MAYULAGA ING KASALESAYAN

Posted on June 7, 2023 by inglibrarian

nang: PL Sergio Gramonte Calayag

Kayaldauan niting Bamban, iya ngeni pagmasusian
Agpang ketang kasulatan a meyakit keting tibuan
Ing matibe yang patune, tungkul keng kasalesayan
Kanam aldo ya kanita, at Junio ya iting bulan
Mitala’ng petsa, ‘niang libo walung dalan siam pulu’t siam
Pinirma neng Aguinaldo, ing pangulu ning bangsang mal.

Ining matuang kasulatan, misalikut America
Iya ining magpatune, balen Bamban sintungan na
I Emilio Aguinaldo pangulo ning bangsang sinta
Iyang keni mendatila, gobierno na yang dadala
Ketang bale San Nicolas, iyang karin migpainawa
Tinaglus ya balen Tarlac, tatakasan kasalang na

Matapang Katipunerus ining balen yang sintungan
Keti balen tamung Bamban lamutakan alang tuknang
Karin bunduk ning Ligaya ketang matas nang kabilian
Ilang keni babatiawan nung daratang deng kasalang
Dakal bulung mangatilus, sandata lang gagamitan
Atsu la keng ilog Parua maka-abang keng kalaban,

Kasalesayan mayakit, iyang tutung mayulaga
Ban kanita e kalinguan, kareng amlat e mabura
Babalikan ing milabas anting metung a istoria
Tune metung paganaka, e milako keng memoria
Ababalu itang napun, pangatau mung dadala
Anting metung Bambanense, kipmuan lugud king pusu na.

Inia metung paganaka, kayaldauan na ning Bamban
Nung nanu ing ayambag na keng panaung milabasan
Memalen na meki-abe mekigerra Karin parang
Ban kanita lumaya ya ining bangsa yamung tibuan
E baling daya ing magus, para keting katimauan
Nung miragsa keng labanan, kipmuan tula dang tanggapan

Bilang metung pasalamat, kareng taung midaun bie
Babalikid keng milabas, ing kapurian iyang babie
Pauli ning sakripisyo, iyang karelang dinake
Linaya ya ing balayan, tatamasan tamu ngeni
Katimauan niting bangsa, at mebiasang magsarili
Atin dangal a tangalan, ining komanggi tang lipi

Posted in Kasalesayan, Para Balen, PL Sergio Gramonte Calayag, Poesia, Poeta Laureado | Leave a comment

Ing Amanu tamu

Posted on June 6, 2023 by inglibrarian

Misanmetung ta’ na itamung lulugud
qñg amanu tamung maibug nang malumud,
ing masican alun pilit neng yayanyud
bang qñg lalam dagat carin ne magtunud.

Paburen ta’ uaring malyari na cabud,
ing Amanung Sisuan cabud n’ya malumud?
Gaua ta’ng paralan itamung mitubud,
magumpisa tamu qñg pamibubuclud.

Ing Amanu tamu, metung ya mu cabud,
ampang ne ning Indu, ya mung macabucud,
lingapan ta’ ya sa qñg tibe at catbud,
anting mayap ablas qñg Indung malugud.

Qñg Amanu tamu, paquit tamung lugud,
itang tune lugud…lugud alang patlud.

E. P. D.
June 6, 2023

Posted in Amanung Sisuan, Mala-Sonetu, PL Eric Dizon, Poesia | Leave a comment

Lockdown

Posted on June 6, 2023 by inglibrarian

Oyni ing resulta king pane nang lockdown,
ining kekong Apu , kule neng kalawang,
imbes na puti ya , tatanam yang kagtuan,
king pali ning aldo , ala yang pakialam,
mistula ne mupin lupang mangkukulam,
maski glutathion e na talab kanyan,
uli’ning tuling na sagad na keng laman ,
inya ala ya pin pangangas a leguan !😂😂😂

Posted in Makuyad, Poesia, Poetisa Patria Bondoc David | Leave a comment

“CABANG E PA TAULI” – neng ORLY MANALO DIZON

Posted on June 6, 2023 by inglibrarian

Orthograpiang: C-K (ca,ke,ki,co,cu);
Sucad: labing aduang silaba (6/6);
Feb. 7, 2019

