Cacung Casaupan
( Dalit ) ( Malikwatas * )
nang Jose Roman Reyes Laquian
Neng cai ramdam cu / uaring matudtud Ya , / — ( A )
busal ning piligru / qng benging tinipa , /
pamaglacbe yatu / ninu Ya’ing panyagca /
quetang alun-gulu / mamsang manalasa ? . . . /
Ninu ya’ing maningat / quening pamaglacbe / — ( E )
a maqui salabat / pasaquit na ning bie ? /
Tacbang cung mabayat , / tacbang cung manene , /
Ninu Ya’ing matapat ? / Ninu Ya’ing magbante ? /
Ding libung pasaquit / pauang manataqui , / — ( I )
pauang mamitamit – / miragsa cung dili , /
ala man mayaquit – / casaupan magsilbi , /
quening bie ning saquit , / alang macayanti , /
Ninu Yang Macaslag , / Casaupan cu babo , / — ( O )
Nuan Macabulalag , / Miglalang ning aldo ? /
Ninung macatuyag , / Queang macabatio , /
timauang inapag – / Lugud Nang macalto ? /
Ing pamagtiuala / babo na ning yatu / — ( U )
iduang cu yang cusa / queng caparang tau ? /
mangatni man gaua , / maguing instrumentu , /
caring mapiang diua , / maguing aring yatu ? . . . /
Cacung panimanman / cacung iyatna ya / **
Qng bunduc-bunducan , / casaupan atiu Ya , /
GUINU cung casaupan , / qng eganagana , /
Ing GUINUNG MIGLALANG – / qng yatu at banua ! /
E Na paintulut / ing yacung matisud , / **
aldoldo Nang yabut / ing lingap Nang bucud , /
E miglip man dimut , / at , e Ya matudtud , /
GUINUNG macasaut , / Dalise Lulugud . /
Cacung Casaupan
( Dalit ) ( Malikwatas * – Versung Catumbalic )
nang Jose Roman Reyes Laquian
Uaring matudtud Ya , / neng cai ramdam cu /
qng benging tinipa , / busal ning piligru , /
ninu Ya’ing panyagca / pamaglacbe yatu /
mamsang manalasa / quetang alun-gulu ? . . . /
Quening pamaglacbe / Ninu ya’ing maningat , /
pasaquit na ning bie / a maqui salabat ? /
Tacbang cung manene / tacbang cung mabayat , /
Ninu Ya’ing magbante ? / Ninu Ya’ing matapat ? /
Pauang manataqui , / ding libung pasaquit /
miragsa cung dili – / pauang mamitamit , /
casaupan magsilbi – / ala man mayaquit , /
alang macayanti , / quening bie ning saquit , /
Casaupan cu babo , / Ninu Ya’ing Macaslag , /
Miglalang ning aldo , / Nuan Macabulalag ? /
Queang macabatio , / Ninung macatuyag , /
Lugud Nang macalto / timauang inapag ? /
Babo na ning yatu / ing pamagtiuala /
queng caparang tau / iduang cu yang cusa ? /
maguing instrumentu , / mangatni man gaua , /
maguing aring yatu , / caring mapiang diua ? . . . /
Cacung iyatna ya / Cacung panimanman / **
Casaupan atiu Ya , / Qng bunduc-bunducan , /
Qng eganagana , / GUINU cung casaupan , /
Qng yatu at banua – / Ing GUINUNG MIGLALANG ! /
Ing yacung matisud / e Na paintulut , / **
Ing lingap Nang bucud , / aldoldo Nang yabut , /
At , e Ya matudtud , / e miglip man dimut , /
Dalise Lulugud , / GUINUNG macasaut . /
- MALIKWATAS
Ing metung caring Maalagang Ambag nang Melapupuring Poeta Laureado Jose Manapul Gallardo , Caduang Ari Ning Parnasong Capampangan , quing taldaua ning Arte at Literaturang Capampangan – Pilipinu ya ing ” MALIKWATAS ” ( English Translation : ” MAGIC POEM ” ) , nung nu ding versu ( o linia ) ning tula / poema mica pamibayu o pamialiua la panga-ayus at linto quing aliuang asque / alcus .
** Metacmus/menibat caring bulung ning librung DING DALIT 121:1-4 , BANAL A BIBLIA ( PSALMS 121:1-4 , HOLY BIBLE )
Iyatna co ring panimanman cu quing bunduc-bunducan ,
nu carin manibatan ing casaupan cu ?
Ing casaupan cacu manibatan quing GUINU
A mengaua quing banua at labuad .
Capilan man e Na ca sa paburen
mitatalmac quing burac !
Ing Talaingat mu e Ya mamatucba .
Ua , e Ya mamatucba ni matudtud ,
Ing Talaingat ning Israel . – DING DALIT 121:1-4 , BANAL A BIBLIA
alun-gulu = macapariquil ya caring ” malingasung alun-danum ” a mamicatawan caring ” mabayat a capanamdaman , maligaligan ucul a guipit , matinding casaquitan , cagulduan ampon peligrosung cabilian nung nu maliaring miyabe o misangcut ya ing ninu man .” ( CAPAMPANGAN )
