puso

Kareng mesabing letrato, akit me y Mayor (Pedro) Mendiola
Engr. Crisencio Ocampo at Toribio Vergara
Gerry Caparas at Agustin Canlas ning Lira Pampanguena
Talasulat la at poeta, keni balen tamung sinta

Centinariong beitan, king Holy Angel pegmasusian
Karin ku la ikua’t ikit, deng letratong sisikapan
lla dening magpatune, y Gallardo at ing Bamban
Keng larangan ning poesia, tutung ere akalinguan

Enero 21, 2018

Posted in PL Jose M. Gallardo, PL Sergio Gramonte Calayag, Poesia, Poeta Laureado | Leave a comment

“bakit?”

Posted on June 3, 2023 by inglibrarian

sinta, sinta, sinta, o kakung palsintan,
bala mu alak kang maniaman aldukan;
iyang kekang lasa, pane panintunan;
kening pangatau midaralang timan.

e mu nanung tula ing babie mu kaku
neng makitupa la kaku reng labi mu;
maglapo ing tula keni king pusu ku
neng ala ing kawang kareng salu tamu.

ing yumu ning pulut e man kalingkingan
king yumu ning sintang kekatang pisuluan;
metung namung kulang, at mabilug na ngan,
ita itang altar a pititipanan.

sinta, ay, kaniaman…. anti ka pin alak,
mayumu king batal ing balang kapatak,
dapot king yumu mu alang tumuas dawak
istung ketubasan at minuling salpak.

ninanu ka sinta, nanu ing gewa mu?
ot ing sablang tula gewa mu ngang abu?
ining kakung pusu gewa meng kalulu,
linubas meng tula, likas mu ngan kaku.

gilutan ing sablang tulang pisulu ta
iniang manakit kang salu a mayalsa,
ampo pang mayalkus itang katawan na,
at labing mas mau a managal keka.

anting alan’angga ing urang papatak
kening kakung salung manisnawang saldak;
ing yumu ning lugud miyalilan salpak
king salung ginauk, at kaibat, ginabak.

dening kakung takde ot gilutan mu la,
ampo ring labi kung minie tula keka,
lakuas ing pusu kung keka peulaga,
obat kelinguan me kayakit mu keya?

uli na mo wari nitang tutu ya ngan,
e anti mo akung lugud mu puunan,
ampong ing pita mu aggiu nang usignan
king kasuelung ‘yampang ning keyang kandungan?

obat likuan mu ku? ninanu ka sinta?
sintang pakamalan, sintang maulaga,
sintang kayamanan, bandi ku’t inawa,
sinta na ning bie ku, sintang alan’angga.

e mu wari aggiung makuntentu kaku
king pibablas kekang mayumung lugud ku?
e mu sa’ kakawang kaku ing lugud mu,
uling ing pusu ku magmalun yang ustu.

pinili me wari uli ning tutu ya?
marayu ku wari lugud keng lugud na?
migkulang ku wari pamaglambis keka
o uling pareung manuk lang kekata?

***e ke pu atandanan petsa pangalala pero dakal a dakal, ketang bayu ing pandemia. mangalkal ku pamu kanining tala, mekad akit ke pa.

Posted in Capampangan Shakespeare, Palsinta, PL Tuazon Sabandal, Poesia | Leave a comment

Soneto 14

Posted on June 3, 2023 by inglibrarian

Lorung Malabit
Silaba 10
Quatrain 3 Couplet 1
Taladtad 14
Adle Shakespearean Sonnet
Rima abab cdcd efef gg

*
Makigatas la pa ring labi ta,
ika nang kakabug ning salu ku
Angga na king mepula ku mata,
ika pa mu rin ing mal kanaku.

**
E na apakupas ning panaun,
ing kapalsintang alang kalimpi.
Kabang malalagas la ring bulung,
lakuas pang lalalam at susubi.

***
Angga na king kulkul a santungan,
ika ing tumalya na ning pusu.
Mangga king miras ing kapupusan,
ing samban ku’t luguran ika mu.

****
Ing kabud aduan ku’t panalangin,
ing lugud mu sana antimurin..

Rodel E. Gozum
01 Junio 2023
NLEX Kilub Ning Bus Papunta Caloocan

Posted in Uncategorized | Leave a comment

CABANG

Posted on June 3, 2023 by inglibrarian

Mala-Sonetu
Irvin Harvey Rivera
Siuala Ning Maliwalu/Anac Ning Baculud
June 1, 2017

Cabang atin cung inaua a lalabul cacung pane
Istung mamiragli nacung mapulid na ing cacung bie,
Samalan cung mangisnaua at tatacut cu pang mate
Mapupus ing cacung calma’t cutcut da nacu qng lele.

