nang: PL Sergio Gramonte Calayag
Ing tanaman kagulutan iyang kanakung atanam
Inia Aldo ning Bataan Capas shrine pagmasusian
Panaun nang Macapagal, presidentang kapampangan
Angelo Reyes yang tutuk, sekretaryong tatangalan
Dapot iyang e dinatang, inia aku ing tinanam
Potang lugal pupuntalan ing tanaman yang lalawan
Keng lugal ning Capas shrine, libingan de reng bayani
Pepalkas da itang tapang, laban kareng managlahi
Tinalakad ban paglualu, ing dai tamung komanggi
Misakitan king labanan, ing bangsa e pisawili
E ginulut agyang dit’man, laban kareng dayung lipi
Pepakit da ing tetagan, alub namu ‘lang magwagi
Ing lugal na ning Bataan iyang tatauling depensa
Keng sikan da reng kasalang, mepilitan sumuku na
Manibat la keting lugal, ila rening meparusa
Lekaran de ining dalan, San Fernando la papunta
Pase-pase la keng danup, ketang danum ilang mawa
Dakal la reng miraragsa, mapapatad la inawa
Karas karin San Fernando, keng bagun do pepasake
Mapupuput ketang kaskup, mabubungsul, mamamate
At keng pali malilipup, anggang ilang mangapase
Pangaras da balen Capas, istasyun tren beba keni
Dakal karela’ng melagas tengalan lang metung bangke
Pelakaran pasibayu, ketang kampo abe-abe
Agpang kang Rafael Yabut metung kareng meging preso
Kabuklat na ning masala, dening mete papasejo
Tatambayukan keng dalan, makalunus ing akit mu
Itambak la ketang kulkul anting mete na mung asu
Tambunan da la mung misan, alang pantsun a akit mu
Abitan de ing dog tag na, ibulsa deng akakit mu
Balang metung a sundalus ‘tin tanaman a mitanam
Bilang metung paganaka, ketang gawang kabanyanyan
Atin naman a mitanam kareni nang manungkulan
Bilang tanda nitang lugud para keng sintang balayan
Inia balang pun tanaman atin lugud a papabal
Keting sinta tamung bangsa, a tutu tang pakamalan.
July 4, 2023
