Mag-alas singku na naman
Oras na namang apunan
King kusina’t pipaglutuan
Yana namang pagpugalan
Kada aldo nang dirutan
Obligasyun yang tuparan
Angga kaya keng kapilan
Asadsad ing kapupusan.
Recent Comments
INDA
Posted in Kataya, Poesia, Poetisa Maria Sinucuan
Leave a comment
PAMIBABATA
Irvin Harvey E. Rivera
Siuala Ning Maliwalu/Anac Ning Baculud
August 29, 2019
Pangainipan da na ing kekang panyatang
Kabang makabatyo king lele ning awang
Bilangbilangan da ing aldong paratang
Kapilan ka muli, kapilan ka datang?
Bala mu napun pa ‘nyang meko ka’t memun
Ayba! Kabilis na ing aldong tinagun?
Pauli ra retang mangayap mung layun
King marayung Bangsa, karin ka linuyun.
Pauli ning imbut, masampat mung pake
Karin na ka sildak niting pamaglakbe
Uling king nasa mung miswertyan ka king bie
King daywan a Bangsa menintun pagkabye.
Kambe na ning lumbe neng bengi manapa
Pilit mung agwantan ing daragus a l’wa
Karening likwan mu, o’yan mangulila
Nanu mang Amanu pipyakan mung gaga.
Alang aldo’t bengi ing pamanagulele
Sisi kang memun melaus miglakbe
Likwan mung Pamilya-malwat mung kesale
Oyan gagagan mu neng manapa ing lumbe.
Daya mu at pawas sageseng papatak
Ding adwa mung mata ikwa rang mengaslak
Alang oras keka, alang bengi’t abak
Tantu mung isipan, “para kareng Anak!”
Muna mung inisip ing kekang kabangal
Matigik nang kawul keka na pebakal
Bang lungkut milubas at kekang atangal
Mayap mung Asawa dinen na kang dangal.
King pamanuli mu matigik a kawul
Ing segana ra ring mangayap mung pungul
Ala nang miguit pa king meguing paintungul
Ing pamibiebie mu mirinan ngan kulul.
SiualaNingMaliwalu #AnacNingBaculud
Posted in Pamilya, Poesia, Poeta Irvin Harvey Rivera
Leave a comment
Liling Tupa
nang Apung Gusting
3/20/23 Riyadh, KSA
I
Misapuak kang alang tatang busal na ning sákit ning bie,
Masákit man, bibekut na ning indu mu’ing pamaniese
Mákiábe ya’t mákiipus, katawan man yang mipase,
Árinan na ka mu sanang kabyayan a masalese.
II
É ka miratun king bale uling ngámo sasawa ka,
King sermun na ning indu mu, balang oras kakatak ya;
Kesyo asme king kaselan bála namu akakit na,
Uli nita pibalak mung dumatun na keng barkada.
III
E man makapagmulala ing balitang mesúkul ka,
Uli na ning gagamit kang shabu ampong marijuana
Ing malugud a indu mu tutung e na ka abata,
Pati pipian tatanggap ya, ba mung atin yang pamiansa.
IV
Itbus naka king sukulan kalabas ning paruminggu,
Kambe na ning pangadi nang lumaut na ka king bisyu;
Dapot lakwas kang mesubi’t alang nasa pang magbayu,
Akakwa mu nang manyagmit at manyamsam kareng kantu.
V
Ganingaldo, maralumdum mangalgal ka’t kakayungkung,
Kikilim ka panimanman at e na ka mipaindatun;
Lilintik ma’t maralumdum, tinipa kang magtalukbung,
Inabat me itang taung lalabas a makapandung.
VI
King sepu na ning pataram pinilit meng ibie na la,
Ding pera nang sasalikut at nung ali paten me ya;
Dapot agguiang tatakut ya e no binie retang pera,
Uli kanung para la mu keng mamugtung a anak na.
VII
Pámatakutan me mu sa, e sasarian asaksak me
Tauli na niang awangis me ketang kayang pangaungle;
Siklulu me ing indu mung magjingalu karing takde,
“Kaluguran daka anak”…iti kaya pang siglawe!
VIII
Ing simbitla ning indu mu alingongo yang susumpung,
Manialiksik ya keng uyat tataglus yang anting uyung;
King pagkeran ing kosesia mamius ya at saka bubiung,
At e mu na abata pa…sinubu me itang akbung!
