SKY FALL

Posted on May 23, 2023 by inglibrarian

nang: PL Sergio Gramonte Calayag

Misan ing sikat a James Bond iyang kakung kasamsaman
Tinutuk ne kaku’ng baril aku ining babarilan
Inia ing kanakung gewa, ing baril na iyang telan
Ikua mi nang mibatbatan, ikua mi pang miyabitan.

Ketang banuang misnang katas, ikua mi na ping menakbag (sky fall)
Pekapilming e binili, agyang ikeng mibalabag
Ninu wari ining James Bond, at kabud naku mu matras
Sumulung ku at lumaban, mapatad ne ing mapatad

Nung keng leon at keng tigre, tutung e ku mitakutan
Karin libutad kakewan, aku ining salikutan
Pablasang aku’ng matapang tune liping kapampangan
Bibitbitan ining tapang keti babo ning sikluban

Makanian ing kapampangan ing tepangan bibitbitan
King libutad na ning parang, lamutakan e atrasan
Ing matulid pakilaban, lalung ini damusakan
James Bond ya man ining marap, pilming iya mu ing kailian

Posted in Amanung Sisuan, PL Sergio Gramonte Calayag, Poesia, Poeta Laureado | Leave a comment

Pakbit -paugtuan

Posted on May 23, 2023 by inglibrarian

Oyni melutu na ing kekeng paugtuan,
kabang mapali pa muna nakung mangan,
kasi pinandin mu dakal kupa gawan,
inya bahala no reng abe ku kanyan,
balamu wari ku , e lapa danupan.

Posted in Pamangan, Poesia, Poetisa Patria Bondoc David | Leave a comment

BIGKIS NING PAMILYA

Posted on May 23, 2023 by inglibrarian

nang: PL Sergio Gramonte Calayag

Nung buri meng misnang tibe ining bigkis ning pamilya
Pamigkis mu ‘yumung lugud, yang panyese mu karela
Ipabal me at ituru, malasakit kening bie ra
Kagalangan at masabal, ‘yang parati nang mumuna.

Nung masikan ya’ng pamilya, matatag ya ing balayan
Nanung unus man ing datang, iya ining agyung sagkan
Uling atin katuruanan, kening pusu yang mitanam
Mesese ya at megambul, keang bunga yang manyaman.

Tutung e mamungang santol, nung ing mangga iyang tenam
Itang tenam mung kayapan, kabanalan ing pupulan
Ketang lugud a mitanam, mayumu ya’t e maslam
Mayakit ya kareng anak, dening bungang pakamalan.

E yu sana kakalinguan, escuela ya ing pamilya
Deng malugud a pengari, talaturu lang kilala
Ilang babie alimbawa, modelu lang lalawen da
Deng anak dang pakamalan, ing bakas da ‘yang tukian da.

E magmulang ing kabayu, nung biasa ya ing rerenda
Nung malugud deng pengari, mayakit ya keng pamilya
Mangatinu la deng anak, nung matinu ya ing tata
Kareni nang pakamalan, patupad ing disiplina

Keng pamilyang kipmuang lugud, matatag ya at matibe
Malasakit at masabal, iyang tutung madalise
Nanu ya man ing gagawan, ila rening abe-abe
Ing kasaupan iyang duduang, akit mu lang mamantabe.

Posted in Pamilya, PL Sergio Gramonte Calayag, Poesia, Poeta Laureado | Leave a comment

PANGATAU E ATULAN

Posted on May 23, 2023 by inglibrarian

nang: PL Sergio Gramonte Calayag

Tutung e me akilala itang kayang pangatau
Nung lalawe kang pangkilual, a susuri keng amanu
Potang ika’ng magkabili, sarili na ika mismu
Kanita mu asambitla, ini aku, aku mismu

Kareng taung akayarap, pangatau e atulan
Agyang alang pegaralan, makasalikut ya beluan
E asabi iyang bobo, nung balu ne’ng katuliran
O matsura ya ugali, ing kayapan bibitbitan

Mapaliaring iyang bastus, akakit mu ketang mata
Dapot iya ing malugud, at tapat ya keng pamilya
Alang modong magsalita, kagalangan akit kaya
Matamad ya at batugan, kipmuan sipag ing dadala

Tau ya man e bubulad, kaisipan na yang malalam
Anting metung a poeta, malualas ya kaisipan
Mamatul ka keng akakit, at e taruk pilubluban
Ketang kayang pangatau, e asukad itang lalam

Kabud tau ing mibait, iyang tutung makumpletu
Alang man ing kakulangan, mayakit keng pangatau
Anti ya mo keng regalu, potang ini yang duduang mu
Makamal ya kekang mamie, pakamalan ya ring ustu

Kareng taung akayarap metung ya mung paganaka
Balang metung a melalang, ilang anak ning Dios lbpa
Nanu ya man ing itsura, ilako ing pamanusga
Yumung lugud pairalan ketang isip ampon gawa.