1
Ding’gang maliliari / king kecatamung bie
Itamu at ala / nang dapat pang take,
Lalu na caretang / eta lubus male
Meganap no’t sucat / king bie ta miyugne.
2
Punto ning mabibie / masakit yang surian
E agiung abut ning / simpling ca-isipan,
Ing Ginu bucud ya’ng / migit atin beluan
Sablang mangarapat / keti king cababan.
3
Anti ding pagsubuc / potang e la malit
Datang na la cabud / atin cambe bitbit,
King tau pa-atba / a misna king sakit
Maibug Me pang sisian / at cutnan nung bakit?
4
Miayaliuang crimen / ampong calamidad
Ayun, bagiu, albug, / trahedya king dagat,
At digdagan pa ning / mapanyirang silab
Ila ding mapilan / ning tau pagsalbat.
5
Dacal pang balakid /ding lalto king yatu
Daranasan da ding / capara tang tau,
Ila retang pane / na purus calbaryu
King bie ila reting / magsilbing delubyu.
6
Masakit lurucan / ya ing bie tagana
Caguluan nang yatad / e maibug acarga,
Maging king nang lugal / at mapa calsada
Lasip lang criminal / acakit ding mata.
7
Pilit cong atbanan / ding dacal a cutang
E no apitugma / ning dimut cung beluan,
Ing ucul sisitsit / ngeni no gunaman
Nung nanu tagana / ning Babo paramdam?
8
Ketang eta malit / ila ding parati
Na Ning Mayupaya / king tau paintindi,
Ding’gang gauang maroc / at macasarili
Lubus Nong patalus / CABANG E PA TAULI.

Jun 5, 2023; DIZLAG Farm, Resthouse & Resort.

Posted in Bie, PL Orly M Dizon, Poesia, Poeta Laureado | Leave a comment

“kabang maranun pa, indu”

Posted on June 6, 2023 by inglibrarian

banuang 2011 iniang bala ku malaus nakung dalumdum panimanman, bala ku e ku na bitasang akit ing sala. pero uling inatiat ne ning Guinu ing gamat na kapamilatan da reng aliwang tau inia angga ngeni manakit ku pa. mu pin, sinabi na ning doktor ku a kaibat ning apulung banua mapaliaring mipasibayuan ing miliari o kaya mikadiperensia ku galudgud. makanian man 2023 na ngeni at masalese ku pa. pero bayu ing datang ing banuang 2011 sinulat ke pu ing poesiang ini:

“kabang maranun pa, indu”

maliari kung mamun kabang maranun pa?
e mu sa isipang e ranaka sinta,
uling king pusu ku mal ka pin tagana,
nu atin telagang siduan para keka.
gawa rakang dalit a misna kayumu,
mitungi kung batui’t diamanting amanu,
‘tagulaling ku la karen ngang anak mu
ban ‘dalit do keka aggiang ala naku.
pupustu ne kasing mituklip ing tabing,
kanaku ing sala maibug nang mabating;
inia kabang atiu, dalit kung masanting
bayu ining sabla mangule matuling.
mamun naku kabang aggiu ku pang mamun
uling e ku balung tantian ing panaun.

-bayu mandilu

***ining larawan ing kalatas a peparala na kanaku nitang taung meging kasangkapan ning Guinu iniang pakiabutan Na ku gamat. uli na pu mekapagpa-MRI ku pu. inia salamat keng Guinu keya.

Posted in Uncategorized | Leave a comment

“malyaring pota pa?”

Posted on June 5, 2023 by inglibrarian

salamat nabengi at e mu ku kelian
king apatunayan kakung kamulalan
mekad uling ika makanian ka naman
inia meniglo ka’t ing oras, kelinguan;
nung e mu nabengi e ku murin miras
king pakirasnan da reng dakal a anak
a inia maralas ing magin dang wakas,
puersadu lang tutua a ala keng oras.
inia matula kung bayu ta kilala
ing metung at metung ing mas malalam pa,
pasalamatan ku a menaya kata
a mapse ta pamung tipan alan’angga…
salamat nabengi keng lambis at lugud,
malyaring pota pa? …bayu ta matudtud….

