Irvin Harvey Rivera
Siuala Ning Maliwalu/Anac Ning Baculud
January 6, 2020
Neng migugunam ku at magdili-dili
Kukutnan keng pane ing ka’kung sarili
Nanung kasangkanan kareng malilyari,
Ing karamalasan digpan na kung Alti?
Pane kung kukutang king D’yos Mayupaya
O’t pabustan na kung magsalbat at magl’wa?
Nung keti labwad nung e ku man matula,
O’bat pepakit na nung e ku man akwa?
Sukat e ku balu at apitaluse
O’bat asne bayat ing kanakung takde?
Balang dalanan ku king bie pamaglakbe,
Piju at piju mu ing managulele?
King busal ning dulum, ing Dyo’s a Malam, Nuan,
Pakitagmwan ke sa ba keng pangamanwan
Guinung D’yos! Guinung D’yos! Nung nukarin ka man!
O’t asne kabayat Kurus mung pepusan?
Ding adwa kung gamat, pikurus ku nala
Sageseng tutulu ing lwa karing mata
Kaybat, telangan ke ing matas a banwa
O’t aganaka ku, Tau ku mu pala.