Cabang atin cu pang canan a susubu cu qng asbuc,
Cabang dacal pa ing danum a ainum cu qng alduc,
Paniglon cu na ngan ngeni baiu mibalic qng labuc
At mangnas cu pangatau muli ing bie cu qng siguc.

Cabang atin pang lulugud mumuma ca’cu neng abac,
Cacaul ca’cung matigic nung qng salu cu tumarac,
Istung ing pamicacunu cabud na nacu mu saldac
Cabang dalise ing lugud luguran cu neng e palac.

At cabang atin cung pluma, sumulat nacung sumulat,
Ibandu cu ngan ing sabla bang ding mata ra mibuclat.

SiualaNingMaliwalu #AnacNingBaculud

Posted in Poesia, Poeta Irvin Harvey Rivera | Leave a comment

KATAWANG TAU

Posted on June 3, 2023 by inglibrarian

Irvin Harvey E. Rivera
Siuala Ning Maliwalu/Anac Ning Baculud
May 31, 2019

King pilan kung banwang pamagtyamantyaman
King kakaobra ku’t kakapanintunan
E ku mo ayisip ing ditak mitagan
King ka’kung sarili’t kakaynang katawan.

Bala ku mo sana ing tantu kung tibe
E ne milubas man king katawang tagle
Uli mong bala ku yang pigkalam a bie
Alang kapupusan at e mamamate.

Dapot, ing katutwan karin mayayakit
Katawan ning tau datunan yang sakit
Nung e ka manwala’t pane mung pipilit
E ka sa’ magsisi, e ka maginakit.

Kalupa ning metung pupus a kandila
Malablab ing api keta king samula
Kabang yang pabelung malablab king sala
Kabud-abud n’ya mung mate at miragsa.

Makanyan mu naman king pakiwari ku
Tagle nang sikanan ning metung a tau
Keta king danggut na karin mu apiju
Ing pigkalam a bie manintun yang sepu.

Kanyan mu ayisip pamagtyamantyaman
Milabasang aldong mekalimbatawan
Potang king sepu na karin mu ukulan
Ing kaulaga na ning pamikatawan.

SiualaNingMaliwalu #AnacNingBaculud

Posted in Bie, Poesia, Poeta Irvin Harvey Rivera, Tau | Leave a comment

KAPLAS NING MILABAS

Posted on June 3, 2023 by inglibrarian

Makuya A Poesya
Irvin Harvey Rivera
Siuala Ning Maliwalu/Anac Ning Baculud
January 11, 2018

Maragul nang bague ing kayang abalu
Ing panambitan ning daraya kung pusu
Wa man, metung ku mang mangmang a mebigu
Linugud, sininta at kaya menabu.

Tangis at gulisak ing ka’kung depatan
Inyang abalu kung buri na kung lakwan
Nanu pang lugud kung sasalpantayanan?
Nung belag na ku at kabud na tikusan.

Ding bulung a lagas a lebul ning angin
Ilang pawaga nang e mamit a mimin
Nung magdatila sa’t kaya nang apansin
Ing lugud ku kaya e ku na apinpin.

Karin, mallari keng magsale king lugud
Kambe ning pakamal, agyu ming mibuklud
King pamanggising ku at king pamanudtud
Wa Sinta ku! Ika—at ika mu kabud.

Dapot, nung masawi— makanyang mung muli
Maya’pang pututan ku n’ya mung maragli
Ing pigkalam nang bie ning Guinu kung Ari,
Maya’pang mate ku nung muli kung sawi.

Mangga man king sepu’t malungkut kung paldas
Ning pamalsinta kung mamit nang magwakas
Gumulis ing sakit at maglakwang bakas
Kabang bie na iting sagiwa’t kumaplas.

SiualaNingMaliwalu #AnacNingBaculud

Posted in Palsinta, Poesia, Poeta Irvin Harvey Rivera | Leave a comment

PAGMASUSIAN KAYALDAUAN NA NING BAMBAN

Posted on June 3, 2023 by inglibrarian

(BAMBAN DAY)
nang: PL Sergio Gramonte Calayag

Ining balen tamung Bamban, lagyu na ‘bat keng tanaman
Detang aeta o reng kulut, katutubung manuknangan
Ketang leguan nang dadalan inia iya ing deyuwan
Menibat la king Pampanga, king Bataan o Bulacan
Tagalog Nueva Ecija menibatan Pangasinan
Literatura’t kultura, kapampangan ing dadalan

Kareng amlat ya misulat ing pakamalan tang tibuan
I Emilio Aguinaldo pangulu yang tatangalan
Tinipa ya istasyun tren, maragul bale’ng sintungan
Itang bale San Nicolas, yang bale da reng Cuyugan
At ing bunduk ning Ligaya yang megsilbi rang batiawan
Babatiawan deng kasalang potang ila reng paratang

