© Amor C. de Jesus-

Dirimla na ‘ing gatpanapun,
Parulum ne itang bulan
Ing cabengian a daratang,
datang alang capilisian.

Kening kecang meging bili,
Madalas ing maliliyari
mimisip na cang parati
ketang suluc magtamimi.

Babalican ing milabas,
Ytang suerti at ing malas,
Yla ngening meging bacas,
Kening bye ala nang bucas.

Detang taung liguran mu,
Ala na la keng siping mu,
Minuna na la at mecu,
Licwan da na iting yatu.

Menaliwa ta itsura
Alus e mu akilala,
Ytang aske mu canita
Linaut at tinabug na.

Dapot agyang macanyan man
Ating bage e kelinguan
Ing turu da ding Pengari
caring anac da at suli……

“NUNG TUMWA CA SA ANAC CU
TUMUA CA SANG MAKI KETUAN.”

Diwa at Bie nang Simang Leyson,
( kutda na ning Agila Ning Apalit, acdj)

Mibait at meragul cu, king balen ning Macabebe,
Busal da retang tanaman, at libutad ning Marangle,
Migsicap lang pengari cu, telacad de itang Bale,
Anti ya waring palasyu, masaya caming Mabibye.

Dacal la reng mamanican, mag-harana neng Cabengian,
At matula cung mamarap, macuswelung Makirandam,
Anti cu waring sampaga, a buri dang Pisamsaman,
Mengaring malamarine*, asna selan nung Tagkilan.
(Mengaring mamung bulaclac, asna selan nung tagkilan.)

Balen na ning Macabebe, ating ardin ding Sampaga,
at miyaliwang tanaman, akit mu king paligid na,
Ating Rosal, Sampaguita, macayama ing banglu da,
Anya dacal lang bubuyug, limpad limpad la carela.

Anya pecaingatan mi, e masira ytang Puri,
Ing nectar na ning dalaga, pacaingatan yang Dili.

acdj
*Dicut Malamarine,(o dicut amor seco), istung tigkilan me bulung, magticum o matras ya; Nung alilan me ing talata o idayu me ing malamarine, maliaring anti canini_
(Mengaring mamung bulaclac , as na selan nung tagkilan).

Neng Almario “amor” C. de Jesus –

Nung malyari sana, at dapat a mayap
Malyari meng basan, poesia cung liningap
Balu cung culang pa, itang cacung sangcap
Kening linutu cung, bunga ning paninap.

Ituru mu na cacu, ing sucad a ustu
Masanting a rima, a pagdulapan cu;
Dinan mu cung diwa, ing gawan cu nanu,
Bang luntu masanting, kilkal cung amanu.

Oyni ining poesiang , pigcasakitan cung
Belangcas telakad, king dimut a belwan
Magpilit sinulat, uli ning parasan
Magbalic ing sinta, nitang cayanacan,.

Metung cang poetang, cacung gagalangan
Misasalbag bini, king amanung siswan
At itang bini mu, dimpot ke at tenam
Sana mamunga ya, mayubu’t manyaman.

E ca micacunu, sabyan mu ing dapat,
Manayun cung tucyan, bayang maging sapat,
Ining cacung poesyang, buri cung ipalad
Careng cayanacan, keng bersu mangapcap.

Keni king Parnasu, dacal ta abalu,
At dening Cayagum, dacal la isuyu,
Deng matwang poeta, manenaya la mu
Maca antabe lang, bisa la ping turu.

Anya cayanacan, magumpisa na ca,
Manenaya cami, careng kecang obra,
Abe abe tamu, Singsing pantunan ya,
Tingcad ning Amanu, ibalic ya sana.

acdj, Artesia, Ca USA, (Apalit, Pampanga, Capampangan)