Kapampangan Library

nang: PL Sergio Gramonte Calayag

Iyang makabatso alang babatiawan
Lawe makalawut ala yang lalawan
Saka manenaya alang panenayan
Atin yang kasabi alang pakisabian
Agyang iyang dili, adua la mo kanian
Atsu ketang mansyon, balung-balung neman

Miminum marimla misna ya king pali
Saka makipagkuento ala yang kasabi
Iyang sasagakgak, e ya man pin maili
Atsu ya karela iya ing melili
Saka makapiblas, marinat parati
Pane yang mamako, maratun ya bili

Abak a maranun iya ing damdaman
Masayang magkuento, libutad asikan
Ala yang kasabi, alang pakisabian
Biling makalunus, ing kayang kabilian
Kayang kaisipan iya ing tekasan
Inia ing sarili iyang lilibangan

Tutu king kasakit makanian a bili
Keng kayang kabilian iyang dili-dili
Kilala na neman ing kayang sarili
Balu na ing sabla nung nanu’ng miliari
At ustu pakibat potang makisabi
Mu pin tinakas ya, ing isip na ngeni.

Potang yang tinakas ini nang ganaka
Lunto makalunus keti king masala
Anting metung sulu, mepundi ne sala
Tutung madalumdum, balanse mawala
At kareng kayarap, milako’ng tiwala
Dakal itang duda, arapan ding malda

nang: Sergio Gramonte Calayag
(Meangu ya ketang sinulat nang reflections Sir Conrado Capitly Domingo ning San Nicolas de Tolentino Parish newsletter)

Nung manintun kang kaligayan keti babo niting yatu
Tanggapan mu keng sarili deng tutunan kung walu
Pagaralang tunggal-tunggal nung deni mo ilang tutu
Gawan mu la aldo-aldo, pamibie-bieng maka-ustu

Ing mumunang kakung babie at itanam keng isipan
Atin pegumpisan ing bie, atin mu ring kapupusan
Kalupa ning aldo saslag, matatda ya king albugan
Anya sa ‘yang pakamalan, di’t man eme sa sisiran

Ing kaduang panabilin
Mikabie kang atin dangal, bitbit me ing kabanalan
Igalang lang parang tao at ing bieng rang pakamalan
Ala keka’ng karapatan mal dang bie ing sintangan
Pamibie-bieng mapayapa, parandam me’ng katuliran

Ing katlung panabilin
Nung atin man mekasugat kening kekang pilubluban
Ikutkut me ketang aun, mamatawad at luguran
Uling keng pamamatawad, kapayapan iyang datang
Tuki’ng pamikakalugud, sumulung ing kabanalan

Ing kapat a panabilin
Pakamalang kaluguran, atin mamako’t daratang
Deng gagawa keng e ustu, ila rening tuturwanan
Sakaling e maniwala, kabud-abud ika’ng likuan
Atin namang datang keka, deng maburi keng katutuan

Ing kalima yang tingiran
Anti ya waring metung gulung ing bie tang kaluguran
Nung misan atsu keng babo at nung misan ing milalam
Problema man iyang datang, ing solusyon yang payntunan
Lugud ning Mayupayang Dios, pagkalub ne nung kailangan

Ini naman itang kanam
Katamaran iyang lisyan, gumunyat ka at magsikap
E pabaya keng kabiayan, ipakit me’ng kekang lingap
Dakal materyal a bage nung keka la mung pigagap
E kalingwan, bieng ispiritual, sesen me’t maging ganap

At ing kapito
Magsillbi kang kipmuang tula kareng taong sasakupan
Eka mamiling estado o nanu man ing kabilyan
Tune keni mayayakit ining gawang kabanalan
Sumuyu kang mipnung tapat, pansarili ‘yang kalingwan

Tawli ya ing pangwalu
Itanam ya keting isip eya dapat makalingwan
Egana-gana keng yatu tutung atin kayangganan
E asali niting pera ing payntunang kaligayan
Mayakit ya kareng tau, itang sukli yang tanggapan

Deni ilang paganaka, kekong kalupang Kristiano
Walo la ngan mesambitla, gabe nala niting tao
Kening isip pakatanam, ining kekang pangatao
Kaligayan yang akamtan keni babo niting yatu

Tutung e asali ning pera nanu mang kaligayan
Metung la mung palamuti keni babo ning sikluban
E payntulut ‘lang magbabo, pangatao yang lukuban
Kabanalan, pagdulapan ban mikabieng alang anggan