Metung karing pagmaragul, tamu bilang Kapampangan
ding tradisyun at kultura, a kekatang agisingan
king bista’t man ing paniulung, marayu neng tutu disan
mabie la pa angga ngeni’t, e tibubus mekalinguan
a anti mo ring ariya, ring kasebian at diparan
ampon ing pamagmasusi karing fiesta ring balayan
Ing mal tamung lalawigan, ing tatalan king titulu
king galal a peka-siduan, o kabisera ning pasku
ing ligligan da ring parul, king siyudad ning Sam Fernandu
dangalan ing iyatad na, karing maldang Pilipinu
king tindag da retang parul, mibulalag tamung ustu
e mu king kekatang bangsa, nun e mabilug a yatu
Neng panaun ning maleldo, ing baryu San Perdo Cutud
dadayuan de ring turistang, debotu kang Apung Hesus
ing pangaylasa ning Kristung kekatang talapangabus
king aldo ning Biyernis Santu, apanalben mu ngang lubus
manibatan king samula, a dekap de’ retang hudyus
angga king mibayube yang mipaku at mete king krus
Nung magdulap kang sisig a, pekamaniaman a lasa
pesang bulig, lutung ange, mamasyal ka king Pampanga
nung bobotu ing buri mu, o tamalis a awsan da
suman ebus at bulagta, king Cabalantian ka munta
karas naman karing pakwang malutu at la mallorca
ampon buru, kabalitan, ya ing bale’ning Candaba
At nung bisa kang maglimbang, mamasyal ka mabalacat
ing hot air balloon festival, ayalben mu karin king Clark
ating resort a masanting king dane na ning Arayat
antimurin ing poracay a sakup ning balen Porac
at king bulkang pinatubu, ating lugal a sisikat
a inaus dang “NABUKLOD”, a megi nang tourist spot
King museo ning Angeles, karin ta no man akit ngan
ding miyayaliwang libru’t, kawatasan Kapampangan
ila pin ding magpatutu, king tagle rang kadakilan
ding bayani na ning lahing, mekipamuk king kalayan
maging ding antigung gamit, ding kekatang pipumpunan
king museo ning Angeles, karin la ngan makasimpan
Ita man istasyun ning tren, a malapit kapitolyu
ya ing meging piping saksi, karing dusa at kalbaryu
da ring pilipinu ampon kawal a amerikanu
king death march a mitatak king kasalesayan ning yatu
manibat Samal Bataan, papunta king San Fernandu
kaibat ning mapilan oras, kingTarlac no diniretsu
Mabandi ya ing Pampanga, king kultura at tradisyun
a pagmasusian ta pa king, salukuyan a panaun
deti e la melumpawi, at midian pamikatagun
ban kekatang ipamana, karing tuking henerasyun
ing amanu antimurin, pasiknangan ya pundasyun
e tamu paimburisan, a mipase ya king gabun
Tara na king labuad da ring, mangatapang at maginu
mangalagu, matenakan, marangal at simpatiku
tara na king lalawigan, a pigkalam na ning Guinu
ampon karing banding likas, a binie na kekatamu
tara na at ipasuala mabilug a unibersu
a ing labuad Kapampangan, dai de ring maprinsipyu
© Vhelle V. Garcia
April 1, 2020
UAE