salamat pin Keya kakung kaluguran
nung ngening sisilim lingunan mu ku man,
ing pusu mu e ke bitasang ubligan
aggiang nanung bage -keka alang adduan.
lakuas kung e dapat tunggen pang laganas
itang sabla sablang bage ning milabas?
wa ma’t mengapuyat neng sasangkap gatas;
at neng mamangan ku, kan’ta ka darayas.
e makatapilan ing mini ka kaku
kasulud-sulud man ning kanakung ternu;
wa man unggu raka aggiang tutukba ku;
wa man sumala ku, e mu ing gatas mu.
aku ing mestra mung pekilala keka
karing bage-bage’t mumuna mung letra;
at aggiang pang bengi durungutan daka,
neng aldo Duminggu, dungut daka Keya.
tiruanan mamilang magumpisang isa,
at memuklat libru king layun mamasa;
abak, bengi, e ku sinawang bitasa
king pamangiya ku anggang e mu ikua.
kenu la ring takde a peka matalik
a kinaul keka king tula at sakit?
o kenu yang pusu itang magkasakit
istung itang salun keka ya dinantik?
kenu yang dangalan ing milalu tula
istung king iskuela atin kang akakua?
ninung maningaya karing tau’t sabla
karing kekang pupul king pagal ku’t tiaga?
iyang kekang laggiu neng miyayabe ya
keng pamangilalang biasa keng iskuela,
anting aku mismu ing pasuluran da
kareng midalia rang sasabit da keka.
e ku tunggen ngaku pero lawen mu sa’
ing kakung litania asne king kakaba,
at kulang namu pin magisan ku wawa
king teladtaran ku keng kasuelung gewa;
pablasang ita ngan kasuelu ning pusu
a kakung sisinup kening kakung salu,
uling itang sabla laus kung lub bibu,
ing oras ku’t pagal keka mal kung bunsu.
gewa ku ngan ita, ita ngan kanita,
kanitang ding asias atiu ing tibe ra,
ampong deng gilingan makagiling la pa,
at e la pa silo king sala ring mata;
kanitang e ku pa mangabayatanan
keng metung a durung kaku manukluanan,
at e ku pa dakal pilegis keng kanuan,
at e ku pa sawang keng matas karinan;
ita ing panaung e pa meniampaga
ing asmu katikas nang pun ning akasia,
kanitang deng ayup, ing siak da matas pa,
ketang e pa maliap kaku ing memoria;
deta retang aldo matas ya pa aslag
ing aldo keng banuang king sala manialbag,
ampo pa ing tabing e re pa babalag
ban ing kapupusan ning sarsuela pasiag;
e anti mo ngeni, ume pabengi na,
mabilis ing silim king pamanakup na,
makanian man anak, sumangid na nita
ala kung nanu man bage adduan keka.
uling meragul kang ustu pangaturu,
dakal ka asinup a aral keng salu,
at puera kanita iyang kekang pusu
meragul yang sane keng Banua duruku.
inia ot kailangan mawad ku pa keka,
ot kailangan ku pa ing ubligan daka,
ing kitmu keng turu ing kekang kaladua
at alapit raka keng Banua sapat na.
(meulip)
jan/30/18
kabang panayan lang mamaglual deng magaral bayu maglinis kuartu keng HAU
***megamit a metapora: direktang pamiyabas (metaphor).
***pansinan ya pu ing makaba nang pamilarawan ning “matua” magumpisa keng mabuyang tud angga na keng pamagulian ning tau potang matua ne (apsi keng Kasebian keng Biblia)
***sana apansinan ye mu rin ing pekamaragul nang layun o achievement ning pengari keng anak.