Kapampangan Library

© EMS (Elorde Mendoza Sambat)
Ing Poetang Mipalaut Cordillera

Eyuna panayan datang ing panaun
Indung pakamalan emune ayampun
Pablasang king yatu a nuka maratun
Mibalik aline nanu mang panintun.

Napun nakadua na atyu pa king yatu
Lugud pigkalub na king sapni nang tutu
Nanu mang gawan na pawang sakripisyu
Ban ding mal nang anak mipuk la’t masensu.

King pagal na’t sakit katawan ginupu
Angga king mirate miragsa sinuku
Nyang ene mikimut dit man agyang nanu
Taneng migpilpil na king pagkeran namu.

Ngeni king sakit na ampong king saingsing
Anak a pinala pantunan neng siping
Nasa nang balikdan lugud a penapsing
Dapot ing pakibat lingap a matabsing.

King lalam ning bale karin ya migdatun
Uling ing sakit na makayawang sipun
Anya king pamangan lingap at panampun
Dili dili namu rugung magpaindatun.

Pota mong Mother’s Day saka la manyatang
Letratu at video saka re letratuan
Kaybat danong a post king dalig ning account
Saka da ne lakwan indung manimdiman.

Potang dili dili ing indu king lumbe
Mamanalimguiman at managulele
Saka na isipan nu ya migkamali
King pamanese na anak misawili.

Anak a miswerti uli ning lingap na
Nula karin ngeni baket alalupa
Matang undap undap mame nang misara
Waring gigiyagis lulua’t manenaya.

Ngeni mong king burul itang balang metung
Kareting penganak tatangis kukurung
Ngara king tagulele baket indung irug
Likwan mukeng agad alanang ayawus.

Taung makibalu king karelang dapat
Maili’t mabubuysit tangis at gulisak
Nung balu yumupin ngarang manuligsat
Dapat deng anak na ning indung mepatad.

Malagung bulaklak king kea pinatung
Babo ning katawan babo ning kabaung
Pati na ing leguan nitang keang pantyun
Ena asalikut sakit nang nilayun.

Eyuna panayan sana ing panaun
Kekatang penganak indu tang pekapun
Ing matakmus pamu inawa’t mapatlud
Bayu ya malingap takman kekang lugud.

© EMS (Elorde Mendoza Sambat)
Ing Poetang Mipalaut Cordillera

King timbulan ning alaswerti
Karin ku mangulabe
Banting upayang king bie manatili
Sumaguid ning sakit at lumbe.

Tatalangang anting bako nung sakalit manakit ku
Tune pagsandigan king kalmang bigu
Ngening milulutlutan la king pwestu
Detang bisang mag ari ari king balen ku.

Detang tanak a memalen nung nu bisang manimunu
Ampo retang magbibiasa a magjangad kareng pwestu
Tano ngeni mikalaguso milululutlutan king pwestu
Aibug danang malyari na pamamili da reng tau.

Deng aliwa a mamyalung marinat la pamanyaptan
Amburi da ilang lumput a manyambut king alalan
Anya kareng dapat dang bakle a nung misan
Makasagasa la ketang e sarya o piadian.

Pota ngening epa miras ing panayang pamanatul
King ganaka at masabal ela gagasul gasul
Buri dang ipalkas ing lugud wari’t pialkus
Ban mapili king balota ning pangayawus.

Pota ngening atyu nala king upaya mike’t mipuk
Lupa daman at alino alimuno akit lumpuk
Antilamong butaki king aldo makasalikut
At king dulum na ning bengi lilimpo la’t mamiyakus
Ing alalan magulu ya’t makalitu
Uling balang lilibutad matenakang kandidatu
Mayap langan alang mibas kenu’t kenu
Dapot kaybat emo akit agyang ditak a alino.

Inya sana o kapatad ka balen ku at kabaryu
Samasan tang mangilatis nung ninu mo itang tutu
A magmasabal kekatangan anting tau
Yanasa ing pilinan ibili king balota yu.

© EMS (Elorde Mendoza Sambat)
Ing Poetang Mipalaut Cordillera

Ninung makibandi gabun a tutukluan
King danum mamagus sibul ding tanaman
King tiup na ning angin marimlang sangapan
At karetang dutung atyu kabundukan.

Ing gabun king patag iti mi titulwan
Itang kabundukan ancestral lands naman
Bebe ilug, taldaua pinak kalualasan
Deti pakalagyu kareng matenakan.

