Ing amanung Capampañgan
Macauiling darandaman
Casing lambing ning cundiman
Caring beñging capitañgan.
Casing banglung sampaguita
Bulaclac ning Filipina
Lapo ing cajinjina’na
Larauan neng María Clara.
Capampañgan á bandi cu
At pilsintan cung amanu
Icang tiru nang Indu cu
Iniang munang maniabi cu.
Nun dandaman me ing inda
Qñg bunsu nang pagtumaila
Icang laman ning salita
Icang sunis ampon diwa.
Nu cu man miras á sulip
Ica rin ing cacung bitbit
É picarine’t pagsulit
Cayagnan da cang mibait.
Tutu ra cang pacamalan
Amanu cung Capampañgan
Abe ra ca’t é cauanian
Angang culdas qñg cutcutan!
Neng:
Nestor R. Galura
DHVTSU
Baculud, Capampañgan