Posted in Pamilya, Poesia, Poeta Apung Gusting
Leave a comment
NINU KEYANG PASTUL
Ninu keyang pastul ing kekeng panayan
Ban nakeng agiya ketang ustung dalan
Ituru nake sa’ng misulud a malan
Ketang pante kuleng kulol ning kalayan.
Sana ing pamangan ibie na kekami
Ketang sapat mu at saktu keng kumabsi
Ban takman la naman retang mangalati
Kesa retang listu, dalan damung muli.
Ngening metwa na’ king sapa pa manima
Balamu ing aldo maymut neng sumala
Karing pinili ming mengakung minawa
At labanan retang mapanyamantala.
Ka-anti ning sadya, potang bayu-bayu
Keya lang supilan retang manabusu
Maging reng lalabag king batas ning tau
Para ing balayan, mangat ya’t masensu.
Makanyan-makanyan ing kuentu keng komiks
Palto ra keng bida itang keyang bangis
Dapot ing katutuan, pane manga-kinis
Nung e ing balayan king dusa manangis.
Anya angga ngeni mangarap keng pastul
Karetang maginu’t maniaman a sibul
Ban uluan ing lakad ding pisuk at tikul
At king sablang marok, ing e ya paisaul.
Pagmasabal ne sa’ ing pun miraragsa’
A piyapunan ding ayup a baluga’
Sana makinabang.. e na kabud ila
Ban deng keyang bunga, takman mi la lasa.
Ing pagmulalan ku, balik-balikan de
Kening sular itang impun atin sale
Durut-durutan de, retang bulalawe
Lamu reng tulisan, manayang salake.
Ining kakung kudta, bunga yamung isip
Anti yang barakung lilibut ke sulip
Balang keyang akit, ampon asisilip
Pakiyabas nala, king nasa nang tilip.
( neng WakaOjie Mangalindan Pena )
* 19 Marso 2022 *
Posted in Para Balen, Poesia, Poeta Bagse Ning Kailugan
Leave a comment
Macayama ing susulat
Macayama ing susulat king amanung capampangan,
ding amanung mangasampat nong casanting sasambitlan,
detang rimang pilalapat macagiam lang gagamitan,
ding sunis dang malinatnat anti la mong mangundiman.
Dacal sulat cauatasan a sinulat da reng uatas,
malalam la cabaldugan ing uri ra atmu catas,
careng diua at isipan miglacuan lang sampat bacas,
careng dacal capampangan mekilalang tune pantas.
Nung king rima e pa biasa e na maulaga iti,
atin sulat macaprosa malyari tamu ngan keti,
malagua yang apilasa itang pauaga na niti,
retang kecang buring pacsa apapasiag mo ngan deti.
Nung ing pacsang susulat mu lugud ya ing pisasabian,
a darake ning pusu mu king kecang mismung palsintan,
mapalyaring icang mismu acua mu pang mipatiman,
careng amanung mayumu a layun mung susulat ngan.
Ing metung pang misna sampat dikil careng buring pacsa,
asabi mung mitmung tapat king balu mung macabasa,
tula ya man o pagsalbat, calam ya man o paliasa,
masampat man o marucat, ligaya o pamagdusa.
Tutung asnang caulaga ing calamnan na ning sulat,
lacuas na nung ing laman na ketang pusu ya menibat,
careng sablang macabasa lunto ya sanang masampat,
uling macanyan ya nasa ing metung a talasulat.
E. P. D.
May 13, 2022
Posted in Amanung Sisuan, PL Eric Dizon, Poesia
Leave a comment
King Disyertung Sukulan
Sinulat nang Apung Gusting
22/03/2023 Riyadh, KSA
I
Matigit a kaul, umang alang patna;
Ing pepabakal mu kambe ning kekang lua.
Kening eroplanu, mimisip kung bina,
Ing máláut keka, abata ku kaya?
II
E ku man pigampa ing sanglad ku keni,
Uling yang miwale, sakripisyung anti;
Nung e mu ing bukas ding kekatang suli,
Magbalik naku ken, sulagpong saguli.
III
Kening pagkeran ku ustung mipaungle,
Papatdan ke’ing lungkut a makasalake;
Anti na mo ngening daralo ing lumbe,
Paninasan ku nang, ika ing kayabe.