Posted in Capampangan Shakespeare, Lugud, Mala-Sonetu, PL Tuazon Sabandal, Poesia | Leave a comment

PAMANGALALU

Posted on June 5, 2023 by inglibrarian

Ing pamangalalu, mengari yang ane
King metu relasyun, ya ing makamate
Agyu neng lasakan, asyas a matibe
A peka-pundasyun na ning pamiyabe

Ing pamangalu ngara ring aliwa
Tanda ne kanu ning lugud a dakila
Dapot agpang karing taung e manwala
Kasakiman iting e na makatula

Ustung milalu ne, ing pamangalalu
Magi neng dalan king e pamikasundu
King matibe lubid na ning pamikalu
Da ring mikalugud, yan ing mangibugtu

Ing pamangalalu, e mu sa lalabis
Lunto yang lugud a misna king kalambis

Vhelle V. Garcia
June 5, 2023
UAE

Posted in Lugud, Mala-Sonetu, PL Vhelle Garcia, Poesia, Poeta Laureado | Leave a comment

“ing pakapata”

Posted on June 4, 2023 by inglibrarian

itang kuatru kantus e ne pa betingan
ing kanakung buntuk a anting aspakan.
pablasang iya mu ing maki kagiwan
ban apakalinguan ing lasang tatakman.
dati alang aldo a e ku matula,
lakuas kareng oras a miabe tang addua,
dapot iting bage migbayu ngan bigla
anting mitapus ngan, misan mu meyala.
bala mu kape mu ing lulugud pala,
istung ing mayumu milako, mayit ya,
inia pin king tasa ning bie mibie keka
mabating ka tula potang malduk naka.
inia pin ing lasa nitang kuatru kantus
‘ya namung pamata king pusung mepaltus.

***palage ku 05/2019 ya misulat ini
***kabang mamipi
***(akalkal ke mu pu keng cp ku)

Posted in Bie, Capampangan Shakespeare, Mala-Sonetu, PL Tuazon Sabandal, Poesia | Leave a comment

“istung metabang”

Posted on June 4, 2023 by inglibrarian

mebitas la tabun deng addua nang mata,
limbug lang mayalbug deng adduang pisngi na
uling king sukal lub tutung miglapo ya
ing maskup nang salung gilutan ning sinta.

dapot e ya bisang palto makikeinan
inia linakad yang maratna keng dalan
a anti mo waring ing sabla samas ngan
ampo pang ala yang dit man panamdaman.

dapot ing tutu na, king busal ning lub na
manenaya ya mu a datang na sana
ing uran masikan ban pampanan na la
reng maglipasag dang bunitil ding mata.

ngeni na apisip nung nanu ing yumu
a babie ning sinta kareng pusu tamu,
ing sukli nang salpak tutung e mu nanu
nung mimin ne yumu ing pusu ning mal mu.

makanian ya naman siguru damdaman
ing pusu ning kekang palsintang balayan
istung gilutan me ampo pang kelinguan,
at tebangnan meng lub a amanung sisuan.

04/20/21 /20:54
kabang makakera

Posted in Amanung Sisuan, Capampangan Shakespeare, PL Tuazon Sabandal, Poesia | Leave a comment

NUNG E KA BUBULAD

Posted on June 4, 2023 by inglibrarian

nang: PL Sergio Gramonte Calayag

Nung deng mayap e bubulad, at ing ustu e paglaban
Ing telotian mayayakit, magbabo ya ing karokan
Dakal lang e mikibalu, iti metung kasalanan,
Pablasang iyang katutuan akakit ing kapabustan

Ing awus ning katapatan kareng tau yang ipalad
Ilako ing kamulangan, at ipabal itang mayap
Ban kanita pagtiwalan, tune ini yang pigagap
Keti babo niting yatu, pangatau maging ganap

Dangalan ning pangatau, keni nang bie yang ingatan
E pabustan yang milako at kasiran iyang lisyan
Mibaba la panlalawe, misnang lati kang lalawan
At masakit pa kanita, Ika ining uumisan

Ini tutung makasulat, keng Banal a Kasulatan
Nung papalad ing katutuan ing kalayan iyang kamtan
Inia keni ka talakad, ing matulid ipaglaban
Ipakit mu itang tapang e pabustan mipailalam,

Keng escuela mababasa ipabal ing katapatan
Kareng anak yang tuturu, ban kening bie iyang dalan
Keng panaun a daratang mayayakit keng balayan
Dening tau a matapat, mangayap lang manungkulan

Keng panaun tamu ngeni, itang mali yang kakaulan
E pa’intulut mipailalam, ing dangal at katapatan
Nung kabud na e bubulad, paintulutan ing makanian
Mipunta ta king kasiran keng panaun a daratang.

Salamat Kang Sir Kristian Sendon Cordero
ccto:

Posted in PL Sergio Gramonte Calayag, Poesia, Poeta Laureado | Leave a comment