LUID YA ING LALAWIGANG TARLAC!!

Posted on June 2, 2023 by inglibrarian

nang: PL Sergio Gramonte Calayag

Dinalan limangpulung banua iya ngening pagmasusian
Ining pakamalang sinta, Tarlac tamung Lalawigan
Kareng amlat makasulat, babandera ing kamalan
Anting tala babo banua, maningning yang tatangalan

Potang ing kasalesayan iya ini ing babasan
Ababalu ing milabas, nung nanu ing adalanan
Pati na ing pangatau, keting lugal manuknangan
Ila reni deng mitipun, yumung lugud pairalan

Deni nang Pangasinense at deng liping kampangan,
Atin lsik, llocano, deng Zambal ning kabundukan
Novo Ecjianong Tagalog, o menibat king Bataan
Ilang keni memagdatun, Tarlaqueñong tatangalan

Panugaling llocano, panugaling kapampangan,
Panugali ding Tagalog ampon Zambal keting tibuan
Literatura’t kultura miyaliwa ing gagawan
Kipmuang lugud yang mimiral, kening pusu ning ninu man

Nung wari sa keng pamangan anting pakbit ketang kuran
Samut-samut itang bulug, maniaman yang alalasan
Makanian yang Tarlaqueño, kagalangan bibitbitan
Ating lugud a mayumu kasing yumu ning panilan

Aku ining Tarlaqueño, dakila yang kakung lipi
Tune iyang mayayakit keting lipi tang komanggi
Kanaku yang pagmadagul, kareni nang sablang lahi
Bitbit ku ing katapangan laban kareng managlahi

Luid ya ing Lalawigan Tarlac
May 26, 2023

Posted in PL Sergio Gramonte Calayag, Poesia, Poeta Laureado, Uncategorized | Leave a comment

MAMIALUNG TAMU

Posted on June 2, 2023 by inglibrarian

nang: PL Sergio Gramonte Calayag

Ketang kekeng kayanakan, ikami reng mamialungan
Karin kami magtambubung keng libutad na ning dalan
Pablasang e sementado, gabun pa ing dadalpakan
Tugtugan mi yamung danum, itang gulis a dalanan

Abitasa kening pialung, liksi’t galing mayayakit
Detang matang makalawe ban mibili ketang gipit
Anti ya mo keng agila, potang iya ing sasagmit
Kasingbilis na ning kildap, keng bilis na e me akit

Ining pialung kapampangan lalung-lalu kareng baryu
E mamili nanung idad, pakiabayan agyang ninu
Neng masala ya ing bulan, kakabukas lang akit mu
Itang aili at galapak, iya ining damdaman mu

E mu kabud na tambubung iya ining pipialungan
Aro, siotong at babagua, tabak taya’t salikutan
Ating olen, ayo, goma, luksung babi o tagalan
Atin mu rin itang lulu, singkakatas keng lundagan

Inia naman keng milabas dening dakal kayanakan
Malawut la ketang sakit, at ing sikan panandaman
Itang pialung a pisikal iya ini ing gagawan
Alang patugut gagalo, maliksi ya ing katawan

Dapot ngeni maliliari keng computer mamialungan
Dening mata apektadu, ampon ini nang isipan
Mangapali la reng buntuk, magkulang kapanupayan
Mimina pa’ng resistensya, at mimina ing katawan

Posted in Bie, Pialung, PL Sergio Gramonte Calayag, Poesia | Leave a comment

DIMUT A PANGADI

Posted on June 2, 2023 by inglibrarian

Irvin Harvey E. Rivera
Siuala Ning Maliwalu/Anac Ning Baculud
September 30, 2020

Guinu, ati ku pu king kekong arapan,
Maka-kurus gamat, makaruku kanwan
Lalapit ku pu at panyawad ku naman,
Tawad ing sabla kung marok a depatan.

Kabang sisiklawud, manigapu ku pu,
Sisisi oh Guinu at magparalumpu
Sasamban daka D’yos—Ari na ning Yatu,
Sasalpantaya ku, oh Guinu! Pakalulu!

Ulwan yo pu sana, dinan kapaldanan—-
Ding salunan king bie, ding kababatyan,
Ding malintwang isip, ding misasakitan.
Ding managulele king bie daralanan.

Pakayapan ye pu Balayan ming sakdal,
King ba yang timawa king sadya nang dangal
Apisan yo pu sa’ ding sablang miyalal—-
King ba lang mipakde’t mirinan masabal.

Sitsitan yo pu sa’ng lingunan da kami
At e ra ke sana bibili king tawli
Uling e mi agyu ing magdilidili,
Ing karelang saup yang adwan mi ngeni.

Karing sigalut at makamateng sakit
Iwas yu ke pu sa’t e pabreng manaplit
King kekeng katawan e sana manampit
Bendisyunan yu ke sa’ pu anggang binit.

