nang: PL Sergio Gramonte Calayag
Kanaku yang atandanan, keng homilia ning kasalan
Paganaka nitang pari, keng arapan ding keraklan
Potang ilang miyayabe, keng malukang pagkarinan
Nung problema iyang datang, iya ini ing pisabian
E paintulut ing matudtud, keng pagkeran yang dadalan
Agad kayung mikasundu, at ilako ya ing katasan
Dakal lang mikakawani, tune ating kasangkanan
Kareni nang miyasawa, problema da yang banggitan
Iresponsabli’ng mumuna, ing pamilya yang pabustan
At ing obra keng karinan, kalingapan magkulangan,
Kabud ini atsu isip, mumuna ing kalingapan
Misadsaran kaba ning bie, yumung lugud pairalan
At neng misan sasangkanan, dening bayo at katuangan
Ila reni deng makialam, keng pamilyang pakamalan
Ining e pamikaintindi, umpisa ning sigalutan
Inia dapat magsarili, magsariling kakarinan
Iyang gawan anting pugad, ketang lugud at kamalan
Kabud ini iyang gewa, itang saya iyang datang
Kataksilan iyang sangkan, yang sisira keng pamilya
Kareni nang miyasawa, ing tiwala mabating ya
Potang ini yang daratang, ganakan ya itang sumpa
Keti babo niting altar arap na ning Mayupaya
Ilako keng kaisipan kapagliluan ilele ya
Katapatan pairalan, keng asawa at pamilya
Ing pamilyang pakamalan iyang sesen ketang lugud
Pangaras na ning kabengian ituklip la reni nang tud
Manalig ka king Miglalang, keang lugud alang patlud
Kabud ini yang agawa, aldo-aldo kang mikabus
Ika nang mipamulala kasakitan ka mikabius
Masaya ya ing karinan, yumung lugud ing mamagus