King bunduc alaya malam cang misapuac, at ing kecang daya ya ing keke’ng lamac, king Dios Mayupaya ing bie mung busilac a pigcalub mu ya keke’ng kecang anac.
Ica ing keke’ng bie king sariling labuad, keti ke magsale cambe ring capatad, keti ke mabibie, keti ke miyanad, king leguan mung tagle, layun mamucadcad.
Dacal nong casalang a keca sinubuc, dacal nang dinatang, mabayat pagsubuc, cambe ning Miglalang, ike’ng makipamuc bang e re asintang ing tibuan mung bunduc.
Indu ming ibatan, icang mal kecami, Ica ing lingapan, manggang mabie cami.
king pusu nang tatang pilit kung manintun aggiang kapatak mu king mayumung danum, uling ing pusu ku asne kawang minum pamanda king ibe ning salpak a lasun; ing ditak kung mali e na panupaya, makanian munaman aggiang istung ala, (pane) king balat ku aruan ko keng gaga ring bakas nang likuan ning keyang paluka. balu ku i tatang kanitang anak ya kinawa ya naman keng yumu kang ‘ma na, uling kinawang ne ing salu na keya, at ding keyang gamat, kang tatang meyan la. dapat sa’ i tatang balu na ing yumu ban nang apangilag ing salpak kanaku.
***maluat ne pu mangasulat, e ku ne atandanan a petsa. ***metaporang megamit: paradoks
ngara, maganaka at mamu ku lupa, e ya kanu babie kaplas kareng mata, mu pin, makalungkut, kaku sasabian da, atin nong katayid reng gamat ku, ngara. muna la pa kanung kaku pagpa lawe, ing lupa ku kanu mamangayuma ne, mandakap neng pusu, mupin, makalumbe, at makarunut lub atin nakung abe. iniang misan aldo atin mekisabi, ing kanakung laggiu kukunan ne niti, tula ka keng mata, nganang migpasimpli, sayang, deng gamat mu, gapus na la kasi. makatiman keya, “salamat pu,” ngaku, “ining kayabe ku ‘yang pasanting kaku.”
deng kanakung bitis mabayat la takbang pero susulung la, e la bisang tuknang; masukal ining lub pero e tatabang tumalas king napun a kaplas inampang, pablasang king napun karin ya megabak ing salu kung keka megunang mataktak a megin sangkan na ning baggiung babatak a pepalbug kaku karing luang minatak. dapot ining lub ku tutung katulan na ing balik-balikan ing salpak at dusa uling angga ngeni e ya mabubura ing laggiu mung king lub mákintal a letra, pablasang king busal ding napung maplas pin, dakal sari yumung paganaka mu rin.
mapali ing danum niting dayat malat neng manintun ipuk tala-ingat perlas; kanita ing anging king dagat manibat mapali ing labul king pisngi ning labuad. kanita mo akit ding dakal talangka, mamamaniaka la ibat karing lungga; nung lawen mo asbuk, mamialung lang bula uling natural da at e ra pigawa. mangayagang bina, alus kilala ngan, at saganan da ka, seria mo man lisian; karing kantu-kantu ampo karing dalan mamamanapag lang amanung maniaman. dapot kambe nita, retang e ra kuyug panigutan da la king layun abaldug.
(Only you—Lovesong of the heart) (Dalit a Pamalsinta) Original Lyrics, Words composed and writen by: Irvin Harvey Rivera Music arranged and Sung by: Mr. Thelo Tolentino
E ku migsising piglolwan daka Nanan muku pin ala kung pera Ala kung bale keka pamana Ala kung saken pandakit keka.
Ala kung mansyun a tuknangan mu Ala kung bale maski na kubu Ala kung sabla agyang mang nanu Ing atin ku mu ing tetagan ku.
Chorus: Ika’ing santunga’t kanakung ligaya Ika’ing bandi ku, Perla ku’t Musa Ika ing Batwin saslag king Banwa Ika at ika king alanangga.
E ku masanting bikas katawan Atna kung lati a pisuglungan Atnong katsura ring ka’kung ipan Pelalung balat mengaring taysan.
Sapad ku arung, malati mata E la pa pante ring ka’kung pata Dagul ku asbuk, kibit ku panga E kata bage a miyasawa.
Chorus: Ika’ing santunga’t kanakung ligaya Ika’ing bandi ku, Perla ku’t Musa Ika ing Batwin saslag king Banwa Ika at ika king alanangga.
At nanu man ing kulang kanaku Maligaya ku, ika ing bie ku Ika’ing Sinta ku, aku’ing Sinta mu Luguran daka mangga king sepu.
E ra ka pabren—- ka’ku miwale E ra ka lakwan at pakilibe King kasakita’t kanawan king bie Sandalan mu kung matibeng takde.
Chorus: Ika’ing santunga’t kanakung ligaya Ika’ing bandi ku, Perla ku’t Musa Ika ing Batwin saslag king Banwa Ika at ika king alanangga.
Inya naman sa’, anting maluka A talatuki at maki-gampa Panaligan mu’t kanakung sumpa E ra ka pabren kumyak, gumaga.
Idaun ku ya panau’t oras Mayumung lugud yampang kung wagas At nukarin man iti miparas Alang lugalan ing pamagpaldas.
Chorus: Ika’ing santunga’t kanakung ligaya Ika’ing bandi ku, Perla ku’t Musa Ika ing Batwin saslag king Banwa Ika at ika king alanangga…..
Pasalamat ku liguran mu ku Miyabe kata lugud ning Guinu Agyang nanu man ing kulang ka’ku Liguran mu ku a e mu nanu…………
