I
Neng misan ing kapalsintan, dirimla ing kayang palî
ustung king pusu mitda na, ing milalablab nang apî
itang lugud a mipunla, a tinubung anting binî
kanita na magumpisang, malanat at malumpawî
II
Pablasang ing paginakit, a king pusu matitipun
magi ngang mua kalabas na, ning mapilan mung panaun
kakabas na nitang laug, ustung sapak ne king danum
kelambatan lasaka’ne,
itang matibe nang tabun
III
Ing pali ning kapalsintan, ban e lubus mangarimla
karing pusu itang lugud, dapat papanatilian ya
kabud iti ing mewala, masakit nang ibalik pa
ing panirug a dalise, a kalupa ketang sadia
IV
Nung mengari ya sana king, aring aldo ing panirug
mipampanan ya mang biga’t, king paroba ya salikut
itang paling darala nang, king kabengian pigkaimut
karas na ning kayabakan, pasibayu nang ibugnus
V
Dapot iti panamdam ya, at ala yang katiyakan
nung datang ya o mabating, e ta balu nung kapilan
inia king ban e dimla ing, pali na ning kapalsintan
ing lugud pang mibabaya, karing pusu palablaban
VI
Uling nung matda ing baya, iti magi namung abu
agiang nanan meng dapugan, ali mu na apatau
itang pali a kaanti, na ning api king impiernu
magi yang makapangablad, a dimla na nitang yelu
Vhelle V. Garcia
June 6, 2019
United Arab Emirates