Deta a nung ninu ring gagambul mayap
Serulan a gabun sepuling metuklap
Ala lang tatalnan prueba o nanu man
Patune karela itinang pibandian.

Nung isanu sana retang makinabang
Ila ing karampatang gumunyat luminang
Mipala king gabun a pitatamnanan
Ila reng mumutus karetang alipan.

At nung makautus la retang panginuan
Karetang tutunguen karelang alipan
Emu bukud bulio gulisak masikan
Nung misan atin pang late king katawan.

Makanyan la ngening mepata katawan
Deting mesambitlang insil a alipan
Nanu man ing sakit at kapibabatan
Batbat a mitulid karelang kabilyan.

Dapot ing matulid a sukat isipan
Ning ninu mang tau keti pin melalang
Alang makibandi king gabung tutukluan
Nune ing itamu ing bandi nang sakdal.

Antimo ing ugali at ing kapaniualan
Detang indigenous people a sasabyan
Ing gabun ya ing bie at bie king gabun ngan
Anya alang makibandi kaniting tutukluan.

Konseptung malagu a dapat tularan
Kareng kapatad tang tau kabundukan
Gabun a karelang ngeni daralpakan
Gabun a tumambun karelang katawan.

Oini ing guintung aral ampong kaisipan
Taung keang gabun ena asukmaman
Irake lang kusa kalupang melalang
Ban ing grasya ning Dios laganap miuman.

Kanita milisya itang kagugutgutan
Pilatan ding mabandi at malukang dakal
Nung ing pamipante kareting pibandian
Iti ya ing tune a mimiral sakdal.

Pablasang ing tau sukat nang ganakan
Gabun yang miulma ibat king burak ngan
Dininan inawa ning Guinung Miglalang
Ania gabun murin ing keang kaulyan.

© EMS (Elorde Mendoza Sambat)
Ing Poetang Mipalaut Cordillera

Ing bie na ning tau mengari yang bula
Bigla yamung lunto bigla yang mibuka
Ibat king nanung tiup angin waring bina
Atyu ka mabibie king yatung masala.

Ing mesabing bula paid paid mu rin
King arle ning tula lapo lapo ya pin
Ustung mitakda na oras nang panispin
Matdas nemung bigla king tiup na ning angin.

Ing bie na ning tau anti ya king bula
King Tula at lumbe magsale yang bina
Nung king tagimpan na bukas yang matula
Mabibie yang lubus king timan a nasa.

Dapot nung misan pin ing sampat mawala
King Aldo paintungul matdas namung bigla
Ing tula king pusu aba ot mipa kanyan ya?
Ing dating eden mu mialilan lugma.

Nung inia melalang kalupang Cristianu
Eta magmaragul nanu mang dasan mu
Uling ing paintungul tune eme balu
Datang ing panaun ikana ing duku.

Alakang nanuman dalan keting yatu
Bukud mung ing inawang matakmus mung piju
Maguing ing pibandian, upayang tagle mu
Iti lakwan mu ngan king pamanlako mu.

Eka sana matas magsale king bunduk
At ing kaisipan e binang mataluktuk
Dagul a kaladwa at binang malusuk
Pota bigla kang lagapak at maspak a buntuk.

Sukat mung ganakan gabun kamu ibat
Lelang na ning Guinu king sariling gamat
Mirinan upaya sikanang pepaibat
King Mayupayang Dios ibpa tamung sukat.

Nung anti kang bula keting panga atyu
Gamitan mu ing bie kasuywan king Guinu
Potang matdas naka a keka siguradu
Mananu na sanang maula ing bie mu.

Oini na ing pluma tane bisang tuknang
Sumulat poesia ampong cawatasan
Sinubuk kumupu nung malyaring miuman
Kambe ding parnasu ning amanung siswan.

© EMS (Elorde Mendoza Sambat)
Ing Poetang Mipalaut Cordillera

Ating sadyang tau sumanguid ning kasakitan
Akwa nang man loku akwa nang manlamang
Antimosa ngeni COVID19 a meturingan
Dakal lang manlamang dakal lang tulisan.

Ken namung pamangan panulu’t kabyayan
Agyang pandemic pa dakal lang gahaman
Lugal i saup de karing mangailangan
Pag imbutan depa at saka re kwanan.

Ing ayuda nang binie ning kapamahalan
Ibat kareng kwalta bwis ding migpagal
Ing dake kaniti nganing pun pekamal
Ibie yang ayuda karing mangailangan.

