Ing IMA , calupa da ring laguiung INDU , INDA ampon INANG , ya ing Amanung Capampangan a maqui lugud a catumbalas ning laguiung / palaguiung Inglis ( English ) a MOTHER .
Macanian man , ing IMA e ya sadiang laguiu o amanung Capampangan , nune , metung yang Andam / Meyandam a Laguiu o Amanu , calupa da ring aliuang Andam / Meyandam a Amanung Capampangan a ibat caring Isic ( laluna caring Cantonese ampon Hokkien) , Indianung Sanskrit ampon Espanyol / Castila .

IMA ( MOTHER ) . . .

IMA *
( Poema )
nang Jose Roman Reyes Laquian
9:00 PM Lunes 08 Diciembre 2008

Quetang camatayan binang macatacut / nung nu ing anac na ya ing mibabata , /
At balang inauang queang pangisnaua , / ramdam na ing queang pusu mebusbus ya /
Cabang ing anac na quing c’rus macapacu , / ya ing mal a IMA macalawe quea , /
Ing queng queang pusu saquit a memusbus / malalam yang lungcut cayabe ning dusa . /

” Mitaglusan ya ing pusu mu quing tabac “, / ya ing macasulat quing Banal a Libru , /
Tabac ning lungcut quing pusu na memusbus , / malalam yang saquit ramdam nang miyatyu ,/
Itang saquit na ning pamagcacasaquit / agad linagpus quing queang pangatau , /
Inacmul neng buu ing pangatau na , / anti mo queng taga meracap yang ustu .

Macananu ya caracal ing deuacan / atiu queti yatu nung nu ta mabibie ? /
Libutad ning sauing palad meyaquit ya / queng IMA ing dusang masiguid miyugne . /
Ing ramdam nang saquit ya mu rin sinaclub / quing cabuuan ning queang bie at male ,
Sisiguc-siguc, e miticdong darechu , / cuculug ding sablang butul nang mabule ! /

Iniang dinatang ya itang anghel Gabriel / quetang tacdang aldo a mipasiag quea , /
At quing queang meguing paquibat a ” Uwa ! ” / manibat canitang casagulian a’ita , /
Pilubluba’ning DIOS ya’ing mibabo quea , / alang capilisian ya’yting cabalua’na , /
Ing quea mismung bie , pangatau , planu , / quing DIOS langan deti , at e la bandi na . /

Manibat canitang casagulian a’ita , / itang mipagcalub queang pangayatyu , /
Atiu quing Banal a Pilubluban ning DIOS / at Tiualang Ganap ning Mayap a GUINU . /
Manibat canitang guingcas na ing ” Uwa ” / migumpisa ya ing bie na’t pangatau /
Bilang Parti ning DIOS a Daquilang Planu – / Ing mipagcalub a Caligtasan tamu . /

Quing pangapacu Na ning mal a anac na / inampang ne’ing queang mipagcalub a bie . /
Ya murin miyabe quetang pangapacu , / quing queang panangis quing dusang memale , /
Quetang pangalawe na cang Nuan a YESHUA , / ing ” Uwa” quetang queang cabaluan inapse ,/
Mangabaldugan yang ” Pagtiualan DACA “, / sumangid ning dusang canacu midaque “. /

Quetang casaquitan , yang quecata sanang / e cutnan ing DIOS ta , ” O baquit acu pa ? ” /
Nune , ing maya’pa , ya ing icutang ta / quing mal ta’ng DIOS , ” Baquit e yacung magdusa ? ” /
Cayabe nang YESHUA ampo’nang Maria / mapisasanmetung itamungan sana /
Quing pamanintun quing Pacalulu ning DIOS / at quing pagcalub Na a Bie Alananga . . . /

PAUAGA / PAWAGA :
CAPAMPANGAN :
IMA *
Ing IMA , calupa da ring laguiung INDU , INDA ampon INANG , ya ing Amanung Capampangan a maqui lugud a catumbalas ning laguiung / palaguiung Inglis ( English ) a MOTHER .
Macanian man , ing IMA e ya sadiang laguiu o amanung Capampangan , nune , metung yang Andam / Meyandam a Laguiu o Amanu , calupa da ring aliuang Andam / Meyandam a Amanung Capampangan a ibat caring Isic ( laluna caring Cantonese ampon Hokkien) , Indianung Sanskrit ampon Espanyol / Castila .
Ing laguiung ” IMA ” menibat ya quing amanung Aramaic a ” IMA ” , a mangabaldugan ” MOTHER ” quing amanung Inglis ( English ) .
( Ing amanung Aramaic ya ing catutubung salita nang Guinung ” Yeshua o Yehoshua ” ( laguiu qng amanung Hebreo ning laguiu queng amanung Inglis a ” Jesus ” )