Kapampangan Library

Ding Antecedents At Ding Kalibe-panglagyu.
(panupaya yu pu e ke balu king Kapampangan)

A. Ding antecedents ila pin deng panglagyu (noun) o metung a kalupang kalibe panglagyu (pronoun} a penibatan na ning metung a kalibe panglagyu (pasibayu, panupaya yu pu e ke balu ing katulid na ning pronoun king Kapampangan).

B. Ding kalibe panglagyu (pronoun) atin lang persona

1. Mumunang persona (first person) – ing magsalita king taladtad.

a. pangmetung (singular) aku, kanaku (ing kaku, kinuyad niamung aske ning kanaku)

Alimbawa:

1. Aku ing mimie pamangan king taung grasa,
2. Awa, kanaku ya ing bag a malutu.

b. pangtidua – ikata, kekata (alang specific a pronoun king English a pangtidua. Ing we, malyaring yang adua o labis king adua

Alimbawa:

1. Sulung, ikata namung salusun king bisita.
2. Kekata mibie ing responsabilidad karing inulila nang suli.

c. pangmarakal – (plural) itamu, kekatamu, ikami, kekami

Alimbawa:

1. Balu na ning biktima a itamu ing makibalu king katutuan.
2. Sinabi nang apu, kekatamu nala kanu reng mitagan a pakwan.
3. E ko migaganaka, ikami nang bala.
4. Kekami namu ing pamangan a e yu buri.
5. Kaduang persona (second person)- ing kasabi na king taladtad ning mumunang persona

a. pangmetung (singular) – ika, keka

Alimbawa:

1. Ika ing buri kung akayabe king kabang panaun.
2. Keka kula panabilin deng lakuan kung papelis.

b. Pangmarakal (plural) – ikayu, kekayu

Alimbawa:

1. Ikayu nang manasikasu karing tawling datang.
2. King kekayu ta namu gawan ing pulung.
3. Katlung persona (third person) – ing pisasabian king taladtad

a. pangmetung (singular), iya, kaya

Alimbawa:

1. Iya ing kinangua kareng kualta.
2. Mekad, kaya ing kasalanan.

b. Pangmarakal (plural), ila, karela

Alimbawa:

1. Ila kanung mekasira king makina.
2. Ibie mu niamu karela ing bola.

C. MAULAGA!!, Deng kalibe panglagyu, dapat maka-akma la kareng antecedents. Metung ya ini karing maralas dang maging mali reng kalupang talasulat.

Alimbawa:

1. I Bertu metung yang maganakang tau,
   ila ring sinaup aniang masakit ku.

Surian tala reng aduang taladtad babo. Mali ya ing megamit a kalibe panglagyung “ila” uling pangmarakal ya. Ing antecedent a panglagyung Bertu, singular yamu ania dapat ing gamitan singular ya naman ania, “iya” ya dapat.

2. Ding kakung kapatad kaluguran kula
   ania e ke dinan nanu man problema.

King alimbawang aini, mali ya ing “ke” uling ing antecedent a “ ding kakung kapatad” pangmarakal ya ania dapat ing gamitan “ko’ ya.

3. Nakaduanang bengi, minta ku pisamban,
   ban abalu mila reng bayung sakristan.

King alimbawang aini, mali ya ing “mi” uling ing antecedent a“ku” pangmetung ya mu. Ing ustu “ku” ya naman.

4. King inandam kung bie maulaga kayu,
   e ra ka kalinguan angga king mate ku.

King alimbawa babo, ing “ka” e ya ustu uling ing antecedent nang “kayu” plural ya. Dapat ing magamit keni “ko” ya.

5. Apa te i apu king bale nang koya,
   e tamu magulu ban mipaynawa ya.

King alimbawa babo, mali ya ing “tamu” uling ing “te” pangtidua yamu. Ania dapat “kata” ya ing gamitan.

Pasibayuan ku, dapat ing magamit a kalibe panglagyu maka-akma ya king antecedent nang panglagyu o kalupang kalibe panglagyu.