Salamat kang Dr. Robert Pangan Tantingco ning HAU-CKS
ccto:

Posted in PL Sergio Gramonte Calayag, Poesia, Poeta Laureado | Leave a comment

NANU YA INlNG BABAI? INING BABAI, NANU YA?

Posted on May 23, 2023 by inglibrarian

nang: PL Sergio Gramonte Calayag

Nanu ya ining babai?, lning babai, nanu ya?
Iya itang karin Eden, iyang inawus dang Eva
Iyang lndu da reng tau, at y Adan ing asawa
Iyang memie saya keng bie, king busal na nitang dusa.

Iya itang babie tula, king baintau a malsinta
Kabuklat ning kayabakan, ‘yang akakit king diwa na
At mamie yang inspirasyun, kening bie nang daladala
At magsikap yang ayabut, ing parasan kening bie na.

‘ya ing indung masasabi, babie sala king pamilya
A parating mamantabe karening anak nang sinta
‘yang diwa ning balang metung, babie tula ampon saya
‘yang mumunang panintunan, keng karinan dang maluka.

Nanu ya ining babai, keng panimanman deng malda?
Ya itang dapat igalang, pakamalan kening bie ta
Iyang tune e pialungan, ing turing mu’t pagsawan ya
At pabustan me’t yang ugse, anti ya mo keng basura.

Ninu ya ining babai kening bie mung mayulaga?
Mapaliaring ‘yang indu mu, ing wali mu, atse kaya
O itang kekang maestra, itang mayap pepabal na
O kaluguran kening bie, pakamalan kening bie ta.

Nanu ya ining babai? Ining babai, nanu ya?
Kening mabie kapanwalan, iya itang Birhen Maria
A meging indu nang Jesus, ban ing tau mikabus ya
Ing katawan na at daya, iyang tune ibat kaya.
Ika. . Nanu ya’ng babai? Ining babai, nanu ya?

Posted in Babai, PL Sergio Gramonte Calayag, Poesia, Poeta Laureado | Leave a comment

“silaban no reng tete”

Posted on May 23, 2023 by inglibrarian

kaniaman ta lugod, kayumung pilasan,
alang masasayang a oras ditak man;
pusu tang king sinta misna tigik talan,
miplanu nong mapse tangu keng pisamban.
dapot mika atin e pamikasundu,
sindagul yang buntuk ning kapalitu mu,
e ke buring dagul, kinua ke keng aru,
dapot keng lati na sigsag no reng pusu;
pilit kung kakabus ing pamipalsinta,
e na ka mebisang mibalikan ta pa,
inia ring dalan ta aggiang mitupa la,
anti ku mung angin a daralan keka.
kalati na buntok niting kapalito
pero ot ding tete asilab nong usto?

05/20/26 //20:57
kaibat mengan saladang gule
———–@@@@———-

“ngening ala nang tete”

mapali ta lugud, mapaling mapali,
pero ot merimla a asmu kasagli
uli na ning bage a asmu kalati
a mitsa ning e ta pamikaintindi.
pilit kung sasalba ing pamikalugud,
inaru, sinuyu, megasgas ku pa tud,
dapot king pusu mu anting asmu katbud
at misan ya’ mimin bibekut a lugud.
mialilan sama ing lugud mu kaku,
silab mo ring tete king pilatan tamu,
ban matda ing lablab, ing api lebul ku,
at ban mikalabkab, ing api lebul mu.
ngeni a ala nang tete pilatan ta,
makananu kayang dalakitan daka?

04/20/23 //22:36
kabang mipapaling danum

pamangilala
diwang apsi keng poesiang “Kasingdagul Mung Puling” nang koyang PL. Rodel Gozun

Posted in Bie, Capampangan Shakespeare, Mala-Sonetu, Palsinta, PL Tuazon Sabandal, Poesia | Leave a comment

DENING KAKALUGURAN

Posted on May 23, 2023 by inglibrarian

nang: PL Sergio Gramonte Calayag

Datang itang aldo, mal kung kaluguran
Mikawani tamu, ing bie panintunan
Atin makiasawa, atin manintunan
Atin nang dumayu, malaut mang lugal

Malagad nang mikit, tutu nang abala
Kekatamung oras atsu keng pamilya
Milako na ngeni dakal a lakwatsa
Panaun linabas, metung nang istoria

Ing masayang napun, kanita balikan
Karin king escuela, party at pasyalan
‘lang daseng lulukut, ala tang liliwan,
Malugud pengari, ilang sasandalan

Masayang kuentuwan, alang kapupusan
Agyang patingapun, tutung e magisan
Aili at sagakgak, ilang panintunan
Potang matua tana, kaku lang ganakan

Pota nang balikan itang milabasan
Deng lumang letratu ila reng dundungan
Lalawan la ngeni, dening pakamalan
Ninu ini? Ini?, ila reng kukutang

Kabud na makibat, ing lua yang tumulu
Minagus king mata, king dalig menabu
Ing bie tang masaya, iniang anak pa mu
E na mibalik pa, panalala na mu.

