nang: PL Sergio Gramonte Calayag

Ika’ng mako at lumakad, lakuan mu itang matsura
Bakit ika ing magdatun, nung ala nang tula’t saya
E pamilit ing sarili, nung ala nong buri keka
Malaya ka saka mako, ban sarili yang ligaya

E telotian nung gumulut, ketang parang ning labanan
Nung e agyu deng kalaban, ika’ng matras mamigunam
Nung nanu ing dapat gawan, ketang mabisang paralan
Pablasang alang agawa keng makalunus kabilian

Agyang keng pamaki-ugne tutung e na masalese
Bakit mo sa e gumulut, at lumakad kang manene
Kabud ika ing ginulut ing sikanan atsu keni
Uling e ka man sinuku, at tinuknang keni nang bie

Kabud Ika na ing meko, mipa-isip deng melakuan
At kanita naman akit, ing ulaga mung dadalan
Apigunam keng sarili, ika ini ing kailangan
Inia kabud kagulut mu ika’ng tutung pasayangnan

Potang datang itang aldo mikit kayung pasibayu
Mamaglapo itang lugud, manibatan ketang pusu
Ing patawad yang damdaman magumpisang pasibayu
At ing lugud a mayumu, anting pulut alasa mu.

Salamat kang Adela Pamintuan at Kang Sir Robby P. Tantingco ning Center for Kapampangan Studies – Holy Angel University

nang: PL Sergio Gramonte Calayag

Isipan ding aliwa, ing bie retirado, tutu yang maniaman
Ika ing painawa ketang kekang obra a dating luluban
Lulukluk na bale, ketang patingapun, ala nang gagawan,
Manaya nang pensyun, iya ing daratang balang bulan-bulan

Panakit da keka, ika’ng magpainawa, masaya’ng kekang bie
Ala nang liliwan, ala nang pa’intunan, kening pamibiebie
Bagkus e ra balu, pagal ning katawan, kailangan ya ngeni
Mimina’ng sikanan, neng alang gagawan, ini ya’ng patune

Mangadi ka’t ali, itang kekang pensyun, iya ining datang
Agyang makalukluk, kilub patingapun, ala nang gagawan
Kekang kaisipan, iya ing pupurul e me gagamitan
Anti ya mong palang, nung e magagamit, milako ya taram

Paninapan keng bie, datang itang aldo, anting retirado
Sabla ayabut na, itang panikuanan, iya nang disan mu
Saka mamigunam neng alang gagawan e na produktibu
Kanita mimina pati pilubluban, at ing katawan mu.

Inia e papainan ing kekang sarili, maging produktibu
Idake ing beluan, at ing pamanyaup kareng ‘liwang tau
E pabustan keng bie, iya ing milabas, ining balang aldo
Ing alang agawa, kabud na masayang, masayang ing bie mo

Retirado ka man, e mu paintulutan ing alang gagawan
Ban e ka mimina milako ing sikan ini nang katawan
Saka mu idake karening aliwa, itang kekang beluan
Lumabas ing aldo, ketang patingapun, tutung e mesayang.