IV
Patigtig ko rening kanta kung sinimpan,
A meging saksi ning sumpa kang luguran;
Saka ko lalon deng kekatang larauan,
At ing milabas ta yang gunamgunaman.
V
Agyang nanan ko mang ipyak dening mata,
E ku mipatudtud, bilingbiling ku pa.
Dening patigtig kung pamalsintang kanta,
Bibiayan dyang lakuas ing kakung babata.
VI
Kwanan ke at kaulan ing kakung ulunan,
Neng misan uman ke kabang kukumunan;
Salasalibe na ing kakung isipan,
Tutung maua nakung kaulan daka’t uman.
VII
Malalam ne’ing bengi e ku pa matulsak,
Mabye ku pa diua, dururut ku utak;
Misna kong pagmasdan deni nang lupisak,
E ku amalayan sisiro ne’ing abak.
VIII
Maralas makanyan ing kanakung bili
Papagpag ku namu ing lumbeng susubi,
Pibatan ku agguiang ing dimla at pali,
Uling manaya ka king kakung panuli.
Posted in Poesia, Poeta Apung Gusting
Leave a comment
Ica, O’ Poeta
Ica, O’ Poeta, ica ing tinubud
ning Dios Mayupaya king yatu lulugud,
king gintu mung pluma a keca mibuclud
ding kecang amanu layun mong ibubud
e mu la paburen king alun mayanyud,
at king lalam dagat cabud la malumud.
E mu paintulut datang ing panaun
ing kecang cagiuan micutcut king gabun,
at king lalam gabun, carin ngan mitambun
ing tagle mung beluan king aun mandatun,
inya O’ Poeta, ume cang mibangun
bang ding amanu mu ilang maglimayun.
Ica, O’ Poeta, a mirinan calam
a menibatan pa king Dios tamung malam,
icang mamie sala king aldong malulam,
maging munag ca sa’ king marimlang amiam,
ding amanung maula, keca lang paramdam
king bie mung mipala a keca miparam.
Ding kecang amanu ilang manlualu
king sablang pasakit a makisaglulu,
king dulum ning dusa paslag me ing sulu,
lacuas careng tau a pacacalulu
a daranas pait, at caplas king salu
uli ra ring taung ganid at palalu.
Manalacaran ca ketang ustung dapat,
ipasiag mung matni careng kecang sulat,
nung nanu ing ustu, yang sabian mung tapat,
mecad atin taung e pa binang mulat
careng bage bage, maling pamirapat,
at ing pauaga mu ing bage masampat.
Ica O’ Poeta, icang mipanuanan,
ica ing pigcalam ning Dios Macapayan,
ica ing cacambe ning Indung ibatan,
icang manlualu king amanung menan,
at deting amanu ilang maging dalan,
laban ketang maroc, liuas king cayapan.
E. P. D.
Dec. 3, 2022
Posted in Amanung Sisuan, PL Eric Dizon, Poesia
Leave a comment
Magalmusal ta pu
Kadaklut a nasi singlen alang taba
Kapirasung ebun keng pali linaga
Kaputut a hotdog ka-ornu-ornu pa
Kagili mung babi leko-taping serya
Karamput a ketsap bilus kakutsara
Kutsaritang baguk panapus keng suya
Katasang salabat e sawan bitasa.
-Maria
Posted in Poesia, Poetisa Maria Sinucuan
Leave a comment
RITERADUNG CAPARA CU
neng ORLY MANALO DIZON;
Sucad: 8/8; Orthograpiang: C-K; Mar 21, 2023
1
Masaya lang milalabas / at e male maliliari
Ding lagitic da ding oras / at gagauan ning sarili,
Macanini ngeni’ng bili / pane cayagape ayli
Datang, maco’ng patingapun / anggang miras na’tang bengi.
2
Bayu maslat itang sala / at ing dulum ume maco
Magcainge na la’t tulauc / deni nang sese cung tatso,
Uling ila ring gigising / at managcat cacung ticdo
Uaring metung ming casunduan / mararapat king aldoldo.
3.
Canita ne mentra itang / panenayan bayung abac
A yayamut na’t sasalbag / mipnung grasyang e agasac, (e agisan)
Mipamudbud caring sabla / alang duda at busilac
Macanian ya itang sangcan / kening ucul cu mitalsac.
4.
Mupin cacu e la bucud / kenu na mu macadikil
Nune mangaintulid la mu / caring taung e sasacuil,
Caretang map causucan / a king yatu la’ng cacambil
At keca e ya’ti miduang / king gamat mu macatukil.
