Nang Apung Gusting
01/05/23 Riyadh
*
Mibayit kang lubas, mako ka rin lubas
Dinatang kang maynâ, mako ka rin maynâ
Misapuak kang kikiak, kiakan mu ing wakas
Linsut kang ala ngan, mikutkut kang alâ.
**
Ngeni, obat samâ ing lama’ning pusû
Mitmu kang sángil at kasukalan a lub.
Makasarili ka’t ketasan milalû
Diria ing mimiral at keka lulukub.
***
Ing anggang depat mung, mayap at karokan
Aganaka ra ngan, potang mayangu bie.
Ing keganaganang kekang pipagalan,
Ala kang abitbit, king kutkutan ume.
****
Mitanam kang mayap kabang e pa mamun
Mamun ka king yatung, mabanglu ing napun.
♦TALABALDUGAN
Lubas – naked; alang imalan
Samâ – hatred, kasaman – the object of hatred
Sangil, Kasangilan – cruelty, impiety; alang lunus
Diria – envy
Angu – to draw or to take out from: e.g. : meangu bie
Mamun – to bid farewell