15 hrs ยท Lubao, Philippines
Adle: Malikwatas
Silaba: 24
Cesura: 8/8/8
Linya: 4
Estropa: 15
Itang pamikaluguran, pepalulut ning panaun, ketang aldo mengalabas
Kalaldo man at kauran, abe-abe mipangumun, obat bigla nang metabas
Kaybat ngeni ketubasan, kinatmu ya king pagmalun, balang kabid babalasbas
Inyang mitas luluklukan, migbayu na ing panaun, detang bulung mengalagas.
Babalikan na’ king diwa, pemangawa ta’ng kalokwan, kaybat mayling sasagakgak
Pisukung me-alang kalma, uling mabule kang talan, menabit ka at mindalpak
Datang pa kaya ing mala?, ing e na papayalipan, king tatalanan mung tabak
Ing mibalik ka king mula, ita ing kakung tagimpan, king pusu’t isip tinasak.
Ing panayan a okasyun, kekatamu yang saganan, ‘muklat ta’ng awang at pasbul
Makipamasa ta’ng pasyun, ating lugud at kababan, makiramdam karing payul
Pangadyan ya ing orasyun, ing Guinu bukud mung samban, ketang kekatamung kubul
Makilabas karing mirun, ban’ lumualas ya ing dalan, at e manabu king kulkul.
I kasagsag:
Itang pamikaluguran
Kalaldo man at kauran
Kabud ngeni ketubasan
Inyang mitas luluklukan
Babalikan na’king diwa
Pisukung me-alang kalma
Datang pa kaya ing mala?
Ing mibalik ka king mula
Ing panayan a pkasyun
Makipamasa ta’ng pasyun
Pangadyan ya ing orasyun
Makilabas karing mirun
II kasagsag:
Pepalulut ning panaun
Abe-abe mipangumun
Kinatmu ya king pagmalun
Migbayu na ing panaun
Pemangawa ta’ng kalokwan
Uling mabule kang talan
Ing e na papayalipan
Ita ing kakung tagimpan
Kekatamu yang saganan
ating lugud at kababan
Ing Guinu bukud mung samban
Ban’ lumualas ya ing dalan
III kasagsag:
Ketang aldo mengalabas
Obat bigla nang metabas
Balang kabid babalasbas
Detang bulung mengalagas
Kaybat mayling sasagakgak
Menabit ka at mindalpak
King tatalanan mung tabak
King pusu’t isip tinasak
‘muklat ta’ng awang at pasbul
Makiramdam karing payul
Ketang kekatamung kubul
At e manabu king kulkul
Pilibe lugal:
Kalaldo man at kauran, abe-abe mipangumun, obat bigla nang metabas
Itang pamikaluguran, pepalulut ning panaun, ketang aldo mengalabas
Inyang mitas luluklukan, migbayu na ing panaun, detang bulung mengalagas
Kaybat ngeni ketubasan, kinatmu ya king pagmalun, balang kabid babalasbas.
Pisukung me-alang kalma, uling mabule kang talan, menabit ka at mindalpak
Babalikan na’ king diwa, pemangawa ta’ng kalokwan, kaybat mayling sasagakgak
Ing mibalik ka king mula, ita ing kakung tagimpan, king pusu’t isip tinasak
Datang pa kaya ing mala?, ing e na papayalipan, king tatalanan mung tabak.
Makipamasa ta’ng pasyun, ‘ting lugud at kababan, makiramdam karing payul
Ing panayan a okasyun, kekatamu yang saganan, ‘muklat ta’ng awang at pasbul
Makilabas karing mirun, ban’ lumualas ya ing dalan, at e manabu king kulkul
Pangadyan ya ing orasyun, ing Guinu bukud mung samban, ketang kekatamung kubul.
Babaing Matun 1/14/16
oras: 2:07 ning abak