Dir Pren,
Tinggap ke ing sulat mu napun pa. Kayan da mu pala reng prublema mo.
Aku man magumpisa ku nong apapaglabanan deng kakung prublema. Kutang mu nung makananu? Sinali kung miyaliwang klasing casette tapes kantang pisamban. Neng abak makisake ku keng siping kung bale bayung me-promote keng obra at dininan deng kotsi. Mipatagun a reliyosu yarin pala at makirandam kantang Kristiyanu neng magmanehu ya. Mipapalibutan ku keng amanu ning Ginu – neng atyu upisina, kang C, keng bale ing kasiping-bale ku. Mangilag naku pa kareng maka-yatung kakilala kabang magpaka-santa ku 😉. Ngeni, makapunta ku keng obrang payapa lub ampon e mamalagwa at makitagalan keng oras. Patse Duminggu, sisimba ku. Mantun ku pang Bible Study malyari kung pakyabayan banta kung lalung mipaynawa at mipayapa isip, pero neng Sabadung gatpanapun mu. Kasi patse Sabadung abak atyu ku keng part-time a obra.
Ing sekretarya mi me-demote ya uling madalas yang e lulub. ‘Day, aliwa ne man prublema ing metung a ini. Balaku mo sana menikwa nakung mas magaling, pero maka-dismaya ya. Biru mo, keng anam nang bulan probi, meka-20 absences ya. Ma-perminenti ne dapat ngening a-kinsi ning bulan, pero apasya kung gawan ku ne mung aldawan. Ing pektus na pa, deng e na pamanlub keng obra pauli ra mu reng sasalikutan nang pika-utangan keng upisina. Tinalbug ya ba naman ing tseking pemayad nang P8,000 kang D. Atin ya naman palang utang kang A. Keng bage, personal na nang prublema ita, ala naku karin. Pero Diyos mio naman.
Yaku, ela rin mayan deng prublema ku dapot pipilitan kung e masyadung maka-apektu keng obra. Nung ali, lalu lang miragdag at dagul deng puprubleman ku. Balu ku naman a milabas ku murin at eko sasara deng pasbul. Miminum kung bitamina inya na kung katako ngeni keng tudtud ampong pamangan, bangkanita magbalik ing dati kung sigla katawan.
Angga naku pa keni, keng tutuking aldo pasibayu. Mimingat ka palagi, pren.
Jas mi,
M.