Keng bie na ning tau, tutung atin aral
Ini iyang akua ketang milabasan
Ketang kayanakan, atsu keng isipan
Ing e na mapupus, tulang panandaman

Dapot, abalu ta, e pala makanian
Ing bieng pakamalan atin yang parasan
Dake ne ning napun, itang kayanakan
Bukas a paratang, iya ing pagsadian.

(Salamat kakaluguran, Dake kayu ning kakung bie at pangatau)
ccto: the meaning of life

Posted in Bie, PL Sergio Gramonte Calayag, Poesia, Poeta Laureado | Leave a comment

TINGIRAN

Posted on May 23, 2023 by inglibrarian

Kapampangan Dictionary: listen attentively

Gamit: 1
Anya sana cacung mutya, damdaman me at TINGIRAN
Ining malucang poeta, alipan ning mal mung legwan,
E magbayu panlalawe, ngeni at capilan pa man,
Cabang atin cung inaua, icang dili ing luguran.
(ARDIN DING SAMPAGA – Almario “amor” C. de Jesus)
https://kapampanganlibrary.whereishome.info/2021/10/28/ardin-ding-sampaga/

Gamit: 2
Ing kalima yang TINGIRAN
Anti ya waring metung gulung ing bie tang kaluguran
Nung misan atsu keng babo at nung misan ing milalam
Problema man iyang datang, ing solusyon yang payntunan
Lugud ning Mayupayang Dios, pagkalub ne nung kailangan
(NUNG MANINTUN KANG KALIGAYAN – Sergio Gramonte Calayag)

Gamit: 3
ot kaya ala kung panamdaman mu man
aggiang dit mung tula king keyang kandungan?
‘giang TINGIRAN ning lub a pakiramdaman,
alang ibat keya aggiang baggiang timan.
(na’ng kasalanan ku? – Tuazon Sabandal)

Posted in Kataya, Manigaral Kapampangan | Leave a comment

Kasindagul Mung Puling

Posted on May 23, 2023 by inglibrarian

Mala-soneto
Silaba 12 Sesura 6/6
Quatrain 3 Couplet 1
Taladtad 14

*
King metung a pinggan kata mu mamangan
Metung ya’ng ulas ing kekatang ulasan.
Ding kekang paninap, kaku ila naman
Kaluguran mu ku’t ika ing palsintan.

**
Keka ya dudurut ing kanakung yatu,
Yaku’ng sangkan ania saslag ya’ing aldo mu
Yaku ing tula mu’t ikang ligaya ku
Keka ing kaku at ing keka kanaku.

***
Biglang menaliwa ing tiup na ning angin,
likuan mu ku’t meko na ku mu rin tambing.
E na ayulip ning piyabeng masanting
ing pisunggalit a kasindagul puling.

****
Ngeni ring dalan ta neng mikukurus la,
anti lamong mikit ding e mikilala.

Rodel E. Gozum
20 Mayo 2023
San Simon

Posted in Bie, Mala-Sonetu, PL Rodel E. Gozum, Poesia, Poeta Laureado | Leave a comment

Manalig ca Indung Sisuan

Posted on May 23, 2023 by inglibrarian

Ibugnus mu ing sakit lub anggang agyu mung ibugnus,
Ibugnus mung mitmung tapang ing kecang lua a daragus,
a daragus king salu cung misnang keca malulunus,
Malulunus, malulungcut, careng keca alang lunus.

Ipalual mu ing panangis, manangis cang anggang binit
Anggang binit mung paramdan ing palsimi mu’t pasakit
Ing pasakit a tataglus king pusu cung maginakit
Maginakit careng taung alang keca malasakit.

Gulisac cang mitmung sican, gulisac cang mitmung tarling
Mitmung tarling mung ipasiag itang cablas na ning tabling
Itang tabling a mangising king pusu mung sasaingsing
Sasaingsing na king caplas king dangal mung mababating.

Lumaban cang e cucurul king pasakit a daratang
A daratang king kecang bie a kecang maging casalang
Ding casalang nung nu’ dapat ilang mamie kecang galang
Itang galang mibie keca menibatan king Miglalang.

Manalig ca Indung Sisuan, manalig cang ica mung mal
Ica mung mal careng pusu tune kecang magmasabal
Magmasabal, makipamuc, e bitasang mapapagal
E bitasang mapapagal bang mitas ca mu sa’ dangal.

E. P. D.
Feb. 27, 2023

Posted in Amanung Sisuan, Anadiplosis, PL Eric Dizon, Poesia | Leave a comment