Ing diua ning mamicudta, bina ya pin king calualas
Agyang pang ing dayatmalat, malagua ne mung alimas
Maging king danggut ning yatu, king metung daclang yang miras
Ala yang e ayayabut, careng bage misnang catas
Agyang miras ya king bulan, piragli yang macaculdas
Sisitsit yang alang suala, dapot masican ing cablas
Busna ala ya pang pluma, agyu nang macabalangcas
Masalusu yang mimisip, careng cudtang cacalatas
Ing diua ning mamicudta, masampat yang manalindo
Agyang ala ya mang bagyus, asneng catas a sulapo
Malyari neng gauan tuldic, busna pa ing aring aldo
Atatapus na ing lulam, aslag ing cayang papalto
Maging king caralumduman, masala yang macabatyo
Pelalu ing macasimpan, cabud na mu caya lulto
At ing danum misna labug, agagaua nang malino
King diua na ing cayapan, ya ing pane mangibabo
Ing diua ning mamicudta, e ya biasang maginakit
Agyang atyu king malaut, saguli yang macalapit
Itang macapagpasaya, paramdam nang anggang binit
King cayang mayumung dila, ala yang palasang pait
At nung malyari mu sana, pelalu reng atin sakit
Agyang king diua na mu sa’, capaldanan sa’ ing mampit
Balang apse nang amanu, careng cudta nang sasabit
Careng talapamasa na, timan ing buri nang pakit
E. P. D.