Karas na king gamat detang miatasan
Mekwa neng kapitna king keang kaustan
At kasdan mu rugu karas na king disan
Katlu nyamung dake king alagang miuman.

Detanang aliwa magtinda’t maglaku
Karing kailangan da detinang memaryu
Mekad ing alaga mig dobli’t meglobu
Uli ning panakitan maragul a tubu.

Nung wari’t itulut ning Guinung Miglalang
Iting daranasang tune kasakitan
Magus mung ting bula king keang kabilyan
Salese mu rin pin ngara ding mabeluan.

King salukuyang bili ning meto ketawan
Ngeni tapa dimdam myaliwang kabansagan
Antimo ing “new normal” ngana ning kabyasnan
Bayung pangimut ya bayung kaayusan.

King sakit a dintang king meto ketawan
Mituran ya ing maina dugpa ya king disan
Alang kalulu pin ala ping mayaman
Bulnerabli ta pin wa itamungan.

Aniasa o tau nung mibule ka man
King yatung kabilyan ngening salukuyan
Ding adwa mung gamat isakmal mong miuman
King pamanalangin karin ka magsakdal.

King Mayupayang Guinu karin mu ngan iyapse
Ing kagutgutan mu king yatung malumbe
Kea ka pasakup kea ka magsale
Karing anggang dusa a keka mamale.

Kekayung tulisan a e mamatugut
Maglamang kapara at mamamanabluk
Tuknang kong gagawa king bala baluktut
Bakongang milisya saplit ning matilus.

Ngeni na ing panaun makaustung gawan
Nung nanu ing usuk na ning mal a Miglalang
Mikakalugud ta king aptas ning kalam
Batamung alisyan ing pandemyang ayan.

Uarit nung itamu mabyasang maniaklung
King pamangailangan da ding kaparang taung
Mamasa king tune pakalulu’t saup
Karing gamat da detang ating kalausan a lub.

Taung kapara ko a maldang melalang
Kaul kaul tamu king tune kasalang
COVID a matindi agyu tayang siran
Nung miyabe abe tamu king binit ning sikan.

© EMS (Elorde Mendoza Sambat)
Ing Poetang Mipalaut Cordillera

Karing anggang arasnan king bie tamu keting yatu
Maguing tula at palsimi ing lekaran ning bie tamu
Sukad man yan o megkusang digpa namu
Ating metung a mumuguit e akakit agyang dit mu.

Kabud sabyan ding makatuang tanac at masibucan
Ing bie tamung pigcalam ning Guinu ping cayupayan
Iya ing babie guia at ya iti ing dalerayan
King balang kimut na kabang lakad at king tacbang.

King nanumang municala king bie mu yang paninasan
Ustung e na peintulut nitang Guinung suguing maslag
Iti eya miyintulid king lacbang mung panimbutan
Agyang sigpo nakang sigpo king tilpak mu a kabilyan.

Karing anggang pangimut mu a ing sarili mung nasa
A lakbang mu king paninap at pangimut pamitasa
Isipan mu ing agyu mu king sariling pamikudta
Dapot lunto king sikoti ing buri mu e mitaka.

Ken mu akit ing makibandi king sikanan at upaya
Aliwa ya ing sarili mu ketang keang paninasa
Numan tibe numan sikan ing tagle mu ping bitasa
Eka mibas king upaya ning Miglalang keka miyulma.

King kaniting kaisipan karin dako bisang dinan
Guintung butil a amanu mibalayung kapanwalan
Karing taung ing Guinung Dios a magkalub king keraklan
Yamu bukud ing tune a pilmi tang pagsantungan.

Emu sana ipangaya eka dapat magpatilo
Eka magpatatu magparatut king bili mo
Uling misan king panaun miras keka itang nano
Magkang pota e asukmaman ing binit na nitang aldo.

Ala ngan pin iting bandi a tinipun tipun mu
Keting yatu menibatan at bunga ning kekang talinu
Maski pa ing sikanan a tagle ning katawan mu
King metung a kurap milako ngang emu nanu.

Uliniti kaluguran mibule ka at miguising
Bayuan mu ing ugali e manayun e masanting
Pagumpisang itulid na e magmatas anting kabling
A yuyutyut king pagaspas ning lalangitngit a angin.

O dale na sigue abe ume kune pin pututan
Iting dit kung kaguiwan a mikudtang kawatasan
Ika na sa ing mibule king dinakeng kaisipan
Mananu na sana rugu mitulid ya king kaustuan.