*Mangulait kekayung kayanakan ngening kayaldawan keng pamagmasusian ning kekatamung Amanung Sisuan😘
🍀 MEKENI ABE SULI 🍀
Ausan la’t agkatan dening kayanakan
Katukan la pusu king timyas ning timan
Itayis la isip, buklat panimanman
Keng pamagmasabal keng Amanung Sisuan.
Mekeni’t makiabe kening pamangambul
Mamasa’t mangutang kabuklat ning pasbul
Beluan yu idake at ipagmaragul
Tune Kapampangan e kayu paisaul.
Bisa yang tumiman ing Indung balayan
Kekayung anak a mitmu king kabiasnan
Ngeni manantabe keng keang dangalan
Kekayu yang sesen, luguran, lingapan.
Mamagwal na kayu, suli ning Pampanga
Masikan yung suala, igulisak yu na
Ikayung pagasa, kekaming manaya
Ining kulait mi maramdam na sana.
At kekayung tanak, magpanpan king bulung
Ume nako’t lumual, beluan e kukulung
E kayu tatakut, e kayu mumurung
Itaguyud yu ne, parasan isulung!
Luid ya ing Amanung Sisuan!
💗 Tulang ning Magalang 💗
melanienaguit27july2015
Melanie Cunanan