5
Sumangid na nining cacung / cabilian a riteradu
E cu lubus panibala / caring suerti ipasapnu, (ipagarga)
Ampo itang manenaya / at cabud na mu turangcu
Angga potang mirasnan cung / ca-aldon ning biernis santu.
6
Cacu e cu la gilutan / dening gamat cung pagobra
Masipag cu lang pamitbit / pamangan a masustancia,
Careni nang cacung sese / pacabulus king laguerta
At nung misan king lacad cu / maibug cu pang misacubla.
7
E cu na picabiang itang / pagal, oras a lalabas
Matula co ngan pagobrang / ding’gang bage maca-atas,
Gagauan la ngan ding dapat / at e cu la pagpabucas
Macanian cu pangasane / ing sipagan ya’ng cayangcas.
8
Inia nung ica metung cang / RITERADUNG CAPARA CU
E mu sa pabustan itang / magluclucan na’t talungcu,
Insane me ing sarili / pane gauan ing ersisyu
Uling iyang munie sican / king catauan siguradu.
DIZLAG FARM & RESORT, Mar 21, 2023
Posted in PL Orly M Dizon, Poesia
Leave a comment
Atlung Poesya: MAKASAWA, MAKASAWA 2, TUYU
MAKASAWA (ORTOGRAPIYANG KA, KE, KI, KO, KU)
(PIRITUNG MANUK SA’)
Poesyang Polyptoton
Irvin Harvey Rivera
Siuala Ning Maliwalu/Anac Ning Baculud
March 27, 2018
Ninung e sumawa karing manabusu
Piritu yang manuk sa’ ing king dulang ku
E ka mipasawa nung ding kekang sweldu
Metigagal la at menulam kang pabu?
E ka mo sasawa karing tawung dapal
Pisawan ku na ing obra rang mabagal
Ikwa kung sinawa, Santu ku mang banal
Buri ku lang buring panyakalan batal.
Pisawan ku na ing matsura nang salat
Mipapasawa kung manulam nang malat
Mangga pa ma’t ngeni ing kanakung aslat
Ing piritung manuk e ya sa’ kakalat.
Wa, makasawa na ing ulam sardinas
Ing Piritung manuk yang yapag ku bukas.
SiualaNingMaliwalu #AnacNingBaculud
MAKASAWA 2 (Ortograpiyang KA,KE,KI,KO,KU)
Poesyang Polyptoton
Irvin Harvey Rivera
Siuala Ning Maliwalu/Anac Ning Baculud
September 3, 2018
Ni’ng e mipasawa karing manabusu
Bukbukan a abyas itang asali ku
E ka sumawa nung abyas a buri mu,
Milalu kakamal o nanung itun ku?
Maski king NFA sinawa ku naman
Mangalugkug ne ing danupan kung atyan
Ni’ng e sasawa king abias a bukbukan,
Dumanup naka pa bayu mu apangan.
Inia makanyan kung pisawan ing nasi
Lalu neng ibat ing dinat king taliri
Peka unyab-unyab mu na nung wari,
Bukbukan pa mu rin ing nasing mapali.
Nung e la sa’ dakal ding tekas at pulpul
Marayu ing abyas magkulang king pupul.
SiualaNingMaliwalu #AnacNingBaculud
TUYU
Mala-Soneto
Irvin Harvey Rivera
Siuala Ning Maliwalu/Anak Ning Baculud
January 21, 2019
Butul-balat ku mung atmu king kalati
King dusa’t pisakit ayli nakung ayli
O’t tumabang ku lub a mayli nang mayli
Dios yang kalukup kung e bisang kawani.
Panas ku mung piranggut king kapibabatan
Pibekutbekut ku ing ka’kung daralan
O’t tabugan ku ta nung mibabayatnan
Nung kauli bale, dakal ku pakanan?
Na’n ke’ta ing manuk—gulung yang penako
Nung ring pakanan ku, dapal la’t matako
O’t panugalyan ku dapat a masaklo
Nung kabang bie ku mung misaldak, misoso.
Mayap ya ing tuyu agyang asne kalat
Balu k’ya mu sana nung nu’ ya menibat.
SiualaNingMaliwalu #AnacNingBaculud
Posted in Poesia, Poeta Irvin Harvey Rivera
Leave a comment