Tabalu nung bakit e la maniwala
A ikayu ing D’yos keta pang samula
At nung bakit kaya e la pin talanga,
King ba ra ngan akit ing sablang himala.

Ika yu Guinu ku, ing salamin ning bie,
Ika ing inawa karing ‘gang mabibie
Keti babo sulip, nu’ man pamaglakbe
Tayran yu ke gamat at piyabe-abe.

SiualaNingMaliwalu #AnacNingBaculud

Posted in Pangadi, Poesia, Poeta Irvin Harvey Rivera | Leave a comment

ING AGUILA NING APALIT

Posted on June 2, 2023 by inglibrarian

(PUGAD NANG MISNANG TIBE)
(PUGUE PARA QNG AGUILA NING APALIT a y Poeta Laureado Intl. Atty. Almario C. de Jesus
Mala-Soneto
Irvin Harvey Rivera
Siuala Ning Maliwalu/Anac Ning Baculud
March 10, 2018

Luid ia ing Aguila caring Poesia na
Pamangulis na qng mataram nang pluma
Ding sunis o dalit at ding balang letra
Macabie lang diua pangabalangcas da.

Silung! dala mu cung iterac ning angin
Gamitan mo retang bagius mu’t magmain
Sulapo mu cu qng lele da ring batuin
Qng babo ning bigua’t bulan anti mu rin.

Amuiutan mucu’t dinan capaldanan
Caring poesia mung mamie capasnauan
Detang quecang dalit ume cong balican
Bang ing ligalig cu mapulid mung misan.

Luid ca oh Poeta Laureadu ning Sucad
Balen ning Apalit ia ing caiang Pugad.

SiualaNingMaliwalu #AnacNingBaculud

Posted in Parikil, Poesia, Poeta Irvin Harvey Rivera | Leave a comment

“BULAN”

Posted on June 2, 2023 by inglibrarian 
               Irvin Harvey Rivera
  Siuala Ning Maliwalu/Anac Ning Baculud
                   March 6, 2016

Taca-taquiqui ia sala, anti iang magbanteng Igpa
Qng dulum lalto qng biga, siniro iang misnang sala
At ding ‘gang mula-mulala, e ra asaglap ‘tang sala
Mulai la mang malagua, e ra dasan mang mipala.

Pacatanud tamung dungo, qng auang ta’ ngan tumando
Bang itang sala nang siro, acua ‘tang aquit magalto
At nung suerti cang mibatio, aquit mu’itang ‘gang Misterio
O’Bat ‘tang Bulang maniglo, saslag iang tutuqui Caco?

OH BULAN. #Supermoon

SiualaNingMaliwalu #AnacNingBaculud

Posted in Poesia, Poeta Irvin Harvey Rivera | Leave a comment

METUNG A CAIAUSAN

Posted on June 2, 2023 by inglibrarian

Irvin Harvey Rivera
Siuala Ning Maliwalu/Anac Ning Baculud
March 23, 2018

Malapit na naman aldo ning alalan
Aldong pamamili caring manungculan
Calupa ning sadya at mengalabasan
Dacal la ring bisang mipuc qng luclucan.

Balu mu ping balu istung paratang na
Aldo ning alalan macule tagana
Dacal nong lumapit at cumaul queca,
Maquigalamanu, maquipagquilala.

Apagumasdan cu caretang tatagal
Atno pangalicut ding carelang batal
Ume queni’t queta ampong quesio que’tal
Patie limput nala e mu no atagal.

Pane rang pasuala imbut dang masampat
Malinis la canu ding adua rang gamat
Metung a pangacu, magsilbi lang tapat
Serbiciu qng Balen pane rang lalatlat.

Anta pilang ucdung dimdam cu na ini
Pilan nong tinagal nanu mo’ing millari?
Pilan pang pangacung anti mo careni
Ring lumual qng asbuc at ibandu ra reti?

Inia Cabalen cu mulinig co cacu
Lalaqui’t babai qng Ciudad o Bariu
Metung a caiausan quetang pamagbotu
Mamili ta caring tapat magserbisiu.

E ta’ na pu sana paimburisan man,
Ing maroc dang nasang mipuc qng balean
Ngara ding macatua nung mamili ca man,
Pacapili mu na’t pacacalisquisan.

SiualaNingMaliwalu #AnacNingBaculud

Posted in Para Balen, Poesia, Poeta Irvin Harvey Rivera | Leave a comment

BACHELOR OF SCIENCE MAJOR IN LAUNDRY

Posted on June 2, 2023 by inglibrarian

Irvin Harvey Rivera
Siuala Ning Maliwalu/Anac Ning Baculud
July 26, 2016

Pamamiping ‘malan e mu biru-biru,
Papatingapun kang mangusut king baru
Lakwas neng kauran, kabag na ka salu
Mitambak na naman ing pipyan ku rugu.

