nang: PL Sergio Gramonte Calayag
Makuyad mu ing bie keti babo yatu
Ing sabla gagawan ban ika’ng masensu
Potang matua na ka, kanian abalu
Pibandian, kabiasnan, deni malakuan mu
Inia mamigunam ing bie mung delanan
Ing Mayupayang Dios e me kakalinguan
Parasan mu keng bie ing bie alang anggang
Aliwa keng sulip deni mabating ngan
Banal Kasulatan tutung makasulat
“Abandi me’ng yatu, nanu mong asapat?”
Nung kekang kaladua inpiyerno mibagsak
Ala Kang apala, king Hades misaldak
Inia kabang anak keka yang samasan
Pakamalan mung bie iya ing samasan
Kareng dakal bisyu e sana sisiran
Ing ligaya banua iyang pagdulapan
E naman pin marok, nung ika’ng mikualta
Keng mayap gamitan dening kekang kualta
Lalu’ng kabanalan iya ing mumuna
Parating gagawan kening bie tang sinta
Inia pakamalan ing pakamalang bie
Ika ining lugud, lugud madalise
Yampang king Dios lbpa ing sabla mung bandi
Tune e masira, e kanan ding ane