Kapampangan Library

nang: PL Sergio Gramonte Calayag

Tinulu na ining uran, mikabie la reng tanaman
Detang ubi kung tinubu, ila rening sisilawan
Daragul la rening tulud balang abak pagumasdan
Dapot potang pakalawan e gagalo keng kabilian

Kening kanakung kabilian, anti ku mo neng maninap
Ining uran ampon aldo ila reni deng kayarap
Saka ila deng kasabi, nung nanu ing mararapat
Aku naman makirandam, keng amanu rang masampat

Anti ya mong mangamanu ining uran babo banua
Kening bini a mikutkut at ini ing sasabian na
“Kabud aku ing tinugtug, ating kung bie a dadala
Mibangun ka keng kutkutan, babo yatu mikabie ka”

Inia uran iyang pagpa, keng kutkutan gisingan ka
Ining danum tugtug keka, atin yang bie a dadala
Mikabie ka babo yatu saka mamie kang pagasa
Gamitan ka at pamangan mamie saya at ligaya

Mekibat neman ing aldo, atsu babo ning katasan
“Ing aslag ku ibie keka ika’ng kakung pasiknangan
Alang dapat ikatakut, lumabung ka keng kabilian
Pablasang pagasa ka pin, tutu ra kang panenayan”

Daragul ya ing tanaman, tutung e ku amalayan
E akakit niting mata, agyang iyang pakalawan
Misterio yang mayayakit, ita nang bie rang dadalan
Ninu kaya ing kukumpas, nung alayu ing Miglalang

May 20, 2023

nang: PL Sergio Gramonte Calayag

Deng anak a mangalati, mengari lang labung kuayan
Itang suli iyang tutuk, ketang pawud a ulmaan
Potang datang itang aldo, akit kaya itang leguan
A magamit keng damulag, ing garetang guguliutan

Makanian la rin deng anak, kabang ilang mangalati
Itang mayap yang ituru, keng sarili yang ibili
Potang ila reng daragul, ing e ustu pisawili
Itang mayap a mitanam iyan atsu nang parati

Ing sikanan ning balayan magumpisa keng pamilya
Uling keni ya mituru itang mayap a gawan da
At nung mayap lang pamilya, karatunan mayakit ya
Yumung lugud at masabal iyang parating mumuna

Kareng baryu ‘niang minuna yumung lugud ing mimiral
Dening anak yang akakit inia iyang pakiapusan
Pablasang iyang ingatan pamibiebieng dang marangal
Bibitbitan keni nang bie itang lugud at dangalan

Akakalinguan neng misan, escuela ya ing pamilya
Talaturu deng pengari dening anak magaral la
Ababalu keng pengari, gawang bale aliwa pa
Atuturu itang mayap, yang gamitan kening bie ra

Inia sana pakamalan, dening anak a malati
Ituru tamu karela, itang mayap tamung gawi
Kanita iyang apusan, bitbitan na keng sarili
E mabura kapilan man, nanu ya man ing maliari.

Proverbs 22:6

nang: PL Sergio Gramonte Calayag

Pakiyarle ketang lapis, ing bie na ning metung tau
Iyang tutung mayulaga, keti babo niting yatu
Atsu ketang pamangamit, mayayakit keting bie mu
Nung makananung gamitan, ikang lulto pangatau

Lalawan me ining lapis, pota iya ing gamitan
Ban kanita magamit ya, iya ini ing tatasan
Manasakit ya katawan, potang ini yang gagawan
Makanian ya ining tau, kipmuan mu rin kasakitan.

Kening bie tang mayulaga, ing kamalian e alisyan
Ila reni maging aral, kening bie mung dadalanan
Anting lapis ‘ting pamura, ketang mali magamit ya
Isulat me itang ustu, potang kaibat meng aburan

E patugut keng panyulat, iya ining gagamitan
Nung nanu na ing asulat, alang patna, alang tuknang
Makanian ya ring ing tau, nung nanu man ing gagawan
Iya mismu ing susulat, kening bie nang dadalanan

Inia dapat ring tandanan, itang kayang pilubluban
Ing tasa na mayulaga, iya ining makalulan
Makanian ya ining tau, pangatau nang dadalan
Tune keni mayayakit, ulaga na king sikluban

Magamit ya ketang mayap, ining lapis a makamal
Makanian ya rin ing tau, pamibiebieng ating dangal
Atsu ketang pamangamit, ban mikabieng kipmuan banal
E sisiran ini nang bie, ban mikabie kang marangal.

February 11, 2022
ccto