Iya mu rin ing misulat ing tatauli dang labanan
Laban karening dayuwan, manalipit, manalipan
Magiting Katipunerus pepalkas da ing tepangan
Iniang bulan ning Nobyembre, iyang tauling lamutakan
Ing gobiernong Aguinaldo, kasalang na tatakasan
At makanian yang milipat, karin Tarlac a balayan

Itang ilog tamung Parua, ilang keni magdepensa
Detang bulu rang tinilus, sandata lang ginamit da
Kareng libru mababasa, ketang bunduk ning Ligaya (LAFE)
Iyang keni menibatan itang metung telegrama
Kautusan yang mabasa, papuntalan ining Luna
King lugal ning Cabanatuan kabang dalan mesintang la

Atin metung Kasulatan misalikut America
Kasulatan yang patune, kening balen tamung sinta
Rebolusionaryo capital, Pilipinas tang bangsa
Kanam aldo, bulang Junio iniang iya ing mepirma
I Emilio Aguinaldo iyang pangulu kanita
Libo walung dalan siam a pulu’t siam, mitala’ng petsa

Inia ngeni pagmasusian ing Bamban Day a ausan ta
Mayulaga yang bilungan kareng amlat mabasa ya
Dake ya ing balen Bamban kasalesayan ning bangsa
Inia dapat yang ingatan, palabungan, gambulan pa
E pabustan yang masira, bagkus pakamalan taya
Ining balen tamung sinta, pagmaragul kening bie ta.

ccto:
source: The Political Evolution of the Province of Tarlac
Dr. Lino L. Dizon
Center for Tarlaqueño Studies
Tarlac State University

Posted in Para Balen, PL Sergio Gramonte Calayag, Poesia, Poeta Laureado | Leave a comment

“deng mata kung singkit”

Posted on June 3, 2023 by inglibrarian

(ini pu, kayabe ya kareng koleksiun kung sonetung Kapampangan a purus kalokuan laman. manga meka apulu ku pamu siguru. addua la reng personang parating atiu: ing magsalita ampo ing babaing amanuan na. panikuanan ku lang buu o mabilug silaba rima. kalupa na mo pu nini, deng rima na, la,la,la,la; kad,kad,kad,kad; ku,ku,ku,ku; kit,kit. e la pu kabud a,a,a,a; ad,ad,ad,ad; u,u,u,u; it,it bilang pamagsane keng sarili kung kagiwan keng rima.)

“deng mata kung singkit”

deng barkada tamu neng mamanikan la
agad da ka pa mong itake karela,
uling bala nanu kekang kakilala:
sasala ing uran, ikang e sasala.
ika ing maralas pangara keng lakad
inia ikang pane ing paunan mekad,
uling kabud la mu masanting talakad
pero teksas la mu e biasang sisikad.
kabang aku naman makikituki ku,
potang manik tana mumuna ka kaku,
pero misan bengi mibua ka kanaku,
deup mu ku lupa, pero “bakit?” ngaku.
deng mata ku pala e mo seriang ikit
keng lalam mung palda lakuas lang sisingkit.

05/18/20 /20:09
bayu mangan ispageti

Posted in Capampangan Shakespeare, Komidya, Mala-Sonetu, PL Tuazon Sabandal, Poesia | Leave a comment

Ing Ampang Ku King Aldo Mu

Posted on June 3, 2023 by inglibrarian

Mutya, king aldo mu buri ra kng dinan
metung a regalung maki-kabaldugan,
peparuminggu nang mate kung isipan
nung nanu ya mo sa ing sukat kung yampang.

…

Posted in Ari Ning Crissotan, Ari Ning Parnasu, Komidya, PL Jose M. Gallardo, Poesia, Poeta Laureado | Leave a comment

Aliwa Sa

Posted on June 3, 2023 by inglibrarian

Mala-soneto
Silaba 12 Sesura 6/6
Quatrain 3 Couplet 1

*
E mu na alingad, masalang-masala
ing lugud mu kaku e anti king sadya
Migbayu na ka at merimla nang bina,
pelalung kimut mu biglang menaliwa
**
King tukuran eran e na ka manaya,
potang mumuli kung manibat king obra.
Ing kaul mu kaku ngeni malubak na,
at e naka magpiak ustung uman daka.

Ulatang pilit at e laus king lub mu
potang malagad a panusigan mu ku.
Ala nakang pali, mengari kang yelu,
anti kung sisiping king metung a batu.

Nung nanu man itang maragul a sangkan,
aliwa sa itang kanakung isipan.

Rodel E. Gozum
28 Mayo 2023
San Simon.

Posted in Bie, Mala-Sonetu, PL Rodel E. Gozum, Poesia, Poeta Laureado | Leave a comment