Sasabyan nang Darling bayu ku mamipi
Pikawani ko ring de kulul, maputi,
Kaybat na kanita ring barung malati,
Babad ku nong clorux bang lakwas lang muti.

O “Darling ko” ngana, e mu kakalingwan
Ing ‘malang de kulul, kawani mu na ngan
E mu pakiyabe king maputing pipyan
Mekad balu mu na–rugo! mangupas yan!

“OH YES, DARLING, MY LOVE!”, ngakung mengamanu,
Bala mu anti ku waring bayu bayu
Nung balu mu sana “pimani-mani” ku,
Pamamiping ‘malan yang pingwa kung kursu.

SiualaNingMaliwalu #AnacNingBaculud

Posted in Komidya, Poesia, Poeta Irvin Harvey Rivera | Leave a comment

ABLAS

Posted on June 2, 2023 by inglibrarian

Irvin Harvey Rivera
Siuala Ning Maliwalu/Anac Ning Baculud

O ba’t pane ka king kanakung paninap,
Kabud daratang ka king diwa kung maliap?
Nanu’ing kekang sangkan pilit mung pigagap,
Magbusal kang pilit king ka’kung paninap?

Sagiwa la pa ring dinukit mung bakas
Malalam a sugat a pilit kakaplas
Nanu pa ing ka’kung paintungul a bukas?
Kalingwan ku namu ing sablang milabas?

Nanung ulaga na ning kanakung lugud,
Nung tinabili ka’t memuli kang matbud?
Nanung kasakitan a ka’ku ngan tinud,
Nanung kabaldugan ning tune a lugud?

O ba’t e ku agyung tanggapan ing sabla,
Ing pusu daralit kikyak ne’yang malagua?
Alang ‘tugut sasyo, memuli ne’yang pata
At ing ka’kung pusu mibalut ya king mua.

Dapat kupa waring ganakan ing dati,
Nung kening pusu ku pane na’ng palsimi?
Likwan mu na ku mung magluwang dili-dili
‘Lang nanu mang sangkan at e ka migsisi.

Nanung kayablasan ing tinud kanaku,
Binye ku ngan keka ing sablang buri mu?
Nanu pa ing kulang, nanu pa’ing buri mu,
Binye ku ing sabla pati na ing biye ku.

SiualaNingMaliwalu #AnacNingBaculud

Posted in Bie, Poesia, Poeta Irvin Harvey Rivera | Leave a comment

Ibpa Mi

Posted on May 30, 2023 by inglibrarian

Ibpa mi, ati’ka king banwang katasan,
Sasamban mi ya pu ing lagyu mung banal;
Kekami datang yang alang kapilisyan
Ing pamag-Ari Mung alang kapupusan,
Mapamintu ngan pu ing lub mu’t kaburyan
King sulip, antimo king Banwang Kayarian.
…

Posted in Ari Ning Crissotan, Ari Ning Parnasu, Biblia, PL Jose M. Gallardo, Poesia, Poeta Laureado | Leave a comment

Capilan yng wakas?

Posted on May 29, 2023 by inglibrarian

Neng: Al Pedroche
(Alas cuatru ning gatpanapun)

Capilan mapupus,
Yng bie queti yatu?
Capilan malaso
Yning universu?

Alang macabalu
Nune mu ‘yng Guinu
Ania mamagsaya
La reng sablang tau.

“Maluat pa, maluat pa”
Gulasyo ning malda,
“Ania me’co queni’t
Sagacgac qng saya.”

Minum tamu’ng alac,
Magcanta’t tumerac,
Calinguan tamu pa,
Pamaggauang mayap.

At qng libutad ning
Pamagsayang lisia,
Cabud na dinuldul,
Sinlag a masala!

Menibat qng biga
Ating menialita,
At dindam deng matni
Yng suala ning Igpa.

Ngana:
“Yng capalaluan yu,
Susucdul canacu,
E’yu wari balu
Magwakas ne’yng yatu?

Ngening oras a’yni,
Yng bie yu mepupus,
Ysulu’ng yng saya,
Carin qng impiernus.”

E maraoc magsaya,
E mu cacalinguan,
Yng pamamintu mu
Qng Dios a miglalang.

Ilele mu ‘yng saya
Qng panau’ng lipit,
Ban asaupan mu la
Reng mamagcasaquit.

E mu cacalinguang
Luguran deng tau,
Mayap man o maraoc
Yng ustu ibie mu.

Talacaran tamu,
Amanu ning Guinu,
Yan yng cabaldugan
Ning bie queni yatu.

Posted in Bie, Poesia, Poeta Alfonso Gomez Pedroche, Uncategorized | Leave a comment