Macuiad A Poesia
Irvin Harvey Rivera
Siuala Ning Maliwalu/Anac Ning Baculud
January 21, 2018
Mapilan na la ring tune caluguran
Queti babo iatu ring quecang atupan
Agiang dacal la pa ring tau sicluban
Ditac na la mu ring pilming mitatagan.
Bista man qng lacad ning bie at panaun
Ding sablang tau e la ngan mipaindatun
Sinaua no iata qng cacapanintun
Caring tune guintu a pigcalub ning napun.
Dacal la clasi ring queca mu atagmu
Anti lang sampagang mabanglu’t masamiu
Micalat qng Jardin at cabud tinubu
Papaquit da queca ing timan da tutu.
Bista ma’t dacal la ring queca cumaul
Mamieng pauaga at mangaiap a paiul
E ca bisu-bisu qng maiap dang ucul
Maiumung salita, matingcad dang culul.
Ing Guinu man icdac de at pemisali
Pigcanulu re pa qng pita ra’t buri
Macanian mu naman qng sepu at tauli
‘Nabu ra ca naman qng calma mu’ng saui.
Dapot qng quecaba na ning queca ta’ng bie
Manaquit ca pa mu ring mangaiap at tune
Nu’ ca man paindalan, nu’ ca man maglacbe
Ing Guinu iang tantung cumaul qng tacde.